The Phnom Penh Post Search

Search form

Logo of Phnom Penh Post newspaper Phnom Penh Post - លោក ហ៊ុន សែន ជួប​រដ្ឋមន្ត្រី​មីយ៉ាន់ម៉ា​ថ្ងៃនេះ ដើម្បី​ស្វែងរក​ប្រក្រតីភាព​អាស៊ាន​ឡើងវិញ




លោក ហ៊ុន សែន ជួប​រដ្ឋមន្ត្រី​មីយ៉ាន់ម៉ា​ថ្ងៃនេះ ដើម្បី​ស្វែងរក​ប្រក្រតីភាព​អាស៊ាន​ឡើងវិញ

Content image - Phnom Penh Post
លោកនាយក​រដ្ឋមន្ត្រី ហ៊ុន សែន​។ រូបថត SPM

លោក ហ៊ុន សែន ជួប​រដ្ឋមន្ត្រី​មីយ៉ាន់ម៉ា​ថ្ងៃនេះ ដើម្បី​ស្វែងរក​ប្រក្រតីភាព​អាស៊ាន​ឡើងវិញ

ភ្នំពេញៈ លោក ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដែល​ជា​ប្រធាន​វិលជុំ​នៃ​សមាជិក​អាស៊ាន​ក្នុង​ឆ្នាំ ២០២២ នេះ​បាន​ប្រកាស​ជួប​រដ្ឋមន្ត្រី​ការបរទេស​មីយ៉ាន់ម៉ា​នៅថ្ងៃ​នេះ បំណង​ស្វែងយល់​អំពី​ចំណុច​ដែល​ត្រូវ​ឈាន​ទៅមុខ​ក្នុង​ក្របខ័ណ្ឌ​កុងសង់ស៊ីស​ ៥ ​ចំណុច​ដែល​មេដឹកនាំ​អាស៊ាន​បាន​ឯកភាពគ្នា​ទាក់ទង​ស្ថានភាព​នៅ​មីយ៉ាន់ម៉ា ដើម្បី​នឹង​អាច​រក​ដំណោះស្រាយ ធ្វើ​ប្រក្រតីភាព​អាស៊ាន​ឡើងវិញ ក្រោយពី​មាន​រដ្ឋប្រហារ​យោធា​ក្នុង​ប្រទេស​ជា​សមាជិក​មួយ​នេះ​កាលពី​ខែកុម្ភៈ ឆ្នាំ​ ២០២១​។

ការសម្ពោធ​ដាក់​ឱ្យ​ប្រើប្រាស់​ផ្លូវជាតិ​លេខ​ ១១ និង​សាងសង់​គន្លង​ផ្លូវ​ថ្មី​វាង​ក្រុង​ព្រៃវែង​នៅ​ខេត្តព្រៃវែង​កាលពី​ថ្ងៃទី​ ៦ ខែធ្នូ លោក ហ៊ុន សែន ថ្លែងថា​៖ «​ស្អែក​ខ្ញុំ​នឹង​ជួប​រដ្ឋមន្ត្រី​ការបរទេស​មីយ៉ាន់ម៉ា​។ ក្នុងនាម​កម្ពុជា​បើ​មិន​ធ្វើការ​ជាមួយ​មេដឹកនាំ អ្នក​កាន់អំណាច​មីយ៉ាន់ម៉ា​តើ​ទៅធ្វើ​ជាមួយ​អ្នកណា​? អ៊ីចឹង​មិន​ចាំបាច់​អ្នកណា​មក​ទិតៀន​កម្ពុជា​ទេ​។ កម្ពុជា​ចេះ​ធ្វើ​កិច្ចការ​ខ្លួនឯង​»​។

លោក​ក៏​បាន​ប្រកាស​ទៀតថា នឹង​ទៅ​បំពេញ​ទស្សនកិច្ច​នៅ​ទីក្រុង​ណៃពិដោ ប្រទេស​មីយ៉ាន់ម៉ា​ ដើម្បី​ជួប​មេដឹកនាំ​យោធា​មីយ៉ាន់ម៉ា​លោក មីន អ៊ុងឡាំង ដែល​ក្នុង​ការជជែក​គ្នា​នោះ​គឺ​មិន​ប្រាសចាក​ឆ្ងាយ​ពី​គោលការណ៍​រួម​របស់​អាស៊ាន​នោះទេ ហើយ​ធម្មនុញ្ញា​អាស៊ាន​ចែងថា អាស៊ាន​មិន​ជ្រៀតជ្រែក​កិច្ចការ​ផ្ទៃក្នុង​របស់​ប្រទេស​សមាជិក​អាស៊ាន​។ ជា​សមាជិក​អាស៊ាន មេដឹកនាំ​ប្រទេស​មីយ៉ាន់ម៉ា​នេះ​ត្រូវតែ​មាន​សិទ្ធិ​ចូលរួម​ប្រជុំ​នានា​របស់​អាស៊ាន​។

