.jpg)
រដ្ឋមន្ត្រីធនធានទឹកលោកលឹម គានហោ ពេលចូលរួមប្រជុំតាមវីដេអូក្នុងវេទិកាកិច្ចសហប្រតិបត្តិការធនធានទឹក ឡានឆាង-មេគង្គ លើកទី ២ នាថ្ងៃទី ៧-៨ ធ្នូ។ រូបថត MWRM page
ភ្នំពេញៈ កំណើនប្រជាជន ការកើនឡើងនូវតម្រូវការសន្តិសុខទឹក ស្បៀងអាហារ និងថាមពលពីបណ្តាប្រទេសតាមដងទន្លេ និងការអភិវឌ្ឍយ៉ាងឆាប់រហ័សគួបផ្សំនឹងផលប៉ះពាល់នៃការប្រែប្រួលអាកាសធាតុ កំពុងដាក់សម្ពាធមកលើធនធាន និងនិរន្តរភាពទន្លេ ដែលទាមទារឱ្យប្រទេសនៅតាមដងទន្លេទាំងអស់ពង្រឹងកិច្ចសហប្រតិបត្តិការ គ្រប់គ្រង និងការអភិវឌ្ឍ ប្រកបដោយចីរភាព។ នេះបើតាមរដ្ឋមន្ត្រីធនធានទឹក។
រដ្ឋមន្ត្រីក្រសួងធនធានទឹក និងឧត្តុនិយម លោកលឹម គានហោ បានថ្លែងបែបនេះ កាលពីថ្ងៃទី ៧ ខែធ្នូ តាមប្រព័ន្ធវីដេអូហ្សូម ពេលចូលរួមក្នុងវេទិកាកិច្ចសហប្រតិបត្តិការធនធានទឹក ឡានឆាង-មេគង្គ លើកទី២ ក្រោមប្រធានបទ «ធ្វើការរួមគ្នាដើម្បីដោះស្រាយបញ្ហាប្រឈម និងជំរុញការអភិវឌ្ឍរួម» ដែលប្រព្រឹត្តទៅរយៈពេល ២ថ្ងៃ គឺនៅថ្ងៃទី ៧-៨ ខែធ្នូនេះ តបតាមការអញ្ជើញរបស់លោក Li Guoying រដ្ឋមន្រ្តីក្រសួងធនធានទឹកនៃសាធារណរដ្ឋប្រជាមានិតចិន។
លោកថ្លែងថា សារៈសំខាន់នៃទន្លេមេគង្គ-ឡានឆាង ដែលផ្តល់នូវធនធានទឹក និងធនធានពាក់ព័ន្ធ សម្រាប់ជួយជំរុញដល់កិច្ចអភិវឌ្ឍសេដ្ឋកិច្ច និងសង្គមសម្រាប់បណ្តាប្រទេសតាមដងទន្លេ ក៏ដូចជាទ្រទ្រង់ដល់ជីវភាពរស់នៅ និងសុខុមាលភាពនៃប្រជាជនក្នុងអាងទាំងមូល។
លោកសង្កត់ធ្ងន់ថា៖ «ដោយសារតែបញ្ហាប្រឈម រួមមាន កំណើនប្រជាជន ការកើនឡើងនូវតម្រូវការសម្រាប់សន្តិសុខទឹក ស្បៀងអាហារ និងថាមពល នៅក្នុងបណ្តាប្រទេសតាមដងទន្លេ និងការអភិវឌ្ឍយ៉ាងឆាប់រហ័សនៅក្នុងអាង គួបផ្សំនឹងផលប៉ះពាល់ និងហានិភ័យនៃការប្រែប្រួលអាកាសធាតុដែលកើតឡើងបាននិងកំពុងដាក់សម្ពាធមកលើធនធាន និងនិរន្តរភាពទន្លេ»។
លោកបន្តថា កត្ដានេះ ជាទំនួលខុសត្រូវរួមរបស់ប្រទេសតាមដងទន្លេទាំងអស់ ដែលចាំបាច់ត្រូវពង្រឹងកិច្ចសហប្រតិបត្តិការតំបន់និងត្រូវធ្វើការរួមគ្នា ឆ្ពោះទៅសម្រេចបាននូវលទ្ធផលប្រកបដោយនិរន្តរភាពនៅក្នុងបរិបទធានាបាននូវសន្តិសុខទឹក ដើម្បីគាំទ្រដល់ការគ្រប់គ្រង និងការអភិវឌ្ឍប្រកបដោយចីរភាពនៅក្នុងតំបន់មេគង្គ-ឡានឆាង។
