.jpg)
ការចុះពិនិត្យបង្គោលព្រំកំណត់តំបន់ព្រៃលិចទឹកនៅជុំវិញបឹងទន្លេសាបក្នុងខេត្តសៀមរាបកាលពីថ្ងៃទី ៥ ធ្នូ ។ រូបថត រដ្ឋបាលខេត្តសៀមរាប
ភ្នំពេញៈ អាជ្ញាធរទន្លេសាបបានបោះង្គោលព្រំកំណត់ដីព្រៃលិចទឹកក្នុងតំបន់ ៣ បាន ៨០ ដើមបន្ថែមទៀតពីបង្គោលព្រំដែលមានស្រាប់ជាង ៨០០ ដើមនៅជុំវិញបឹងទន្លេសាប ខណៈរដ្ឋបាលជលផលត្រៀមកូនឈើរាប់ម៉ឺនដើមដើម្បីដាំបំពេញលើផ្ទៃដីដែលបានដកហូត និងបានអំពាវនាវឲ្យមានការចូលរួមដាំដើមឈើពីពលរដ្ឋ។
ក្នុងយុទ្ធនាការចុះពិនិត្យនិងចាត់វិធានការបង្ក្រាបការទន្ទ្រានដីព្រៃលិចទឹកជាង ១ សប្តាហ៍ រាជរដ្ឋាភិបាលបានរកឃើញផ្ទៃដីដែលបានរំលោភបំពានក្នុងតំបន់ ៣ និងសម្រេចដកហូតត្រឡប់មកវិញជិត ៣ ម៉ឺនហិកតាពីក្នុងភូមិសាស្ត្រខេត្តទាំង ៦ ជាប់បឹងទន្លេសាបរួមមាន ខេត្តកំពង់ឆ្នាំង កំពង់ធំ ពោធិ៍សាត់ បាត់ដំបង បន្ទាយមានជ័យ និងខេត្តសៀមរាប។
លោក ម៉ៅ ហាក់ អនុប្រធានអាជ្ញាធរទន្លេសាបនិងក្រុមការងារនាយកដ្ឋានជលសាស្ត្រនិងការងារទន្លេបានប្រាប់ភ្នំពេញប៉ុស្តិ៍នៅថ្ងៃទី ៨ ធ្នូថាអាជ្ញាធរទន្លេសាបបានបោះបង្គោលព្រំថ្មី ដើម្បីកំណត់តំបន់ការពារនៅតំបន់ ៣ ក្នុងបឹងទន្លេសាបបានប្រមាណ ៨០ ដើមក្នុងចំណោមបង្គោលជាង ១០០ ដើម ដែលគ្រោងនឹងបោះបន្ថែម ដើម្បីបំពេញចន្លោះក្នុងចំណោមបង្គោលជុំវិញបឹងទន្លេសាបជាង ៨០០ ដើម។
លោកបន្តថា បង្គោលដែលមិនទាន់បានបោះរួចរាល់ ដោយសារតំបន់ខ្លះនៅមានទឹកលិចដែលមិនអាចឲ្យមន្ត្រីចូលទៅដាំបង្គោលបានក៏ប៉ុន្តែលោកថាមិនយូរទេការបោះបង្គោលព្រំនេះនឹងបញ្ចប់នៅពេលទឹកស្រកអស់នាពេលខាងមុខ។
លោកបានបញ្ជាក់ថា៖«កន្លងមកគឺមានករណីរំលោភបំពានដោយមានអ្នកលួចដកបង្គោលព្រំកំណត់តំបន់ការពារខ្លះដែរ។ អ៊ីចឹងហើយបានត្រូវធ្វើតម្រង់ និងដាំឡើងវិញកន្លែងបង្គោលណាដែលបាត់បង់។ ការងារបោះបង្គោលព្រំនេះ មិនចាំដល់ឆ្នាំក្រោយទេ គឺយើងធ្វើបណ្តើរ នៅកន្លែងណា ដែលទឹកស្រក យើងចូលទៅដាំបន្តរហូតអ៊ីចឹងណា»។
