.jpg)
មន្ត្រីក្រសួងបរិស្ថាន ចុះពិនិត្យដីព្រៃនៅតំបន់ឧទ្យានជាតិបូកគោកាលពីថ្ងៃទី ១៤ កញ្ញា។ រូបថត ក្រសួងបរិស្ថាន
កំពតៈ មន្ទីរបរិស្ថានខេត្តកំពតបានប្រកាសព្រមានដល់អ្នកដែលបានកាប់រានទន្ទ្រានដីព្រៃឧទ្យានជាតិព្រះមុនីវង្ស «បូកគោ» យកធ្វើជាកម្មសិទ្ធិ ត្រូវរុះរើ ដកប្រមូលចេញនូវបង្គោលព្រំដី ឬសំណង់ខ្ទមចាំដីដោយស្ម័គ្រចិត្តឱ្យអស់ត្រឹមថ្ងៃទី ១៥ ខែធ្នូ ឆ្នាំ ២០២១ ជាកំហិត បើមិនដូច្នោះទេ អាជ្ញាធរពាក់ព័ន្ធនឹងចាត់វិធានការតាមច្បាប់។
លោក អេង ប៉ូឡូ ប្រធានមន្ទីរបរិស្ថានខេត្តកំពតថ្លែងនៅថ្ងៃទី ៧ ធ្នូថា មន្ទីរបរិស្ថានខេត្តកំពតបានជូនដំណឹងឱ្យប្រជាពលរដ្ឋដែលកាប់គាស់ រុករានដីព្រៃ ឆ្ការ ដុត ឈូសឆាយដីព្រៃ សង់រោង ធ្វើក្សូស បោះបង្គោល ដាំដំណាំ ហ៊ុមព័ទ្ធដីព្រៃ ដើម្បីយកដីធ្វើជាកម្មសិទ្ធិ ក្នុងឧទ្យានជាតិព្រះមុនីវង្ស «បូកគោ» ត្រូវរុះរើ ដកប្រមូលចេញដោយខ្លួនឯងឱ្យអស់ត្រឹមថ្ងៃទី ១៥ ខែធ្នូ ឆ្នាំ ២០២១ ជាកំហិត។ បើហួសកាលបរិច្ឆេទដូចបានកំណត់ មន្ទីរបរិស្ថាន មន្ត្រីឧទ្យានុរក្ស រដ្ឋបាលឃុំ-សង្កាត់ ក្រុង ស្រុកពាក់ព័ន្ធនឹងអនុវត្តតាមនីតិវិធីច្បាប់ជាធរមាន។
លោក អេង ប៉ូឡូ មិនមានទិន្នន័យពីចំនួនពលរដ្ឋ និងចំនួនផ្ទៃដីដែលពលរដ្ឋបានចូលទៅទន្ទ្រានកាន់កាប់នៅទីនោះទេ ប៉ុន្តែការជូនដំណឹងនេះធ្វើឡើងដោយផ្អែកទៅលើអ្វីដែលមាននៅលើផែនទី និងបទដ្ឋានគតិយុត្តដែលបានចង្អុលបង្ហាញ។
ចំពោះការផ្សព្វផ្សាយឱ្យពលរដ្ឋរុះរើចេញនេះ ដោយសារតែមន្ត្រីឧទ្យានុរក្សមានចំនួនតិចតួច ហេតុនេះមន្ទីរចង់ឱ្យប្រជាពលរដ្ឋ ដែលបានចូលទន្ទ្រានដោយខុសច្បាប់ ចូលរួមដកបង្គោលព្រំដី ឬរុះរើរបងចេញ ចៀសវាងការប្រើប្រាស់កម្លាំង និងពេលវេលាច្រើន។
លោកបញ្ជាក់ថា៖ «ទិន្នន័យនៅក្នុងការទន្ទ្រាននេះ នៅខ្វះខាតនៅឡើយ ប៉ុន្តែបើយើងមើលរូបភាព តាមផែនទីផ្កាយរណបបានបង្ហាញថា មានការទន្ទ្រានជាច្រើនកន្លែងក្នុងរយៈពេលថ្មីៗនេះ ជាពិសេសនៅចុងឆ្នាំ ២០០០ រហូតដល់ដើមឆ្នាំ ២០២១ នេះ»។ លោក ប៉ូឡូ បញ្ជាក់ថា ការជូនដំណឹងរបស់មន្ទីរបរិស្ថានខេត្តកំពត គឺមានការទន់ភ្លន់ក្នុងការអនុវត្តច្បាប់ បើប្រជាពលរដ្ឋបានយល់ដឹង និងចូលរួម នោះមិនមានបញ្ហាប្រឈមទេ ប៉ុន្តែបើពលរដ្ឋនៅតែចចេសចង់កាន់កាប់ដីទាំងនោះ ដោយមិនមានលិខិតស្នាម ឬលិខិតបទដ្ឋានគតិយុត្តបង្ហាញទេ នឹងធ្វើឱ្យពួកគាត់មានបញ្ហាផ្សេងៗបន្តទៀត។
