ភ្នំពេញៈ ជនជាប់ចោទជាអតីតមន្ត្រីនគរបាលម្នាក់ ដែលរំលោភសេពសន្ថវៈសង្សារ ហើយឱ្យអ្នកផ្សេងរួមភេទបន្តកាលពីឆ្នាំ ២០១៧ ដែលតុលាការកំពូលជំនុំជម្រះកាលពីថ្ងៃទី ១ធ្នូ ឆ្នាំ ២០២១ ត្រូវបានតុលាការកំពូលប្រកាសសាលដីកា នៅព្រឹកថ្ងៃទី ៨ ធ្នូ សម្រេចតម្កល់ទណ្ឌកម្មទោស ៧ ឆ្នាំដដែល។
លោកស្រី ម៉ៅ ធីតា អ្នកនាំពាក្យតុលាការកំពូល ប្រាប់ភ្នំពេញប៉ុស្តិ៍នៅរសៀលថ្ងៃទី ៨ ធ្នូ ថា ជនជាប់ចោទឈ្មោះ ឌឹម មករា ហៅ តឹក អាយុ ៣៨ ឆ្នាំត្រូវបានប្រធានក្រុមប្រឹក្សាជំនុំជម្រះ លោកចៅក្រម ជីវ កេង សម្រេចតម្កល់ទណ្ឌកម្មទោស ៧ ឆ្នាំដដែល។ លោកស្រីថ្លែងថា៖ «សំណុំរឿងនេះ ក្រោយពីតុលាការកំពូលបានពិភាក្សាមក តុលាការកំពូលសម្រេចតម្កល់សាលដីការបស់ឧទ្ធរណ៍ដដែល»។
កាលពីថ្ងៃជំនុំជម្រះ នៅតុលាការកំពូលពីថ្ងៃទី ១ ធ្នូ ឆ្នាំ ២០២១ មានលោក ចៅក្រម ជីវ កេង ជាប្រធានក្រុមប្រឹក្សាជំនុំជម្រះ។ ពេលជំនុំជម្រះនោះជនជាប់ចោទបានបដិសេធពីការប្រព្រឹត្តរបស់ខ្លួន ដោយឆ្លើយប្រាប់តុលាការថា ករណីនេះ រូបគេជាមួយនារីរងគ្រោះ ព្រមព្រៀងស្រឡាញ់គ្នាដោយស្មោះស្ម័គ្រទេ។
តាមអង្គហេតុនារីរងគ្រោះរស់នៅភូមិមួយ ក្នុងឃុំអន្សោង ស្រុកកំពង់ត្របែក ខេត្តព្រៃវែង។ កាលពីថ្ងៃទី ១៧ វិច្ឆិកា ២០១៧ ជនជាប់ចោទបានរួមភេទជាមួយនាង។ បន្ទាប់មកជនជាប់ចោទបាននាំនារីរងគ្រោះមករាជធានីភ្នំពេញ។
រយៈពេលរស់នៅរាជធានីភ្នំពេញ ជនជាប់ចោទបានបង្កើតអាខោនហ្វេសប៊ុកមួយ ដោយដាក់រូបថតរបស់នារីរងគ្រោះ។ គ្រានោះ ក៏មានបុរសម្នាក់ឈ្មោះ ណាំ នេត ទាក់ទងស្នេហាជាមួយនារីរងគ្រោះតាមរយៈហ្វេសប៊ុក ប៉ុន្តែការសរសេរឆ្លើយឆ្លងគ្នា គឺជនជាប់ចោទជាអ្នកដើរតួជំនួសនារីរងគ្រោះទាំងអស់។
ជនជាប់ចោទបានលួងលោមនារីរងគ្រោះឱ្យរួមភេទជាមួយបុរសម្នាក់នោះជាថ្នូរនឹងម៉ូតូ ១ គ្រឿង។ ប៉ុន្តែក្រោយមកក្នុងឆ្នាំ ២០១៨ ពេលជនជាប់ចោទនាំនារីរងគ្រោះទៅស្រុកកំណើតវិញ ក៏ត្រូវឪពុករបស់នារីរងគ្រោះប្តឹងឱ្យសមត្ថកិច្ចចាប់ខ្លួនតែម្តង។ សំណុំរឿងនេះត្រូវបានសាលាដំបូងខេត្តព្រៃវែង បើកសវនាការជំនុំជម្រះ និងប្រកាសសាលក្រមនៅថ្ងៃទី ៥ មីនា ឆ្នាំ ២០១៩ ផ្តន្ទាទោសដាក់ពន្ធនាគារ ៨ ឆ្នាំ និងបង្គាប់ឱ្យសងសំណងទៅជនរងគ្រោះ ២៨ លានរៀល។ តែជនជាប់ចោទមិនសុខចិត្តក៏បានប្តឹងជំទាស់មកសាលាឧទ្ធរណ៍ភ្នំពេញ ហើយត្រូវសាលាឧទ្ធរណ៍បើកសវនាការ និងប្រកាសសាលដីកានៅថ្ងៃទី ៤ ខែមីនា ឆ្នាំ ២០២១ សម្រេចបន្ថយទោសពី ៨ ឆ្នាំ មក ៧ ឆ្នាំវិញ៕