ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) រកឃើញដេប៉ូប្រេងឥន្ធន: ១២ ទីតាំងក្នុងរាជធានី-ខេត្តចំនួន ៣ បានប្រកបអាជីកម្មមិនអនុលោមតាមច្បាប់ និងបានដកហូតទំនិញខូចគុណភាពជិត ៤០០ គីឡូក្រាម ព្រមទាំងអាល់កុលក្លែងក្លាយជិត ៥០ លីត្រ នៅលើទីផ្សារក្នុងរយៈពេល ១ ថ្ងៃ។
ទំព័រហ្វេសប៊ុករបស់ ក.ប.ប. ឱ្យដឹងនៅថ្ងៃទី ៧ ធ្នូ ថា ដើម្បីបន្តការពារនូវសុខុមាលភាពជូនប្រជាពលរដ្ឋ ទប់ស្កាត់អំពើមិនសុចរិតក្នុងធុរកិច្ចពាណិជ្ជកម្ម និងការពារផលប្រយោជន៍ជូនអ្នកប្រើប្រាស់ មន្ត្រីជំនាញ ក.ប.ប. សាខាខេត្តស្វាយរៀង ខេត្តស្ទឹងត្រែង ខេត្តរតនគិរី ខេត្តព្រះសីហនុ និងរាជធានីភ្នំពេញ បានបន្តចុះត្រួតពិនិត្យទំនិញជាគ្រឿងឧបភោគបរិភោគប្រើប្រាស់ដែលដាក់ចរាចរណ៍លក់នៅលើបណ្ដាទីផ្សារ។
ក.ប.ប. បញ្ជាក់ថា៖ «យោងទៅតាមលទ្ធផលនៃការចុះត្រួតពិនិត្យនេះ មន្ត្រីជំនាញបានរកឃើញនូវទំនិញខូចគុណភាព និងហួសកាលបរិច្ឆេទប្រើប្រាស់ចំនួន ៣៩១,២៨ គីឡូក្រាម និងអាល់កុលក្លែងក្លាយ (មេតាណុល) ចំនួន ៤៧,៥ លីត្រ ក្នុងរយៈពេល ១ ថ្ងៃ»។
ទន្ទឹមគ្នានេះ ក.ប.ប. ក៏បានឱ្យដឹងទៀតថា ក្នុងរយៈពេលដូចគ្នានេះ មន្ត្រីស៊ើបអង្កេត ក.ប.ប. ប្រចាំខេត្តតាកែវ ខេត្តព្រៃវែង និងរាជធានីភ្នំពេញបានរកឃើញដេប៉ូចំនួន ៨ បានលក់ប្រេងជូនអតិថិជនមានកម្រិតលម្អៀងផ្នែកបរិមាណ និងដេប៉ូចំនួន ៤ បានដាក់លក់ប្រេងជូនអតិថិជនលើសតម្លៃកំណត់របស់ក្រសួងពាណិជ្ជកម្ម។
ក្រោយពីបានពិនិត្យ និងដកហូតផលិតផលល្មើសទាំងនេះ មន្ត្រីជំនាញបានធ្វើការពិន័យអន្តរការណ៍ចំពោះម្ចាស់អាជីវកម្មដែលប្រព្រឹត្តល្មើស និងតម្រូវឱ្យធ្វើកិច្ចសន្យាកែតម្រូវ។ រីឯរាល់ទំនិញដែលខូចគុណភាព និងហួសកាលបរិច្ឆេទប្រើប្រាស់ត្រូវបានមន្ត្រីជំនាញធ្វើការដកហូតមករក្សាទុកដើម្បីចាត់ចែងតាមនីតិវិធី។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានប្រាប់ភ្នំពេញប៉ុស្តិ៍ ថា អំពើល្មើស និងការចរាចរផលិតផលមិនអនុលោមតាមច្បាប់នៅតែបន្តមាន ដែលទាមទារឱ្យមានការយកចិត្តទុកដាក់បន្ថែមទៀត។
ជាមួយនឹងការចុះបង្ក្រាប និងត្រួតពិនិត្យនេះ លោក ផាន អូន បានអះអាងថា អគ្គនាយកដ្ឋានក៏បានខិតខំពង្រឹងសមត្ថភាពមន្ត្រី និងបន្តផ្សព្វផ្សាយច្បាប់ស្តីពីការប្រកួតប្រជែង ដើម្បីសាធារណជន និងស្ថាប័នពាក់ព័ន្ធមានការយល់ដឹងកាន់តែស៊ីជម្រៅផងដែរ។
លោកអគ្គនាយកបញ្ជាក់ថា៖ «អគ្គនាយកដ្ឋាន ក.ប.ប. សូមអំពាវនាវដល់ប្រជាពលរដ្ឋទាំងអស់ នៅពេលដែលទទួលរងនូវការបំពានណាមួយពាក់ព័ន្ធនឹងការផ្តល់ទំនិញ ឬសេវាកម្ម សូមរាយការណ៍មក អគ្គនាយកដ្ឋាន ក.ប.ប. ជាបន្ទាន់តាមរយៈបណ្តាញទំនាក់ទំនងសង្គមហ្វេសប៊ុករបស់អគ្គនាយកដ្ឋាន CCF ផ្ទាល់ ឬទំនាក់ទំនងតាមគេហទំព័ររបស់អគ្គនាយកដ្ឋាន ក.ប.ប. ឬតាមទូរស័ព្ទលេខ ០២៣ ២៣១ ៨៥៦/០១២ ៥២៦ ៦៦០/០១២ ៩២៥ ៣១៧/០១២៨២៨ ២៣២»។
តាមរបាយការណ៍ប្រចាំឆ្នាំ ២០២១ របស់ អគ្គនាយកដ្ឋាន ក.ប.ប. បានឱ្យដឹងថា ក្នុងរយៈពេល ១ ឆ្នាំ ទំនិញមិនមានភាពអនុលោមតាមច្បាប់ និងមានសារធាតុគីមី ជិត ៥០ តោន និងអាល់កុល ជែលលាងដៃគ្រប់ប្រភេទ ដែលមានផ្ទុកសារធាតុមេតាណុល និងសារធាតុបាញ់លើរុក្ខជាតិគ្មានស្លាកសញ្ញាត្រឹមត្រូវសរុបជិត ២ ម៉ឺនលីត្រ។
ចំពោះការចុះត្រួតពិនិត្យគុណភាព និងបរិមាណរង្វាស់រង្វាល់ប្រេងសាំង ដែលត្រូវបានដាក់ធ្វើអាជីវកម្ម នៅតាមបណ្តាស្ថានីយ/ដេប៉ូលក់ប្រេងឥន្ធនៈក្នុងរយៈពេល ១ ឆ្នាំ ស្ថាប័ន ក.ប.ប. បានរកឃើញស្ថានីយ/ដេប៉ូលក់ប្រេងឥន្ធនៈចំនួន ៦៩៣ ទីតាំង មិនមានភាពអនុលោមផ្នែកគុណភាព និងបរិមាណ។ នេះបើយោងតាមរបាយការណ៍ដដែល៕
វីដេអូ៖