ភ្នំពេញៈ អង្គការអន្តរជាតិនានា និងតំណាងក្រសួងអប់រំបានប្រារព្ធទិវាអន្តរជាតិអ្នកស្ម័គ្រចិត្ត ក្រោមប្រធានបទ «ស្ម័គ្រចិត្តឥឡូវនេះ ដើម្បីអនាគតរួមរបស់ពួកយើង» ដើម្បីជំរុញឱ្យយុវជនបានកសាងទំនាក់ទំនងកាន់តែរឹងមាំ ជាមួយមិត្តភក្តិ លោកគ្រូអ្នកគ្រូ សហគមន៍ និងជាមួយអាជ្ញាធរមូលដ្ឋាន ហើយការងារស្ម័គ្រចិត្តនេះក៏បានធ្វើឱ្យយុវជនជឿជាក់លើខ្លួនឯងផងដែរ។ យោងតាមលោក Robert Gillen តំណាងអង្គការទស្សនៈពិភពលោកកម្ពុជា ផ្នែកយុទ្ធសាស្ត្រ គុណភាពកម្មវិធី និងអភិវឌ្ឍធនធាន។
លោក Robert Gillen បានថ្លែងថា ទិវាអន្តរជាតិអ្នកស្ម័គ្រចិត្ត ក្រោមប្រធានបទ «ស្ម័គ្រចិត្តឥឡូវនេះ ដើម្បីអនាគតរួមរបស់ពួកយើង» បានរៀបចំឡើងដោយអង្គការទស្សនៈពិភពលោក អង្គការវីអេសអូកម្ពុជា គណៈកម្មាធិការសហប្រតិបត្តិការ ដើម្បីកម្ពុជា ភ្នាក់ងារភីសខ័រសហរដ្ឋអាមេរិក និងអង្គការឌីវីវីអន្តរជាតិក្នុងភាពជាដៃគូជាមួយនាយកដ្ឋានគ្រប់គ្រងមជ្ឈមណ្ឌលនៃក្រសួងអប់រំ យុវជន និងកីឡាបានអនុវត្តកម្មវិធី «ការស្ម័គ្រចិត្តដើម្បីសហគមន៍ខ្ញុំ» នៅ ២៥ រាជធានីខេត្តដោយមានយុវជនស្ម័គ្រចិត្តចំនួន ៣៥៥ នាក់ចូលរួម។
ថ្ងៃទី ៥ ខែធ្នូ ជារៀងរាល់ឆ្នាំត្រូវបានមហាសន្និបាតអង្គការសហប្រជាតិកំណត់យកជាទិវា «អន្តរជាតិអ្នកស្ម័គ្រចិត្ត»។
លោក Robert Gillen បានលើកឡើងតាមរយៈសេចក្តីប្រកាសព័ត៌មានរបស់អង្គការទស្សនៈពិភពលោកនៅថ្ងៃទី ៧ ខែធ្នូ ថា៖ «តាមរយៈការងារស្ម័គ្រចិត្តយុវជនបានកសាងទំនាក់ទំនងកាន់តែរឹងមាំជាមួយមិត្តភក្តិ លោកគ្រូអ្នកគ្រូរបស់ពួកគេ សហគមន៍ និង ជាមួយអាជ្ញាធរមូលដ្ឋាន»។
លោកបន្ថែមថា៖ «ការងារស្ម័គ្រចិត្តធ្វើឱ្យយុវជនជឿជាក់លើខ្លួនឯងធ្វើឱ្យប្រសើរឡើងនូវជំនាញដោះស្រាយបញ្ហាតាមរយៈបទពិសោធអនុវត្តគម្រោងដែលពួកគាត់បានដឹកនាំ។ ការងារស្ម័គ្រចិត្តក៏រួមចំណែកធ្វើឱ្យមានការផ្លាស់ប្តូរជាវិជ្ជមានសម្រាប់សហគមន៍ផងដែរពោលគឺតាមរយៈកម្មវិធីដែលដឹកនាំដោយយុវជន»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងក្នុងទិវានោះដែរថាជារៀងរាល់ថ្ងៃអ្នកស្ម័គ្រចិត្តជាយុវជនរាប់ពាន់នាក់កំពុងធ្វើការងារស្ម័គ្រចិត្ត ដើម្បីរួមចំណែកដល់សន្តិភាព និងការអភិវឌ្ឍក៏ដូចជា ធ្វើការដើម្បីសម្រេចគោលដៅអភិវឌ្ឍន៍ប្រកបដោយចីរភាព។
លោកថ្លែងថា៖ «ដោយបង្កើនភាពស្អិតល្មួត និងសាមគ្គីក្នុងរង្វង់សង្គមជាតិ ការស្ម័គ្រចិត្តពិតជាបានកសាងធនធានសង្គម ពីព្រោះការងារស្ម័គ្រចិត្តបានប្រែក្លាយពីសកម្មភាពបុគ្គលឱ្យទៅជាសកម្មភាពប្រមូលផ្តុំដែលជាការតម្រង់ទិសឆ្ពោះទៅបញ្ចប់ទុក្ខលំបាករបស់សង្គម»។