លោក យន់ ផល្លី មន្ត្រីសម្របសម្រួលសមាគមអាដហុក ប្រចាំខេត្តកំពត ថ្លែងនៅថ្ងៃទី ៧ ធ្នូថា អ្នកដែលបានចូលកាប់ទន្ទ្រាននៅក្នុងតំបន់ឧទ្យានជាតិមុនីវង្ស «បូកគោ» គួរតែចាកចេញហើយប្រគល់ដីជូនរដ្ឋវិញ ដោយការស្ម័គ្រចិត្ត ប៉ុន្តែការអនុវត្តច្បាប់ គួរតែធ្វើឡើងដោយតម្លាភាព។ លោកថ្លែងថា៖ «មិនថា អ្នកមានអ្នកក្រ ឬអ្នកដែលមានអំណាចទេ ឱ្យតែមានការទន្ទ្រានទៅលើដីរដ្ឋប៉ះពាល់លើសួនឧទ្យានហ្នឹង ត្រូវតែមានការចាកចេញដោយស្ម័គ្រចិត្ត។ ប៉ុន្តែបើនៅក្នុងរង្វង់ដីឧទ្យានជាតិហើយមិនមានផលប៉ះពាល់តែរដ្ឋត្រូវការក្នុងប្រការណាមួយនោះគួរតែរកដំណោះស្រាយសមរម្យតាមនីតិវិធី»។
លោក យន់ ផល្លី ប្រាប់ថា ជាការកត់សម្គាល់លើការទន្ទ្រានដីឧទ្យានជាតិមុនីវង្ស «បូកគោ» គឺការទន្ទ្រានពីសំណាក់ប្រជាពលរដ្ឋមិនមានច្រើនប៉ុន្មានទេ តែភាគច្រើនគឺអ្នកដែលមានធនធានមានអំណាច។ ចំណុចនេះលោកសង្ឃឹមថា រដ្ឋនឹងចាត់វិធានការប្រកបដោយតម្លាភាពទូទៅលើអ្នកដែលបានទន្ទ្រានដីព្រៃដោយខុសច្បាប់។
ឆ្លើយតបនឹងការលើកឡើងរបស់អង្គការសង្គមស៊ីវិល លោក អេង ប៉ូឡូ បញ្ជាក់ថា ការអនុវត្តច្បាប់ គឺមិនមានការលម្អៀងទៅខាងណាឡើយ។ សំខាន់បើទង្វើនោះខុសទៅនឹងអ្វីដែលជាបទដ្ឋានគតិយុត្ត ឬច្បាប់ចង្អុលបង្ហាញ គឺត្រូវតែអនុវត្តច្បាប់ដោយ មិនលើកលែងនោះទេ។
ពាក់ព័ន្ធនឹងការទន្ទ្រានកាន់កាប់ដីឧទ្យានជាតិព្រះមុនីវង្សនេះដែរ ក្រសួងបរិស្ថានកំពុងបន្តពិនិត្យទិដ្ឋភាពច្បាប់ប្រឆាំងនឹងបុគ្គលល្មើសច្បាប់ ដែលបានលួចទន្ទ្រានកាន់កាប់ដីព្រៃក្នុងតំបន់ឧទ្យានជាតិព្រះមុនីវង្សបូកគោ។
យ៉ាងណាក្តីនៅថ្ងៃទី ៧ ធ្នូ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យ ក្រសួងបរិស្ថានបញ្ជាក់ថា ការងារនោះមិនទាន់មានការសម្រេចយ៉ាងណានៅឡើយ។ ក្នុងដំណើរការចុះល្បាតពិនិត្យមើលស្ថានភាពរំលោភច្បាប់តំបន់នោះ កាលពីថ្ងៃទី ២៦ ខែកក្កដា លោក នេត្រ ភក្ត្រា បានឱ្យដឹងថា មានការទន្ទ្រានកាន់កាប់ដីព្រៃរដ្ឋដោយខុសច្បាប់ ចំនួន ១៩២ កន្លែង មានទំហំជាង ៧០០ ហិកតា ដែលស្ថិតនៅក្នុងឃុំចំនួន ៨ របស់ស្រុកឈូក ស្រុកទឹកឈូ និងក្រុងកំពត។
លោក ភក្ត្រា ថ្លែងថា៖ «ស្ថានភាពនៃការទន្ទ្រានកាន់កាប់ដីព្រៃថ្មីៗមិនមែនជាដីដែលត្រូវបានប្រើប្រាស់ និងអាស្រ័យផលយូរឆ្នាំឡើយ។ ការល្មើសច្បាប់ក្នុងការទន្ទ្រានដីរដ្ឋនោះ ត្រូវតែអនុវត្តទៅតាមច្បាប់ ដោយមិនមានការលើកលែងឡើយ វិធានការទប់ស្កាត់ ការអនុវត្តនីតិវិធីច្បាប់កម្រិតណា អាហ្នឹងស្ថិតនៅលើក្រសួងបរិស្ថាន» ៕
វីដេអូ៖