លោក ពុំ សុថា ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផល បានប្រាប់ភ្នំពេញប៉ុស្តិ៍នៅថ្ងៃទី ៨ ធ្នូដែរថា ទំហំនៃគម្រោងដាំដុះដើមឈើជំនួសកន្លែងដែលរងការកាប់បំផ្លាញគឺ មានទំហំធំធេងណាស់ដល់ទៅរាប់ម៉ឺនដើម ខណៈទំហំនៃការបាត់បង់ ក៏មានទំហំធំធេងដូចគ្នា។
យ៉ាងណា លោក ពុំ សុថា បានអះអាងថា ក្នុងដំណាក់កាលនេះ គឺក្រុមការងារកំពុងបន្តសិក្សានិងរៀបចំឲ្យបណ្តាសហគមន៍ប្រមូលកូនឈដើម្បីវាយតម្លៃថាតើផ្ទៃដែលត្រូវបានដកហូតមកវិញនេះអាចនឹងមានដើមឈើគ្រប់គ្រាន់ សម្រាប់ដាំដុះបំពេញការបាត់បង់នោះមកវិញឬយ៉ាងណា ។
ជាមួយគ្នានេះលោកបានអំពាវនាវដល់ប្រជាពលរដ្ឋឲ្យចូលរួមផ្តល់ជាកូនឈើពូជឈើដែលអាចដាំដុះក្នុងទឹកបាន ដើម្បីឲ្យក្រុមការងារប្រមូលយកទៅដាំដុះកន្លែងដែលផ្តល់អំណោយផលដល់ដើមឈើទាំងនោះ ខណៈតំបន់មួយចំនួននឹងដាំប្រភេទឈើ ដែលធ្លាប់មានស្រាប់ ព្រោះបើខុសប្រភេទ នឹងមិនអាចដោះដុះបាននោះទេ។
លោកបានបញ្ជាក់ថា៖«យើងកំពុងធ្វើការរឿងនេះ បើគិតពីទំហំដីឥឡូវ ព្រោះត្រូវគិតថា តំបន់ណាខ្លះនៅព្រៃ តំបន់ណាខ្លះវាអស់ព្រៃ កន្លែងណាត្រូវដាំ កន្លែងណាមិនបាច់ដាំ។ គ្រាន់តែយើងដឹងថាយើងត្រូវការកូនឈើច្រើនណាស់ ដែលឲ្យតាមរដ្ឋបាលខណ្ឌ និងសហគមន៍អីជួយរកកូនឈើ»។
លោក លី ឡា ប្រធានរដ្ឋបាលជលផលខេត្តកំពង់ឆ្នាំងដែលជាខេត្តមួយធ្វើយុទ្ធនាការដាំដើមឈើមុនគេបានជិត២ពាន់ដើមលើផ្ទៃដី ៤០ ហិកតា បានប្រាប់ភ្នំពេញប៉ុស្តិ៍ដែរថា ក្នុងជំហានបន្ទាប់ អាជ្ញាធរខេត្តនិងស្ថាប័នពាក់ព័ន្ធនឹងត្រៀមកូនឈើប្រមាណ ៣ ពាន់ដើមបន្ថែមទៀត ដើម្បីបើកយុទ្ធនាការជាលើកទី ២ ក្នុងការរួមគ្នាដាំដើមឈើនេះនៅចុងសប្តាហ៍។
លោកបានបញ្ជាក់ថា៖«ក្នុងផ្ទៃដីដែលយើងដកហូតមួយចំនួនគឺមានការដាំដុះដែលរដ្ឋាភិបាលបានទុកឲ្យគាត់ អាស្រ័យផលសិនហើយផ្ទៃដែលមិនមានការដាំដុះយើងមិនឲ្យពលរដ្ឋបន្តធ្វើទេគឺយើងយកមកដាំកូនឈើវិញ ហើយដោយសារកូនឈើយើងនៅមានចំនួនតិច យើងត្រៀមធ្វើជាបន្តបន្ទាប់ បណ្តើរៗ ទៅតាមកូនឈើដែលមាន»។