លោករដ្ឋមន្ត្រីបានបន្តថា ការស្ម័គ្រចិត្តធ្វើឱ្យសង្គមប្រមូលផ្តុំជាធ្លុងមួយ ដើម្បីរួមគ្នាអភិវឌ្ឍសហគមន៍ និងថែមទាំងផ្តល់ជាមធ្យោបាយសម្រាប់ឱ្យប្រជាជន បង្ហាញពីតម្លៃរបស់ពួកគាត់ និងបញ្ជាក់សាជាថ្មីថា ពួកគាត់មានចំណែកដ៏មានសារៈសំខាន់សម្រាប់សង្គម។
លោក ហង់ជួន ណារ៉ុន បានបញ្ជាក់ថា៖ «ការស្ម័គ្រចិត្តអាចកសាងតម្លៃខ្លួនឯង និងមានអារម្មណ៍ថាមានមោទនភាពពិតប្រាកដសម្រាប់រួមចំណែកបង្កើតពិភពលោកមួយដ៏ល្អប្រសើរ»។
លោកស្រី ហ៊ុន បូរមី តំណាងប្រចាំប្រទេសកម្ពុជា និងថៃនៃអង្គការវីអេសអូ (VSO) ក៏បានលើកឡើងដែរថាទិវាអន្តរជាតិអ្នកស្ម័គ្រចិត្តធ្វើឡើងក្នុងគោលបំណងជំរុញឱ្យគ្រប់ភាគីពាក់ព័ន្ធគាំទ្រ និងចូលរួមក្នុងសកម្មភាពស្ម័គ្រចិត្តប្រកបដោយការទទួលខុសត្រូវ។
លោកស្រីថា៖ «អ្នកស្ម័គ្រចិត្ត និងសហគមន៍មូលដ្ឋានត្រូវបានផ្តល់សិទ្ធិអំណាច និងធ្វើការរួមគ្នាក្នុងការដឹកនាំគម្រោងរបស់ពួកគេដែលគម្រោងទាំងនោះនឹងរួមចំណែកដល់ការអភិវឌ្ឍរបស់ប្រទេសជាតិក៏ដូចជាការអភិវឌ្ឍប្រកបដោយចីរភាព»។
យោងតាមលោកស្រី ហ៊ុន បូរមី បានឱ្យដឹងថា អង្គការវីអេសអូកម្ពុជាជឿជាក់ថាការស្ម័គ្រចិត្តប្រកបដោយទំនួលខុសត្រូវមានសារៈសំខាន់ចំពោះដំណើរការអភិវឌ្ឍន៍សហគមន៍ និងសង្គមជាតិឆ្ពោះទៅបង្កើតនូវសង្គមមួយដែលប្រកបដោយបរិយាប័ន្នភាពធន់ និងសុខសុវតិ្ថភាព។
លោកស្រីបានថ្លែងថា៖ «ក្នុងរយៈពេល ៣ ទសវត្សរ៍មកនេះអ្នកស្ម័គ្រចិត្តប្រមាណជាង ១ ពាន់នាក់បានរួមចំណែកធ្វើឱ្យការងាររបស់អង្គការទទួលបានជោគជ័យ។
អ្នកធ្វើការស្ម័គ្រចិត្តអង្គការវីអេសអូកម្ពុជាកញ្ញា ទុស ភក្តី បានប្រាប់ថា ការងារស្ម័គ្រចិត្តបានធ្វើឱ្យកញ្ញា និងអ្នកស្ម័គ្រចិត្តដទៃទៀតយល់ពីខ្លួនឯងកាន់តែច្បាស់ដោយសារតែការងារនេះបានធ្វើឱ្យកញ្ញាទទួលបានចំណេះដឹងជំនាញ និងយល់ពីគោលបំណងទៅអនាគតរបស់ខ្លួន។ ការងារស្ម័គ្រចិត្តក៏បានធ្វើឱ្យកញ្ញាក្លាយជាភ្នាក់ងារមួយក្នុងការដោះស្រាយបញ្ហាសង្គមផងដែរ។
កញ្ញាថា៖ «ខ្ញុំសូមសំណូមពរដល់រដ្ឋាភិបាលកម្ពុជា ម្ចាស់ជំនួយវិស័យឯកជន និងសង្គមស៊ីវិលបន្តទទួលស្គាល់វិនិយោគធ្វើការជាដៃគូជាមួយនិងគាំទ្រអ្នកស្ម័គ្រចិត្តគ្រប់លំដាប់ថ្នាក់ដើម្បីឱ្យពួកគាត់អាចបញ្ចេញសក្តានុពល និងធ្វើសកម្មភាពស្ម័គ្រចិត្តគំនិតផ្តួចផ្តើម និងគម្រោងសហគមន៍ ដើម្បីឆ្លើយតបទៅនឹងតម្រូវការរបស់សហគមន៍ និងគាំទ្រការអនុវត្តគោលដៅអភិវឌ្ឍន៍ប្រកបដោយចីរភាព»៕