.jpg)
រថយន្តដឹកសំរាមទៅចាក់ក្នុងទីលានសំរាមទើបបង្កើត។ រូបថត យូសុះ អាប់ឌុលរ៉ាស់ហ៊ីម
ព្រះសីហនុៈ រាជរដ្ឋាភិបាល សហការជាមួយធនាគារអភិវឌ្ឍន៍អាស៊ី និងធនាគារពិភពលោកនៅឆ្នាំ ២០២២ ខាងមុខនឹងដាក់ឱ្យដំណើរការទីលានចាក់សំរាម ស្តង់ដាបច្ចេកទេសនៅតាមបណ្ដាខេត្ដគោលដៅមួយចំនួនទៀត ក្រោយពីទីលានចាក់សំរាមនេះបានដាក់ឱ្យដំណើរការដំបូងនៅខេត្ដព្រះសីហនុកាលពីខែវិច្ឆិកា។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានកាលពីថ្ងៃទី ៣០ ខែ វិច្ឆិកា ឆ្នាំ ២០២១ បានថ្លែងទៅកាន់អ្នកសារព័ត៌មាននៅខេត្តព្រះសីហនុថា ទីលានចាក់សំរាមនៅខេត្តព្រះសីហនុ គឺជាទីលានទី១ នៅកម្ពុជា ដែលសាងសង់ឡើងស្របតាមបទដ្ឋានបច្ចេកទេសត្រឹមត្រូវ។ នៅឆ្នាំ ២០២២ ខាងមុខទីលានចាក់សំរាមបែបនេះយ៉ាងហោច ៦ ទៀតនឹងត្រូវដាក់ឱ្យដំណើរការនៅតាមបណ្ដាខេត្ដគោលដៅនានា។
លោកបានឱ្យដឹងថា ទីលានចាក់សំរាមនៅខេត្តព្រះសីហនុជាគម្រោងរបស់រាជរដ្ឋាភិបាលកម្ពុជាអនុវត្តដោយក្រសួងសាធារណការ និងដឹកជញ្ជូន និងបានផ្ទេរមកស្ថិតក្រោមការគ្រប់គ្រង និងប្រតិបត្តិការរបស់ក្រសួងបរិស្ថាន កាលពីថ្ងៃទី ៥ ខែវិច្ឆិកា ឆ្នាំ ២០២១។ តាមបទដ្ឋានបច្ចេកទេសដែលក្រសួងសាធារណការ និងដឹកជញ្ជូនបានសាងសង់ទីលានចាក់សំរាមនេះ គឺមានគម្រោងសម្រាប់ចាក់សំរាមរយៈពេល ៥ ឆ្នាំដោយទីលាននេះមាន ៤ រណ្តៅ សាងសង់លើផ្ទៃដីទំហំជាង ៥ ហិកតា និងអាចកាយកប់សំរាម ៧ ស្រទាប់ និងមានកម្ពស់ ២១ ម៉ែត្រអាចផ្ទុកសំរាមបានប្រមាណ ១ លានតោន។
លោកបន្តថា៖ «ជាគោលដៅរបស់រាជរដ្ឋាភិបាលនឹងគ្រប់គ្រងសំណល់រឹងសំរាមឱ្យបានល្អដែលជាគោលបំណងនៃគោលនយោបាយជាតិគ្រប់គ្រងសំណល់រឹងសំរាមដែលដាក់ឱ្យអនុវត្ត»។
