.jpg)
ក្រុមមន្ត្រីចុះពិនិត្យដីព្រៃលិចទឹកនៅបឹងទន្លេសាប ក្នុងស្រុកឯកភ្នំ ខេត្តបាត់ដំបង ពីថ្ងៃទី ៦ ធ្នូ។ រូប ហ្វេសប៊ុក
បន្ទាយមានជ័យៈ រដ្ឋាភិបាលបានសម្រេចដកហូតដីព្រៃលិចទឹកជាង ៧ ពាន់ហិកតាទៀត ពីក្នុងភូមិសាស្ត្របឹងទន្លេសាបនៃខេត្តបន្ទាយមានជ័យ និងខេត្តសៀមរាប ខណៈការបិទបញ្ចប់បេសកកម្មចុះតាមបណ្តាខេត្តទាំង ៦ របស់លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រកឃើញផ្ទៃដីព្រៃលិចទឹកដែលត្រូវបានរំលោភបំពានក្នុងតំបន់ ៣ ជុំវិញបឹងទន្លេសាបមានជិត ៣ ម៉ឺនហិកតា។
ជាមួយវិធានការនេះ អង្គភាពប្រឆាំងអំពើពុករលួយ (ACU) ក៏ត្រូវបានចាត់ឱ្យធ្វើការស៊ើបអង្កេត និងស្រាវជ្រាវជុំវិញសំណុំរឿងអំពើពុករលួយពីសំណាក់មន្ត្រីរាជការ ដែលមានជាប់ពាក់ព័ន្ធនឹងការរំលោភបំពានដីព្រៃលិចទឹកនេះដូចជាសំណុំរឿងអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ផងដែរ។
កាលពីរសៀលថ្ងៃទី ៦ ធ្នូ លោក ជា សុផារ៉ា បានដឹកនាំក្រុមការងារ ចុះពិនិត្យរបាយការណ៍ និងចាត់វិធានការបង្ក្រាបការទន្ទ្រានដីរដ្ឋក្នុងដែនព្រៃលិចទឹកក្នុងខេត្តបន្ទាយមានជ័យ និងខេត្តសៀមរាប ដែលជាបេសកកម្មចុងក្រោយនៃការចុះត្រួតពិនិត្យជាបន្តបន្ទាប់ក្នុងខេត្តទាំង ៦ នៅជាប់ជុំវិញបឹងទន្លេសាប។
តាមទំព័រហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានចូលរួមក្នុងបេសកកម្មនេះបានឱ្យដឹងនៅថ្ងៃទី ៦ ធ្នូថា យោងតាមការស្រាវជ្រាវបឋមរបស់ខេត្តបន្ទាយមានជ័យ បានរកឃើញមានការទន្ទ្រាន និងកាន់កាប់ដីរដ្ឋក្នុងតំបន់ ៣ មានចំនួន ១១ ទីតាំង ស្មើផ្ទៃដីប្រមាណ ៥ ៣៥០ ហិកតា ស្ថិតនៅក្នុងឃុំចំនួន ២ ក្នុងស្រុកព្រះនេត្រព្រះ។
លោក វេង សាខុន បានបន្តថា តាមការស្រាវជ្រាវបឋមរបស់រដ្ឋបាលខេត្តសៀមរាប បានរកឃើញការទន្ទ្រានដីរដ្ឋក្នុងតំបន់ ៣ ក្នុងខេត្តសៀមរាបមានចំនួន ១៨៧ ទីតាំង ស្មើផ្ទៃដីប្រមាណ ១ ៩៧០ ហិកតា ស្ថិតនៅក្នុងឃុំ-សង្កាត់ចំនួន ៣០ ក្នុងក្រុង-ស្រុកទាំង ៦។
ជាមួយនឹងការរកឃើញបឋមនេះលោក វេង សាខុន បញ្ជាក់ថា លោក ជា សុផារ៉ា ប្រធានអង្គប្រជុំ បានសម្រេចឱ្យរដ្ឋបាលខេត្តទាំង ២ នោះ ធ្វើការដកហូតដីទាំងនេះ ត្រឡប់មកវិញ ភ្ជាប់ជាមួយនឹងវិធានការជាក់ស្តែងមួយចំនួន ដើម្បីចូលរួមទប់ស្កាត់ ការរំលោភបំពានដីព្រៃលិចទឹកបន្តទៀត។
លោកបន្តថា៖ «ជូនអាជ្ញាធរទន្លេសាប ធ្វើការបោះបង្គោលព្រំមេ និងរងក្នុងតំបន់៣ នៅលើទីតាំងណាដែលមិនទាន់បានបោះ ឬបង្គោលដែលបានបាត់។ បន្តចុះស្រាវជ្រាវមុខសញ្ញាប្រជាជនខុសច្បាប់ដែលចូលទន្ទ្រាន និងកាន់កាប់ដីតំបន់ ៣ ខុសច្បាប់ ដោយរដ្ឋបាលខេត្ត ត្រូវធ្វើការប្រជុំបូកសរុបវាយតម្លៃ ពីសកម្មភាពការការពារ និងទប់ស្កាត់បទល្មើសការទន្ទ្រានកាន់កាប់ព្រៃលិចទឹកក្នុងតំបន់ ៣ ជារៀងរាល់ ៣ ខែម្តង និងប្រចាំឆ្នាំ»។