លោកនាយក​រដ្ឋមន្ត្រី​បន្តថា​ការយក​រូបមន្ត​របស់​អង្គការ​សហប្រជាជាតិ (​អសប​) មក​ដាក់​ក្នុង​រូបមន្ត​របស់​អាស៊ាន​គឺ​មិន​ត្រឹមត្រូវ​នោះទេ​ ព្រោះ​នៅ អសប មាន​គណៈកម្មការ​ពិនិត្យ​សារតាំង​ចំណែក​នៅ​អាស៊ាន​មិនមាន​គណៈកម្មការ​នេះ​តែបើ​មាន​កិច្ចប្រជុំ​នានា​របស់​អាស៊ាន​គឺ​សមាជិក​អាស៊ាន​ត្រូវតែ​អញ្ជើញ​ឱ្យ​ចូលរួម​កិច្ចប្រជុំ​ទាំងអស់​គ្នា​។

លោក​បញ្ជាក់ថា​៖ «​បើ​ថ្នាក់​រដ្ឋមន្ត្រី​ហៅ​រដ្ឋមន្ត្រី បើ​ថ្នាក់​កំពូល​ហៅ​កំពូល​។ វា​ត្រូវ​អ៊ីចឹង​»​។

លោក​ថ្លែងថា​៖ «​អង្គការ​សហប្រជាជាតិ​ផ្សឹង​។ រចនាសម្ព័ន្ធ​អង្គការ​សហប្រជាជាតិ​មិនមែន​ជា​រចនាសម្ព័ន្ធ​របស់​អាស៊ាន​។ មិនត្រូវ​យក​ម៉ូដែល​របស់​អង្គការ​សហប្រជាជាតិ​មក​ដាក់ [​ក្នុង​អាស៊ាន​] ហើយ​មានតែ​វិធី​តែ​ ១ ​គត់​គឺ​ធ្វើការ​ជាមួយ​អ្នក​កាន់អំណាច​»​។

កិច្ចប្រជុំ​កំពូល​អាស៊ាន​លើក​ទី​ ៣៨ និង ៣៩ និង​កិច្ចប្រជុំ​កំពូល​ពាក់ព័ន្ធ​កាលពី​ខែតុលា​កន្លងទៅ ដែល​ប្រទេស​ប្រ៊ុយណេ​ធ្វើជា​ម្ចាស់ផ្ទះ​តាម​ប្រព័ន្ធ​វីដេអូ​បាន​ប្រព្រឹត្ត​ទៅ​ដោយ​មិនមាន​វត្តមាន​របស់​មេដឹកនាំ​យោធា​មីយ៉ាន់ម៉ា​។

លោក ហ៊ុន សែន ថ្លែងថា​៖ «​ពេលនេះ​ជា​ពេល​ពង្រឹង​អាស៊ាន​ឡើងវិញ​។ ពី​អាស៊ាន​ ១០ ទៅ​អាស៊ាន​ ៩​។ ឥឡូវ​ត្រូវ​វិលត្រឡប់​ទៅ​ ១០ ​វិញ​។ ខាង​មីយ៉ាន់ម៉ា មានបាន​ប្រកាស​ផ្តាច់ខ្លួន​ចេញពី​អាស៊ាន​ពី​អង្កាល់​? អត់​ផង​! ឯ​ក្នុង​ធម្មនុញ្ញ​អាស៊ាន​អត់​មាន​នរណា​មាន​សិទ្ធិ​ដេញ​សមាជិក​ចេញ​ទេ​។ ស្អែក​នេះ ខ្ញុំ​ចង់​ស្តាប់​រដ្ឋមន្ត្រី​ការបរទេស [​មីយ៉ាន់ម៉ា​] ដោយផ្ទាល់​»​។