បើតាមលោក ភក្ត្រា គម្រោងបង្កើតទីលានចាក់សំរាមស្តង់ដាបច្ចេកទេសនេះ គ្រោងដាក់ឱ្យដំណើរការនៅអំឡុងឆ្នាំ ២០២២ ដែលស្ថិតនៅខេត្តកែប កំពង់ឆ្នាំង ពោធិ៍សាត់ បាត់ដំបង និងខេត្ដកំពត ជាដើម។ រាជរដ្ឋាភិបាលនឹងធ្វើការជាមួយដៃគូបន្ថែមទៀត ដើម្បីសាងសង់ទីលានចាក់សំរាមនេះនៅសៀមរាប និងបន្ទាយមានជ័យផងដែរ។ ក្រសួងបរិស្ថាននឹងបន្តផ្តល់ជំនួយបច្ចេកទេស បណ្តុះបណ្តាលសមត្ថភាពដល់មន្ត្រីរដ្ឋបាលថ្នាក់ក្រោមជាតិក្នុងការគ្រប់គ្រងសំរាមនៅតាមទីប្រជុំជន។
លោក ហុក សុផាន់ណារ៉ូ នាយកគ្រប់គ្រងទីលានសំរាមទីប្រជុំជននៅខេត្តព្រះសីហនុលើកឡើងថា ទីលានចាក់សំរាមអូរតាសេកក្នុងខេត្តព្រះសីហនុ គិតជាមធ្យមមានសំរាមប្រមាណ ៤០០ តោន ក្នុង ១ ថ្ងៃ ដែលបានយកមកចាក់នៅលើទីលាន។
លោកថា៖ «សំរាមទាំងនេះគឺមិនមែនប្រមូលមកតែពីក្រុងព្រះសីហនុនោះទេ ប៉ុន្ដែបានប្រមូលមកពីផ្ទះប្រជាពលរដ្ឋ រោងចក្រ និងក្រុមហ៊ុននានា នៅស្រុកព្រៃនប់ផងដែរ»។
លោក សុផាន់ណារ៉ូ បានឱ្យដឹងថា បច្ចុប្បន្ន ប្រតិបត្តិករ ក្រុមហ៊ុនចំនួន ២ កំពុងអនុវត្ដការប្រមូលសំរាម សំណល់រឹងនៅក្នុងភូមិសាស្ដ្រក្រុងព្រះសីហនុ និងស្រុកព្រៃនប់យកមកចាក់នៅទីលានចាក់សំរាមនេះ។ ទីលាននេះ ក្រៅពីជាកន្លែងសម្រាប់ទុកដាក់សំរាមប្រកបដោយស្តង់ដាហើយក៏អាចធ្វើការបែងចែកសំរាមត្រឹមត្រូវ ដោយក្នុងនោះប្រភេទសំរាមនីមួយៗ អាចយកទៅកែច្នៃ ប្រើប្រាស់ តាមប្រភេទរបស់វាថែមទៀត។
លោក ភក្ត្រា ថ្លែងថា ក្នុង ១ ថ្ងៃសំណល់សំរាមនៅកម្ពុជាមានប្រមាណជាង ១ ម៉ឺន តោន ហើយក្នុង ១ ឆ្នាំ សំណល់សំរាមមានប្រមាណ ៤ លានតោន។ ដោយឡែកនៅក្នុងខេត្តព្រះសីហនុមានសំរាមចន្លោះពី ៣៥០-៤០០ តោន ក្នុង ១ ថ្ងៃ។ ក្នុងចំណោមសំរាមទាំងនេះ គឺមាន ៦៥ ភាគរយ គឺជាសំរាមសំណល់សរីរាង្គ ២០ ភាគរយជាសំណល់ប្លាស្ទិក ហើយនៅសល់ប៉ុន្មាន គឺជាសំណល់រឹង។ កំណើនសំរាមប្រចាំឆ្នាំមានចន្លោះពី ១០-១៥% នោះអាចនឹងធ្វើឱ្យទីលានចាក់សំរាមដែលគ្រោងចាក់រយៈពេល ៥ ឆ្នាំមានការប្រែប្រួល។ ក្រសួងបរិស្ថានបានជំរុញឱ្យមានការញែកសំរាមតាមបច្ចេកទេស និងធ្វើការកែច្នៃទៅតាមប្រភេទសំរាម ដើម្បីកាត់បន្ថយសំណល់សំរាម៕
វីដេអូ៖
