.jpg)
បុរសម្នាក់ត្រូវបានគ្រូពេទ្យធ្វើតេស្តរហ័ស រកវីរុសកូវីដ ១៩។ ហេង ជីវ័ន
ភ្នំពេញៈ ក្រសួងប្រៃសណីយ៍ និងទូរគមនាគមន៍បានជូនដំណឹងថា ចាប់ពីថ្ងៃទី ១៣ ខែធ្នូ ឆ្នាំ ២០២១ នេះតទៅ ក្រសួងនឹងផ្ទេរការចែកចាយឧបករណ៍តេស្តរហ័ស អង់ទីហ្ស៊ែនកូវីដ-១៩ ទៅប្រៃសណីយ៍កម្ពុជា ដើម្បីបន្តចែកចាយ និងអាចផ្ដល់បន្ថែមនូវសេវាកម្មដឹកជញ្ជូនដល់ប្រជាពលរដ្ឋផងដែរ។
សេចក្ដីជូនដំណឹងរបស់ក្រសួងប្រៃសណីយ៍ និងទូរគមនាគមន៍ស្ដីពីការផ្ទេរការចែកចាយឧបករណ៍តេស្ដរហ័សនេះទៅប្រៃសណីយ៍កម្ពុជាឱ្យដឹងថា ចាប់ពីថ្ងៃទី ១ ខែកក្កដា ឆ្នាំ ២០២១ មក ក្រសួងប្រៃសណីយ៍ និងទូរគមនាគមន៍បានចែកចាយឧបករណ៍តេស្តរហ័ស អង់ទីហ្សែនកូវីដ ១៩ ដែលបានធ្វើឱ្យឧបករណ៍តេស្តមានភាពសម្បូរ និងបន្សាំទៅនឹងតម្លៃទីផ្សារ។
តាមរយៈកិច្ចការងារនេះ ក្រសួង ស្ថាប័ន រោងចក្រ សហគ្រាសនានា និងប្រជាជនទូទៅមានលទ្ធភាពក្នុងការទិញយកទៅធ្វើតេស្ត និងបានចូលរួមចំណែកយ៉ាងសំខាន់ក្នុងការទប់ស្កាត់ការរីករាលដាលនៃជំងឺកូវីដ ១៩ ផងដែរ។
ក្រសួងបញ្ជាក់ថា៖ «ចាប់ពីថ្ងៃទី ១៣ ខែធ្នូ ឆ្នាំ ២០២១នេះតទៅ ក្រសួងនឹងផ្ទេរការចែកចាយឧបករណ៍តេស្តរហ័សទាំង ២ ប្រភេទនេះទៅប្រៃសណីយ៍កម្ពុជា ដើម្បីបន្តចែកចាយ និងអាចផ្ដល់បន្ថែមនូវសេវាកម្មដឹកជញ្ជូន»។
ក្រសួងបានជូនដំណឹងដល់សាធារណជន ដែលបានបញ្ជាទិញនឹងទូទាត់រួច មុនកាលបរិច្ឆេទនៃការផ្ទេរការចែកចាយនេះ គឺត្រូវមកទទួលឧបករណ៍តេស្ដរហ័សនៅទីស្តីការក្រសួងប្រៃសណីយ៍ និងទូរគមនាគមន៍ដដែល។
បើតាមសេចក្ដីជូនដំណឹង ក្រសួង ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថាន ឱសថស្ថានរង ភ្នាក់ងារចែកចាយ និងសាធារណជន អាចបន្តបញ្ជាទិញឧបករណ៍តេស្ដរហ័ស តាមប្រព័ន្ធស្វ័យប្រវត្តិកម្មដែលធ្លាប់ប្រើប្រាស់ពីមុនមក ដែលមានតំណភ្ជាប់ mptc.gov.kh/rt ឬមកទិញដោយផ្ទាល់នៅប្រៃសណីយ៍កម្ពុជា ដែលមានអាសយដ្ឋាន នៅវិថីព្រះអង្គអេង សង្កាត់វត្តភ្នំ ខណ្ឌដូនពេញ រាជធានីភ្នំពេញ។
សម្រាប់ព័ត៌មានបន្ថែម សូមទាក់ទង ទូរស័ព្ទលេខ ០៩៦ ៦៥៩ ២៧៣៣ ០១៥ ២៧៩ ៩១៧ ជារៀងរាល់ម៉ោងធ្វើការ ឬតាមដានទំព័រហ្វេសប៊ុករបស់ប្រៃសណីយ៍កម្ពុជា។
បើតាមសេចក្ដីជូនដំណឹងនេះ បច្ចុប្បន្ន ក្រសួងកំពុងបន្តចែកចាយឧបករណ៍តេស្ដរហ័សអង់ទីហ្ស៊ែនកូវីដ ១៩ ប្រភេទ Asan Easy Test ផលិតនៅប្រទេសកូរ៉េ និង Wondfo ផលិតនៅប្រទេសចិន ជូនដល់ក្រសួង ស្ថាប័ន ក្រុមហ៊ុន សហគ្រាស រោងចក្រ មន្ទីរពេទ្យឯកជន គ្លីនិក ឱសថស្ថាន ឱសថស្ថានរង ភ្នាក់ងារចែកចាយ និងសាធារណជន។
ទាក់ទងនឹងលទ្ធផលនៃការចែកចាយឧបករណ៍តេស្តរហ័ស អង់ទីហ្ស៊ែនកូវីដ ១៩ នាពេលកន្លងមក និងផ្ទេរការចែកចាយឧបករណ៍តេស្តរហ័សនេះទៅប្រៃសណីយ៍កម្ពុជា ភ្នំពេញប៉ុស្ដិ៍ មិនអាចទាក់ទងលោក សូ វិសុទ្ធី អ្នកនាំពាក្យក្រសួងប្រៃសណីយ៍ និងទូរគមនាគមន៍ និងលោក ម៉ុក រ៉ាឌី អគ្គនាយកនៃអគ្គនាយកដ្ឋានរដ្ឋបាលនៃក្រសួងប្រៃសណីយ៍ និងទូរគមនាគមន៍បានទេ កាលពីថ្ងៃទី ៨ ធ្នូ៕