លោក​ថ្លែង​ថា មីយ៉ាន់ម៉ា​ក៏​នៅតែ​ពង្រឹង​សាមគ្គីភាព​ក្នុង​អាស៊ាន​ហើយ​លោក​ចោទ​សួរថា​តើ​ត្រូវ​មាន​អាស៊ាន​ ៩ ​ប្រទេស ឬ​ ១០ ​ប្រទេស​ក្នុង​ការចូលរួម​កិច្ចប្រជុំ​នានា​របស់​អាស៊ាន​ ខណៈ​កិច្ចប្រជុំ​កន្លងទៅ​ប្រព្រឹត្ត​ទៅ​មាន​សមាជិក​អាស៊ាន​ចំនួន​ ៩ ​ប្រទេស​ដែល​បាន​ចូលរួម​។ សូម្បីតែ​ចិន​ក៏បាន​អញ្ជើញ​ថ្នាក់ដឹកនាំ​មីយ៉ាន់ម៉ា​ឱ្យ​ចូលរួម​កិច្ចប្រជុំ​របស់ខ្លួន​ផងដែរ​។

លោក ហ៊ុន សែន អះអាង​ថា ការដែល​កម្ពុជា​អញ្ជើញ​រដ្ឋមន្ត្រី​ការបរទេស​មីយ៉ាន់ម៉ា​មក​បំពេញ​ទស្សនកិច្ច​នៅ​កម្ពុជា​ ហើយ​ជួប​ជាមួយ​លោក ដោយសារ​កម្ពុជា​គឺជា​រដ្ឋអធិបតេយ្យ​ដែលមាន​សិទ្ធិ​នឹងធ្វើ​កិច្ចការ​ទាក់ទង​នឹង​ទំនាក់ទំនង​ទ្វេភាគី​ផង ហើយក៏​ស្វែងយល់​អំពី​ចំណុច​ដែល​ត្រូវ​ឈាន​ទៅមុខ​ក្នុង​ក្របខ័ណ្ឌ​ ៥ ​ចំណុច​ដែល​បាន​ព្រមព្រៀង (​កុងសង់ស៊ីស​) ដែល​មេដឹកនាំ​អាស៊ាន​បាន​ឯកភាពគ្នា​ទាក់ទង​ស្ថានភាព​នៅ​មីយ៉ាន់ម៉ា​នៅក្នុង​កិច្ចប្រជុំ​ពិសេស​របស់​មេដឹកនាំ​អាស៊ាន​កាលពី​ថ្ងៃទី​ ២៤ ខែមេសា ឆ្នាំ​ ២០២១​។

គួរ​បញ្ជាក់ថា ចំណុច​ទាំង​ ៥ នៃ​កុងសង់ស៊ីស​រួមមាន ការបញ្ឈប់​ជាបន្ទាន់​នូវ​អំពើហិង្សា​ក្នុងប្រទេស​មីយ៉ាន់ម៉ា​ការ​ចាប់ផ្តើម​ឱ្យមាន​កិច្ចសន្ទនា​ក្នុង​ន័យ​ស្ថាបនា​ក្នុងចំណោម​ភាគី​ពាក់ព័ន្ធ បេសកជន​ពិសេស​របស់​ប្រធាន​អាស៊ាន​នឹង​សម្របសម្រួល​នៃ​ដំណើរការ​កិច្ចសន្ទនា អាស៊ាន​នឹង​ផ្តល់​ជំនួយ​មនុស្សធម៌ និង​បេសកជន​ពិសេស និង​គណៈប្រតិភូ​នឹង​ទៅ​បំពេញ​ទស្សនកិច្ច​នៅ​មីយ៉ាន់ម៉ា​ដើម្បី​ជួប​ជាមួយ​គ្រប់ភាគី​ពាក់ព័ន្ធ​។

