.jpg)
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ រូបថត ក្រសួងអប់រំ
ភ្នំពេញៈ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាអំពាវនាវដល់បណ្តាប្រទេសទាំងអស់ចូលរួមអនុវត្តយុទ្ធសាស្ត្រភាពជាដៃគូសកល ដើម្បីការគាំពារ និងអភិវឌ្ឍកុមារតូច ប្រកបដោយជោគជ័យ។
លោក ហង់ជួន ណារ៉ុន បានថ្លែងបែបនេះក្នុងពេលថ្លែងសុន្ទរកថា ក្នុងពិធីសម្ពោធដាក់ឱ្យប្រើប្រាស់កម្មវិធីយុទ្ធសាស្ត្រភាពជាដៃគូសកល សម្រាប់កុមារតូច (The Global Partnership Strategy (GPS) for Early Childhood) កាលពីថ្ងៃទី ៦ ធ្នូតាមប្រព័ន្ធវីដេអូ។
លោករដ្ឋមន្ត្រី លើកឡើងថា កម្ពុជាបានប្តេជ្ញាចិត្តអនុវត្តយុទ្ធសាស្ត្រភាពជាដៃគូសកល ដើម្បីការគាំពារ និងអភិវឌ្ឍកុមារតូចប្រកបដោយជោគជ័យ និងអំពាវនាវដល់បណ្តាប្រទេសទាំងអស់ ចូលរួមអនុវត្តយុទ្ធសាស្ត្រភាពជាដៃគូសកល ដើម្បីការគាំពារ និងអភិវឌ្ឍកុមារតូចប្រកបដោយជោគជ័យ។ លោកបន្តថា៖ «ប្រទេសទាំងអស់ គួរតែបន្តសហការគ្នាក្នុងការចែករំលែកបទពិសោធ ដើម្បីអនុវត្តយុទ្ធសាស្ត្រ ដើម្បីកុមារទាំងអស់ទូទាំងពិភពលោក»។
បើតាមក្រសួងអប់រំ យុទ្ធសាស្ត្រភាពជាដៃគូសកលសម្រាប់កុមារតូច ជាគំនិតផ្តួចផ្តើមដែលបង្កើតឡើងដោយអង្គការយូណេស្កូ និងដៃគូសហការ ដើម្បីឆ្លើយតបទៅនឹងការខ្វះខាតសេវាបម្រើដល់សេចក្ដីត្រូវការរបស់កុមារតូច រួមមានការអប់រំនៅមត្តេយ្យសិក្សា សុខភាព អាហារូបត្ថម្ភ អនាម័យ និងការការពារកុមារទូទាំងពិភពលោក។ ក្រសួងបានឱ្យដឹងថា បេសកកម្មនេះ ស្របតាមរបៀបវារៈឆ្នាំ ២០៣០ ជាគោលការណ៍ស្នូលនៃការអភិវឌ្ឍប្រកបដោយនិរន្តរភាពដែលត្រូវធានាបានថា កុមារទាំងអស់មានលទ្ធភាពទទួលបានការថែទាំ និងការអប់រំមត្តេយ្យសិក្សាប្រកបដោយគុណភាព ដើម្បីឱ្យពួកគេអាចត្រៀមខ្លួនសម្រាប់សាលាបឋមសិក្សា។
អង្គការ UNESCO បានថ្លែងអំណរគុណដល់ប្រទេសដៃគូ សម្រាប់ការចូលរួមក្នុងកិច្ចសន្ទនា ប្រកបដោយភាពច្នៃប្រឌិត ពិធីសម្ពោធដាក់ឱ្យប្រើប្រាស់យុទ្ធសាស្ត្រភាពជាដៃគូសកលសម្រាប់កុមារតូច ក៏ដូចជារដ្ឋសមាជិកទាំងអស់សម្រាប់ការប្តេជ្ញាចិត្តចំពោះសិទ្ធិទទួលបានការអប់រំរបស់កុមារតូចនេះ។
UNESCO បង្ហាញថា អង្គការសុខភាពពិភពលោក (WHO) បានកំណត់អត្តសញ្ញាណជំងឺរាតត្បាត កូវីដ ១៩ នៅអំឡុងខែមីនា ឆ្នាំ ២០២០ ហើយនៅខែកុម្ភៈ ឆ្នាំ ២០២១ ប្រទេសដែលមានចំណូលទាប និងមធ្យម ត្រូវបានគេរាយការណ៍ថា បានកាត់បន្ថយថវិកា សម្រាប់ការអប់រំសាធារណៈរបស់ពួកគេ (Education Finance Watch Report, 2021)។
ទោះបីជាមានបញ្ហាប្រឈមជាច្រើនក្នុងការសម្រេចបាននូវលទ្ធភាពទទួលបានសេវាកុមារតូច ប្រកបដោយគុណភាពនៅមុនការរាតត្បាតនៃជំងឺរាតត្បាតក៏ដោយ ក៏ការរកឃើញនេះបង្ហាញយ៉ាងច្បាស់ពីរបៀបដែលជំងឺរាតត្បាតគំរាមកំហែងដល់ការលុបបំបាត់ការទទួលបានជយលាភីដ៏លំបាក ដែលសម្រេចបានរួចហើយសម្រាប់កុមារ និងគ្រួសារ ហើយអាចបន្តមានផលប៉ះពាល់អវិជ្ជមានខ្លាំងលើការអភិវឌ្ឍកុមារ ការសិក្សាកម្រិតមូលដ្ឋាន សុខុមាលភាពគ្រួសារ និងផ្នែកផ្សេងទៀតនៃការផ្ដល់សេវារបស់កុមារតូច។
បើតាមអង្គការ UNESCO យុទ្ធសាស្ត្រ GPS សម្រាប់កុមារតូចត្រូវបានបង្កើតឡើង ដើម្បីទប់ទល់នឹងនិន្នាការអវិជ្ជមានលើការអប់រំកុមារ-តូច និងដើម្បីយកឈ្នះលើការកាត់បន្ថយ និងការបិទសេវាកម្មសម្រាប់សុខភាព អាហារូបត្ថម្ភ អនាម័យ និងការការពារកុមារនៅក្នុងគ្រប់តំបន់លើពិភពលោក៕
