ស្វាយរៀងៈ នគរបាលស្រុកចន្ទ្រា បញ្ជូនបុរសម្នាក់ទៅស្នងការដ្ឋាននគរបាលខេត្តស្វាយរៀង នៅថ្ងៃទី ៦ ធ្នូ ករណី រឹតក សម្លាប់ប្រពន្ធខ្លួនឯង ប្រព្រឹត្តនៅភូមិសែនត ឃុំ-ស្រុកចន្ទ្រា ខេត្តស្វាយរៀង កាលពីយប់ថ្ងៃទី ៤ ធ្នូ ឆ្នាំ ២០២១។
លោក ជិន សុភឿន អធិការនគរបាលស្រុកចន្ទ្រា ឱ្យដឹងនៅរសៀលថ្ងៃទី ៦ ធ្នូ ថា ជនសង្ស័យឈ្មោះ នេត រ៉ា អាយុ ៤៤ ឆ្នាំ រីឯស្ត្រីរងគ្រោះឈ្មោះ សោ សុខី អាយុ ៤៣ ឆ្នាំ។ ពួកគេមានកូនប្រុសស្រី ២ នាក់ រស់នៅក្នុងភូមិសែនត ឃុំ-ស្រុកចន្ទ្រា ខេត្តស្វាយរៀង។ ជនសង្ស័យត្រូវបានសមត្ថកិច្ចរបស់លោក កសាងសំណុំរឿងបញ្ជូនទៅស្នងការដ្ឋាននគរបាលខេត្តស្វាយរៀងនៅថ្ងៃទី ៦ ធ្នូ ដើម្បីចាត់ការបន្តតាមច្បាប់។ ជនសង្ស័យបានបង្កបទល្មើសសម្លាប់ប្រពន្ធរបស់ខ្លួន។
លោកថ្លែងថា៖ «សម្រាប់ខ្ញុំជានគរបាលយុត្តិធម៌មានសិទ្ធិធ្វើកំណត់ហេតុទៅតាមអ្វី ដែលជាចម្លើយរបស់ជនសង្ស័យ និងសាក្សី។ អ្វីជាការងារបន្ទាប់ គឺយើង បញ្ជូនជនសង្ស័យទៅខាងមន្ត្រីជំនាញខេត្តដើម្បីសាកសួរបន្ត»។
លោកហាស់ ស៊ីយ៉េត នាយនគរបាលប៉ុស្តិ៍ឃុំចន្ទ្រា និយាយនៅរសៀលថ្ងៃទី ៦ ធ្នូ ថា មុនកើតហេតុនៅវេលាព្រលប់ ម៉ោងជាង ៦ ថ្ងៃទី ៤ ធ្នូ ស្ត្រីរងគ្រោះទើបត្រឡប់មកពីធ្វើការរោងចក្រកាត់ដេរ។ ពេលនោះស្រាប់តែជនសង្ស័យជាប្តីបានទះក្បាលស្ត្រីរងគ្រោះ ១ ដៃហើយបានចាប់ទាញកអាវទៅក្រោយបណ្តាលឱ្យរឹតកដួលសន្លប់តែម្តង។
លោកបន្តថា ភ្លាមៗនោះ ក្មេងស្រីអាយុ ១៤ ឆ្នាំម្នាក់ ដែលជាកូនរបស់ស្ត្រីរងគ្រោះបានរត់ទៅហៅអ្នកជិតខាង និងជីតា (ឪពុកបង្កើតស្ត្រីរងគ្រោះ) ឱ្យមកជួយម្តាយខ្លួន។ ពេលទៅដល់ឪពុកស្ត្រីរងគ្រោះបានទូរស័ព្ទរាយការណ៍ប្រាប់លោក ដើម្បីចុះទៅធ្វើអន្តរាគមន៍បន្ទាន់ ហើយលោកក៏បានទៅដល់ទីតាំងកើតហេតុប្រមាណជា ១០ នាទីក្រោយ។
លោកបញ្ជាក់ថា ស្ត្រីរងគ្រោះត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យកម្ពុជា-វៀតណាមទួលស្តីស្ថិតក្នុងឃុំទួលស្តី ស្រុកចន្ទ្រា ប៉ុន្តែត្រូវក្រុមគ្រូពេទ្យប្រាប់ថា ជនរងគ្រោះបានដាច់ខ្យល់ស្លាប់បាត់ហើយ។ ចំណែកជនសង្ស័យវិញត្រូវបានសមត្ថកិច្ចរបស់លោកចាប់មកសាកសួរនៅប៉ុស្តិ៍នគរបាលឃុំចន្ទ្រា។ ប៉ុន្តែជនសង្ស័យមិនបាននិយាយអ្វីទេ ព្រោះស្រវឹងស្រាបាត់បង់ស្មារតីទៅហើយ។
លោកនាយប៉ុស្តិ៍បានបញ្ជាក់ថា៖ «ប៉ុន្តែពេលខ្ញុំបញ្ជូនជនសង្ស័យទៅដល់អធិការដ្ឋាននគរបាលស្រុកទើបជនសង្ស័យឆ្លើយថា ខ្លួនគេពិតជាបានទះក្បាលស្ត្រីរងគ្រោះ ១ ដៃ ហើយចាប់កអាវ ទាញទៅក្រោយមែន»។
ភ្នំពេញប៉ុស្តិ៍បានទាក់ទងតាមទូរស័ព្ទទៅលោក គឹម ឡៃ នាយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តស្វាយរៀង នាថ្ងៃទី ៦ ធ្នូ ប៉ុន្តែលោកមិនលើកទទួលទូរស័ព្ទ៕