លោក ថុង ម៉េងដាវិត អ្នកសិក្សា​ស្រាវជ្រាវ​នៅ​មជ្ឈមណ្ឌល​មេគង្គ​ សម្រាប់​ការសិក្សា​យុទ្ធសាស្ត្រ​នៃ​វិទ្យាស្ថាន​ចក្ខុវិស័យ​អាស៊ី ប្រាប់​ភ្នំពេញ​ប៉ុស្តិ៍​កាលពី​ថ្ងៃទី​ ៦ ខែធ្នូ ថា ការបរាជ័យ​របស់​ប្រ៊ុយណេ​ក្នុង​ការជំរុញ​ឱ្យ​មីយ៉ាន់ម៉ា​ទទួលយក​ចំណុច​ឯកច្ឆន្ទ​ទាំង​ ៥ ​របស់​អាស៊ាន​បាន​ឆ្លុះបញ្ចាំង​អំពី​ភាពរឹងទទឹង​របស់​រដ្ឋាភិបាល​យោធា​ដែល​បាន​កាន់អំណាច​តាំងពី​ខែកុម្ភៈ​មក​។

លោក​បន្តថា​៖ «​ជំនួប​រវាង​ប្រមុខ​ដឹកនាំ​កម្ពុជា​ជាមួយ​នឹង​រដ្ឋមន្ត្រី​ការបរទេស​មីយ៉ាន់ម៉ា​នឹង​ជំរុញ​ និង​ពង្រឹង​បន្ថែមទៀត​ក្នុង​ទំនាក់ទំនង​ការទូត​រវាង​ប្រទេស​ទាំង​ ២ និង​ផ្អែកលើ​បទពិសោធ​របស់​សម្តេចតេជោ​នាយករដ្ឋមន្ត្រី​ក្នុង​ការដឹកនាំ​កម្ពុជា​ឆ្ពោះទៅកាន់​សុខសន្តិភាព​ពេញលេញ ដោយ​សង្ឃឹម​ថា កម្ពុជា​នឹង​អាចជួយ​មីយ៉ាន់ម៉ា​ក្នុង​ការដោះស្រាយ​វិបត្តិ​នយោបាយ​របស់ខ្លួន​បាន​»​។

លោក​បន្ត​ថា កម្ពុជា​នឹងធ្វើ​ជា​ម្ចាស់ផ្ទះ​ឆ្នាំក្រោយ កម្ពុជា​នឹង​ដើរតួនាទី​សំខាន់​ក្នុង​ការស្វះ​ស្វែងរក​ជំនួយ​សម្រាប់​មនុស្សធម៌ សេដ្ឋកិច្ច-សង្គម និង​ប្រជាជន​មីយ៉ាន់ម៉ា​ដោយ​ផ្អែកលើ​គោលការណ៍​មិន​លូកដៃ​ចូល​ផ្ទៃក្នុង និង​អព្យាក្រឹត និង​ដើម្បី​ប្រយោជន៍​ប្រជាជាតិ​អាស៊ាន​។

លោក​ថា​៖ «​កម្ពុជា​មិន​ចង់ឱ្យ​មាន​ការបែកបាក់​ផ្ទៃក្នុង​ ឬ​​អាស៊ាន​ ៩ ឡើយ ដោយ​សម្តេច​តេជោ​ចង់​ឱ្យ​មាន​អាស៊ាន​ទាំង ១០ ចូលរួម​ប្រជុំ​នៅ​ឆ្នាំក្រោយ ដែល​នេះ​ក៏​ជា​សមិទ្ធផល​ដ៏ធំ​មួយ​របស់​កម្ពុជា​ផងដែរ​»៕

អត្ថបទគួរចាប់អារម្មណ៍

  • ភ្នំពេញៈ ក្រុមហ៊ុន Longfruiter Anlong Veng Oddor Meanchey Agriculture Park Co., Ltd បាន​បញ្ចេញ​ប្រាក់​វិនិយោគ ៥១ ​លាន​ដុល្លារ​ទៅលើ​ការដាំ​ដំណាំ​ចេក និង​ដំណាំ​ហូប​ផ្លែ​មួយចំនួន​នៅក្នុង​ស្រុក​អន្លង់វែង ខេត្ត​ឧត្តរមានជ័យ ដើម្បី​ជំរុញ​ការនាំចេញ ពិសេស​ទៅ​ទីផ្សារ​ប្រទេស​ចិន​។