លោកបានបន្តថា៖«ក្នុងតំបន់នេះ គឺអាចដាំទៅតាមប្រភេទដែលមាន ដូចជា ដើមរាំង ដើមរំដេញ និងដើមភ្នំភ្នែង ព្រោះបើខុសពីឈើប្រភេទនេះ ក៏វាអត់ដុះដែរ ហើយទីតាំងដែលមានព្រៃប្រភេទអ្វី យើងដាំប្រភេទហ្នឹងវិញ។ ពេលដាំហើយ យើងមិនបារម្ភទេប្រសិនបើយើងការពារបានល្អមិនរងការកាប់បំផ្លាញទៀតគឺមិនយូរទេនៅរដូវធ្លាក់ភ្លៀងខាងមុខនេះនឹងដុះឯង»។
លោក លី ឡា បន្តថា តាមរយៈសកម្មភាពដែលបានចុះធ្វើការកន្លងមក ចាប់ពីថ្ងៃទី ២៩ វិច្ឆិកា ដល់ថ្ងៃទី ៧ ធ្នូ គឺមានប្រជាពលរដ្ឋប្រមាណជិត ៣០០ គ្រួសារ ក្នុងស្រុកចំនួន៣ មានស្រុកកំពង់លែង ស្រុកជលគិរី និងស្រុកបរិបូណ៌ បានចូលខ្លួនប្រគល់ដីព្រៃលិចទឹកជិត ៣ ពាន់ហិកតាត្រឡប់មកវិញខណៈការដកហូតនិងការផ្តល់ដីត្រឡប់មកវិញនេះគឺនៅមានជាបន្តបន្ទាប់។
កាលពីថ្ងៃទី ២៨ ខែវិច្ឆិកា លោកនាយករដ្ឋមន្ត្រី ហ៊ុន សែន បានចេញបទបញ្ជាឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាបទប់ស្កាត់និងបង្ក្រាបជាបន្ទាន់ចំពោះការលួចកាប់ព្រៃលិចទឹកនិងវាតទីយកដីនៅតាមបឹងទន្លេសាប បន្ទាប់ពីរាជបណ្ឌិត្យសភាកម្ពុជាបានរកឃើញមានការរំលោភបំពានដីព្រៃលិចទឹកយ៉ាងអនាធិបតេយ្យជាមួយនឹងបទបញ្ជានេះ កាលពីថ្ងៃទី ៧ ធ្នូ រដ្ឋបាលខេត្តបាត់ដំបងបានព្រមានចាត់វិធានការដោយគ្មានលើកលែងចំពោះមន្ត្រីពាក់ព័ន្ធឬអាជ្ញាធរដែនដីដែលបន្តធ្វើខុសច្បាប់ក្នុងករណីទទួលស្គាល់លិខិត ឬឯកសារដែលមានការបំពានដីព្រៃលិចទឹកក្នុងបឹងទន្លេសាប។
ការប្រកាសរបស់រដ្ឋបាលខេត្តនេះ ដោយសារតែកន្លងមក ករណីចូលកាប់ឆ្ការរុករាននិងឈូសឆាយនៅលើដីព្រៃលិចទឹករបស់រដ្ឋក្នុងតំបន់៣មានការកើនឡើង ដែលទាមទារឲ្យរដ្ឋបាលស្រុកឃុំនិងភូមិត្រូវបញ្ឈប់ចុះហត្ថលេខាបញ្ជាក់ផ្សេងៗមានលិខិតផ្ទេរសិទ្ធិ ការទិញលក់ ជួលបញ្ចាំ ពាក្យស្នើសុំកាន់កាប់ដីធ្លី ពាក្យស្នើសុំប្រើប្រាស់ដីធ្លី និងការបញ្ជាក់ប្លង់បង្ហាញទីតាំងនៅក្នុងដីរដ្ឋព្រៃលិចទឹកតំបន់៣ក្នុងដែនសមត្ថកិច្ចរបស់ខ្លួន។
សេចក្តីជូនដំណឹងនេះបានបញ្ជាក់ថា«ត្រូវទទួលសុខត្រូវនិងប្រឈមមុខជាមួយផ្លូវច្បាប់ជាធរមានដោយគ្មានការលើកលែងឡើយករណីបុគ្គលតំណាងឲ្យរដ្ឋបាលស្រុក ឃុំ ភូមិណាមួយនៅតែបន្តចុះហត្ថលេខាបញ្ជាក់លើលិខិតនិងឯកសារទាំងនេះ»៕
