.jpg)
ក្រុមសមត្ថកិច្ចពេលចុះរៀបចំសណ្ដាប់ធ្នាប់ចរាចរណ៍នៅតាមកំណាត់ផ្លូវលេខ ២៧១ កាលពីថ្ងៃទី ៦ ធ្នូ ។ រូបថត ប៉ូលិស
ភ្នំពេញៈនគរបាលសណ្តាប់ធ្នាប់នៃស្នងការដ្ឋាននគរបាលរាជធានីភ្នំពេញកាលពីថ្ងៃទី ៦ ធ្នូបានចុះរៀបចំសណ្តាប់ធ្នាប់លើចិញ្ចើមផ្លូវលេខ ២៧១ ដែលតែងបង្កបញ្ហាដល់ការធ្វើចរាចរណ៍ចាប់ពីមុខមន្ទីរពេទ្យមិត្តភាពខ្មែរ-សូវៀតដល់ចំណុចខ្លោងទ្វារវត្តសន្សំកុសល ហើយឃាត់ម៉ូតូអ្នកជិះបញ្ច្រាសទិសបានចំនួន ១៣ គ្រឿងមកផាកពិន័យផងដែរ។
លោក អេម សម្បត្តិ នាយការិយាល័យនគរបាលសណ្តាប់ធ្នាប់នៃស្នងការដ្ឋាននគរបាលរាជធានីភ្នំពេញប្រាប់ភ្នំពេញប៉ុស្តិ៍នៅរសៀលថ្ងៃទី ៧ ធ្នូ ថា បញ្ហាកកស្ទះចរាចរណ៍ដែលបង្កឡើងដោយអ្នកលក់ដូរនៅលើចិញ្ចើមផ្លូវគឺបានបង្កការរំខានយ៉ាងខ្លាំងដល់អ្នកដំណើរ និងធ្វើឱ្យបាត់បង់សោភណភាពទីក្រុងទៀតផង។
លោកបានបន្តថា ដោយសារតែបញ្ហាទាំងអស់នេះទើបលោក ឃួង ស្រេង អភិបាលរាជធានីភ្នំពេញ និងលោក ស ថេត ស្នងការនគរបាលរាជធានីភ្នំពេញតម្រូវឱ្យកម្លាំងនគរបាលរបស់លោកចុះរៀបចំសណ្តាប់ធ្នាប់នៅលើកំណាត់ផ្លូវលេខ ២៧១ នេះ។
បើតាមលោក អេម សម្បត្តិ ការរៀបចំសណ្តាប់ធ្នាប់នៅលើដងផ្លូវលេខ ២៧១ ចាប់ពីមុខមន្ទីរពេទ្យមិត្តភាពខ្មែរ-សូវៀតរហូតដល់ខ្លោងទ្វារវត្តសន្សំកុសលនេះគឺសមត្ថកិច្ចរបស់លោកបានធ្វើរាប់ឆ្នាំមកហើយ។ ប៉ុន្តែប្រជាពលរដ្ឋដែលប្រកបរបរនៅតាមបណ្តោយកំណាត់ផ្លូវនេះមិនបានចូលរួមសហការជាមួយសមត្ថកិច្ចទេពោលគឺនៅតែដាក់លក់ដូរទំនិញលើទ្រូងផ្លូវបង្កជាបញ្ហាដល់ការធ្វើចរាចរណ៍ដដែល។
លោកថ្លែងថា៖ «ប្រជាជនយើងចូលចិត្តតែធ្វើអីឱ្យក្តៅ តែបើធ្វើល្មមៗគឺគាត់មិនស្តាប់យើងទេ តែបើយើងធ្វើក្តៅទៅក៏មានការរិះគន់ថាយើងធ្វើបាបអ្នកក្រីក្រ។អ៊ីចឹងការរៀបចំសណ្តាប់ធ្នាប់នេះគឺពិបាកណាស់»។
លោក សម្បត្តិ បន្តថា នៅតាមបណ្តោយកំណាត់ផ្លូវម្តុំខ្លោងទ្វារវត្តសន្សំកុសលដែលពីមុនមានការដាក់លក់គ្មានសណ្តាប់ធ្នាប់ពិសេសអ្នកធ្វើរទេះដែកលក់នោះ ពេលនេះមានសណ្តាប់ធ្នាប់ល្អប្រសើរហើយ ដោយសារអ្នកលក់ដូរទំនិញចូលរួមសហការជាមួយសមត្ថកិច្ច។
លោកបានបញ្ជាក់ថា ក្រោយពីសមត្ថកិច្ចចុះណែនាំដល់អ្នកលក់ដូរទំនិញនៅតាមបណ្តោយផ្លូវលេខ ២៧១ តាំងពីថ្ងៃទី ៦ ធ្នូ មកឃើញថា ពួកគាត់បានយល់ដឹងខ្លះ «ប៉ុន្តែសមត្ថកិច្ចរបស់ខ្ញុំនៅតែដាក់កម្លាំងចាំឃ្លាំមើលជាប្រចាំដើម្បីកែទម្លាប់ និងជំរុញឱ្យអ្នកលក់ដូរលើចញ្ចើមផ្លូវលេខ ២៧១ ចេះភ្ញាក់រឭកដោយខ្លួនឯង»។
ទោះជាយ៉ាងណា លោកថា៖«ការកកស្ទះចរាចរណ៍វាមិនងាយមានគ្រោះថ្នាក់ទេ តែបើផ្លូវស្ងាត់គ្មានអ្នកជិះច្រើនគឺគ្រោះថ្នាក់ ព្រោះអាងតែផ្លូវស្ងាត់គ្មានអី។ ប៉ុន្តែបើនៅកន្លែងចង្អៀតដោយសារការលក់លើចិញ្ចើមផ្លូវនេះគឺអ្នកលក់ដូរលើទ្រូងផ្លូវទេ ដែលគ្រោះថ្នាក់ ព្រោះអ្នកបើកបរម៉ូតូឬរថយន្តគេចចុះគេចឡើងបុកតែអ្នកលក់»។
លោកបញ្ជាក់ទៀតថាបញ្ហាលក់ដូរលើចិញ្ចើមផ្លូវគឺជាផលលំបាកមួយហើយ ប៉ុន្តែការជិះម៉ូតូឬរថយន្តបញ្ច្រាសទិសនេះគឺបានបង្កបញ្ហាមួយទៀតនៅមុខមន្ទីរពេទ្យមិត្តភាពខ្មែរ-សូវៀត បើទោះជាសមត្ថកិច្ចដាក់ស្លាកសញ្ញាហាមមិនឱ្យជិះបញ្ច្រាសក្តី ក៏អ្នកធ្វើដំណើរមួយចំនួនមិនព្រមយកចិត្តទុកដាក់ដែរ។
លោកថា ដោយសារតែហេតុនេះហើយទើបនៅថ្ងៃទី ៦ ធ្នូ កន្លងមកនេះ កម្លាំងសមត្ថកិច្ចរបស់លោកឃាត់បានម៉ូតូចំនួន ១៣ គ្រឿងដែលជិះបញ្ច្រាសទិសនៅចំណុចមុខមន្ទីរពេទ្យមិត្តភាពខ្មែរ-សូវៀត ហើយបានផាកពិន័យដល់ម្ចាស់ម៉ូតូទាំងនោះទៅតាមច្បាប់ចរាចរណ៍ផ្លូវគោក៕