  • ភ្នំពេញៈ មូលនិធិ​កម្ពុជា​ប្រឆាំង​កូវីដ​ ១៩ បន្ត​អំពាវនាវ​ដល់​សប្បុរជន​ឱ្យ​ចូលរួម​បរិច្ចាគ​ធនធាន ដើម្បី​រួមចំណែក​ក្នុងការ​ឧបត្ថម្ភ​ទ្រទ្រង់​ដល់​ពលរដ្ឋ​ដែល​កំពុង​ជួប​ការលំបាក និង​ក្រុមគ្រូពេទ្យ​អាវស អំឡុងពេល​ប្រយុទ្ធប្រឆាំង​ជំងឺ​កូវីដ ខណៈ​មូលនិធិ​នេះ​បាន​ជួយ​ដល់​ពលរដ្ឋ​ជាង ១ ​ម៉ឺន​គ្រួសារ តាមរយៈ​ការផ្តល់​ជា​គ្រឿង​បរិភោគ និង​កញ្ចប់​ថ្នាំ​ជាដើម​។

  • ភ្នំពេញៈ ​ជន​ជាប់ឃុំ​នៅតាម​ពន្ធនាគារ និង​មណ្ឌល​អប់រំ​កែប្រែ​រាជធានី​-​ខេត្ដ​ជាង ២ ​ពាន់​នាក់​បាន​ចាក់​វ៉ាក់សាំង​បង្ការ​ជំងឺ​កូវីដ​ ១៩ ​ដូស​ទី​ ៣ និង​កំពុង​បន្ត​ចាក់​ដូស​ជំរុញ​នេះ​បន្ថែមទៀត ខណៈ​ជន​ជាប់ឃុំ​សរុប​ប្រមាណ ៣៨ ០០០ ​នាក់​បាន​ចាក់​ ២​ ដូស​រួចហើយ​។

  • ភ្នំពេញៈ ​សាកលវិទ្យាល័យ និង​គ្រឹះស្ថាន​អប់រំ កម្រិត​ឧត្ដមសិក្សា​សាធារណៈ និង​ឯកជន​ប្រមាណ​ ២០ នៅ​ថ្ងៃទី​ ២៩ ខែមករា ខាងមុខនេះ​នឹង​រៀបចំ «​ពិព័រណ៍​ជំនាញ និង​សាកលវិទ្យាល័យ​» ​តាម​អន​ឡាញ​ដើម្បីឱ្យ​វាគ្មិន​ជំនាញ​ចែករំលែក​ចំណេះដឹង បទពិសោធ ដល់​និស្សិត​លើ​ការជ្រើសរើស​មុខជំនាញ​សិក្សា និង​សាកលវិទ្យាល័យ​សិក្សា​នៅក្នុង​ប្រទេស​កម្ពុជា​។

  • ភ្នំពេញៈ ជប៉ុន​បាន​ផ្ដល់​រថយន្ត​ពន្លត់​អគ្គិភ័យ​ចំនួន​ ៤ ​គ្រឿង​ដល់​អង្គភាព​ការិយាល័យ​នគរបាល​បង្ការ ពន្លត់​អគ្គិភ័យ និង​សង្គ្រោះ​នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​ចូលរួមចំណែក​ធ្វើឱ្យ​ប្រសើ​ឡើង​នូវ​ប្រសិទ្ធភាព​ការងារ​ឆ្លើយតប និង​ការ​កាត់បន្ថយ​នូវ​ហានិភ័យ​នានា ដែល​បង្កឡើង​ដោយ​គ្រោះ​អគ្គិភ័យ​នៅ​កម្ពុជា ពិសេស​ក្នុង​រាជធានី​ភ្នំពេញ​។

  • ភ្នំពេញៈ ​សាជីវកម្ម​ធានាឥណទាន​កម្ពុជា (CGCC) និង​មជ្ឈមណ្ឌល​បច្ចេកវិទ្យា និង​ព័ត៌មាន​ជីវឧស្ម័ន (BTIC) នៅ​ថ្ងៃទី​ ២៤ ខែមករា បាន​ចុះ​អនុស្សរណៈ​ជាមួយ​គ្នា ដើម្បី​លើកកម្ពស់​បរិយាកាស​អំណោយផល​ដល់​ការវិនិយោគ​លើ​បច្ចេកវិទ្យា​ជីវឧស្ម័ន​ខ្នាត​ធំ​នៅ​កម្ពុជា​ដើម្បី​រួមចំណែក​កាត់​បន្ថយ​ការប្រែប្រួល​អាកាសធាតុ​។ នេះ​បើតាម​សេចក្ដី​ប្រកាស​ព័ត៌មាន​។