ក្រៅពីនេះ លោក វេង សាខុន ក៏បានឱ្យដឹងដែរថា ចំពោះវិធានការមួយចំនួនក៏ត្រូវបានយកមកអនុវត្តដូចទៅនឹងការសម្រេចរបស់ខេត្តដទៃទៀតនូវវិធានការផ្សេងៗ ដូចជាការដាំដើមឈើឡើងវិញ ការដំឡើងប៉ាណូ បង្ហាញពីតំបន់ការពារនៅតាមចំណុចសំខាន់ៗនៅទីតាំងបង្គោលដែលបានបោះ និងផ្តល់ឱកាសជូនប្រជាពលរដ្ឋឱ្យធ្វើការប្រមូលផលស្រូវសិន ក្នុងករណីដែលស្រូវជិតប្រមូលផលផងដែរ។
បើតាមរបាយការណ៍របស់លោក វេង សាខុន ឱ្យដឹងថា ក្រោមបេសកកម្មចុះស្រាវជ្រាវជាបន្តបន្ទាប់ក្នុងតំបន់ជុំវិញបឹងទន្លេសាបស្ថិតក្នុងខេត្តទាំង ៦ នេះ យ៉ាងហោចណាស់មានផ្ទៃដីព្រៃលិចទឹកស្ថិតក្នុងតំបន់ ៣ ជិត ៣ ម៉ឺនហិកតាត្រូវបានរំលោភបំពាន និងត្រូវបានដកហូតត្រឡប់មកវិញ។ ក្នុងនោះ ដូចជាខេត្តបាត់ដំបង មានប្រមាណ ១២ ០០០ ហិកតា ខេត្តកំពង់ឆ្នាំងជាង ២ ០០០ ហិកតា ខេត្តពោធិ៍សាត់ជាង ៤ ០០០ ហិកតា និងខេត្តកំពង់ធំមានជាង ៣ ៥០០ ហិកតា និងបូករួមនឹងតួលេខទាំង ២ ខាងលើជាង ៧ ហិកតាទៀត ខណៈផ្ទៃដីទាំងនេះ ត្រូវបញ្ជាឱ្យដកហូត ដើម្បីយកមករក្សាទុកជាសម្បត្តិរបស់រដ្ឋវិញ។ នេះបើតាមតួលេខដែលបង្ហាញដោយលោក វេង សាខុន។
ជាមួយគ្នានេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានប្រាប់ភ្នំពេញប៉ុស្តិ៍នៅថ្ងៃទី ៧ ធ្នូថា អង្គភាពប្រឆាំងអំពើពុករលួយកំពុងបន្តសហការជាមួយស្ថាប័នពាក់ព័ន្ធដើម្បីចាត់វិធានការលើករណីរំលោភបំពានយកដីព្រៃលិចទឹកនេះ។ លោកបន្តថា ចំពោះសំណុំរឿងពុករលួយដែលជាប់ពាក់ព័ន្ធនឹងមន្ត្រីនានាដូចជាករណីអតីតអភិបាលខេត្តកំពង់ឆ្នាំងវិញ គឺលោកមិនអាចបកស្រាយបានទេ ក្នុងពេលនេះ ពីព្រោះ ACU នឹងធ្វើការប្រកាស ក្រោយពីបិទបញ្ចប់នីតិវិធី។
លោកបានបញ្ជាក់ថា៖ «សួររឿងអតីតអភិបាលខេត្តកំពង់ឆ្នាំងនេះ គឺខ្ញុំគ្មានយោបល់នោះទេ យើងមិនអាចនិយាយថា យើងទទួលបានការអនុញ្ញាត ឬមិនអនុញ្ញាតនោះទេ ព្រោះនិយាយអ៊ីចឹងមិនត្រូវទេ។ ចំពោះករណីនេះ ថា ACU បើកការស៊ើបអង្កេត ក៏មិនឆ្លើយជូន ឬកំពុងបើកការស៊ើបអង្កេត ក៏មិនឆ្លើយជូនបានដែរ ក្នុងពេលនេះ ហើយចំពោះករណីផ្សេងៗទៀត បើមានលទ្ធផល យើងប្រកាសជូននៅពេលនោះ»។
យ៉ាងណាក្តី លោក ឱម យ៉ិនទៀងបានបញ្ជាក់ថា ជាមួយនឹងវិធានការបង្ក្រាបការទន្ទ្រានដីព្រៃលិចទឹកនេះ គឺស្ថាប័នពាក់ព័ន្ធជាច្រើនបានធ្វើការរួមគ្នាក្នុងនោះក៏មានអង្គភាព ACU មួយចូលរួមផងដែរ ដែលនឹងមានចំណាត់ការទន្ទឹមគ្នារាល់សំណុំរឿងណា ដែលមានជាប់ពាក់ព័ន្ធនឹងអំពើពុករលួយ។
កាលពីថ្ងៃទី ២៨ ខែវិច្ឆិកា លោកនាយករដ្ឋមន្ត្រី ហ៊ុន សែន បានចេញបទបញ្ជាយ៉ាងម៉ឺងម៉ាត់ឱ្យក្រសួងស្ថាប័នពាក់ព័ន្ធ និង អភិបាលខេត្តជាប់បឹងទន្លេសាប ធ្វើការទប់ស្កាត់ និងបង្ក្រាបជាបន្ទាន់ ចំពោះការលួចកាប់ទន្ទ្រានព្រៃលិចទឹក និងវាតទីយកដីនៅតាមបឹងទន្លេសាប។ ការចេញបញ្ជានេះធ្វើឡើង បន្ទាប់ពីរាជបណ្ឌិត្យសភាកម្ពុជា បានចុះស្រាវជ្រាវរកឃើញពីការរំលោភបំពានដីព្រៃលិចទឹករាប់ម៉ឺនហិកតាយ៉ាងអនាធិបតេយ្យ គួរឱ្យព្រួយបារម្ភ ជុំវិញបឹងទន្លេសាប និងត្រូវមានការដោះស្រាយជាបន្ទាន់៕
វីដេអូ៖