លោកលឹម គានហោ បានវាយតម្លៃខ្ពស់ចំពោះវឌ្ឍនភាព និងសមិទ្ធផលសំខាន់ៗដែលសម្រេចបានរហូតមកទល់ពេលនេះក្នុងក្របខ័ណ្ឌកិច្ចសហប្រតិបត្តិការឡានឆាង-មេគង្គ ដោយបានរួមចំណែកជួយបណ្តាប្រទេសតាមដងទន្លេក្នុងការអភិវឌ្ឍសេដ្ឋកិច្ចសង្គមប្រកបដោយចីរភាព និងបានជួយនាំមកនូវវិបុលភាពក្នុងតំបន់ប្រកបដោយផលិតភាព និងលទ្ធផលជាក់ស្តែង ក្នុងនោះក៏រួមទាំងកិច្ចសហប្រតិបត្តិការធនធានទឹកផងដែរ។
លោកបានបង្ហាញនូវការប្តេជ្ញាចិត្ត និងការត្រៀមខ្លួនរបស់កម្ពុជា ដើម្បីបន្តធ្វើការកាន់តែជិតស្និទ្ធក្នុងស្មារតីនៃការទទួលខុសត្រូវរួមគ្នាឆ្ពោះទៅរកការសម្រេចបាននូវវិបុលភាពរួមគ្នា ជាមួយនឹងកំណើនប្រកបដោយបរិយាប័ន្ន និងអនាគតប្រកបដោយចីរភាពសម្រាប់ប្រទេសតាមដងទន្លេនីមួយៗ និងសម្រាប់តំបន់ឡានឆាង-មេគង្គទាំងមូលរួមគ្នា។
តាមរយៈកិច្ចសហប្រតិបត្តិការធនធានទឹក ឡានឆាង-មេគង្គនេះ កាលពីថ្ងៃទី ២៥-២៦ ខែវិច្ឆិកា ឆ្នាំ ២០២១ មន្រ្ដីរបស់កម្ពុជា២រូប នៃក្រសួងបរិស្ថាន និងក្រសួងរ៉ែ និងថាមពល ក៏បានចូលរួមកម្មវិធីប្រកួតប្រជែងចិន អាស៊ាន ស្តីពី សុវត្ថិភាព ទំនប់ទឹក (China-ASEAN Science Popularization Contest Focuses on Dam Safety) តាមប្រព័ន្ធវីដេអូហ្សូមផងដែរ។
កម្មវិធីប្រកួតប្រជែងស្តីពីសុវត្ថិភាពទំនប់ទឹកនេះ លោក ប៊ុន វិចិត្រ មន្ត្រី នៃក្រសួងរ៉ែ និងថាមពល បានធ្វើបទបង្ហាញអំពី ទំនប់ វារីអគ្គីសនី សេសាន ក្រោម២ និងលោកហួ ថានិត មន្ត្រីនៃក្រសួងបរិស្ថាន បានធ្វើបទបង្ហាញ អំពីអត្ថប្រយោជន៍នៃអាងត្រពាំងថ្ម ស្ថិតក្នុងភូមិសាស្ត្រខេត្តបន្ទាយមានជ័យក្នុងការការពារបរិស្ថាន សេដ្ឋកិច្ចនិងសង្គម។
លោកហួ ថានិត ថ្លែងថា៖ «តាមរយៈកម្មវិធីនេះបានកសាងទំនាក់ទំនង និងសមត្ថភាពយុវជនយើងលើការសិក្សា ពីការគ្រប់គ្រង និងការរក្សាទឹកប្រកបដោយសុវត្ថិភាពខ្ពស់រវាងសាធារណរដ្ឋប្រជាមានិតចិន និងប្រទេសសមាជិកអាស៊ាន»៕
