.jpg)
ម៉ូតូត្រូវបានឆេះខូចខាតនៅខេត្តកំពត។ រូបថត ប៉ូលិស
កំពតៈ ម៉ូតូស៊េរីថ្មីចម្រុះចំនួន ៥៧ គ្រឿងបានរងការខូចខាតធ្ងន់ធ្ងរ និងតិចតួច ក្នុងគ្រោះអគ្គិភ័យឆេះហាងលក់ម៉ូតូ ១ កន្លែងស្ថិតនៅភូមិ-សង្កាត់កំពង់បាយ ក្រុង-ខេត្តកំពត នៅវេលាម៉ោងជាង ៦ ព្រឹកថ្ងៃទី ៩ ធ្នូ។
លោក ភី នូច នាយការិយាល័យពន្លត់ និងបង្ការអគ្គិភ័យនៃស្នងការដ្ឋាននគរបាលខេត្តកំពតប្រាប់នៅព្រឹកថ្ងៃទី ៩ ធ្នូ ថា ហេតុការណ៍នេះបានកើតឡើងកាលពីវេលាម៉ោងជាង ៦ ព្រឹកថ្ងៃទី ៩ ធ្នូ ឆ្នាំ ២០២១។ រីឯហាងលក់ម៉ូតូដែលឆេះនោះយីហោ «លី ប៉េង» ដែលស្ថិតនៅភូមិកំពង់បាយ សង្កាត់ កំពង់បាយ ក្រុង-ខេត្តកំពត។
លោកបន្តថា ក្នុងហេតុការណ៍គ្រោះអគ្គិភ័យនេះមានម៉ូតូស៊េរីថ្មីចម្រុះចំនួន ៥៧ គ្រឿងត្រូវរងការឆេះខូចខាតធ្ងន់ និងតិចតួចព្រមទាំងមានរថយន្តម៉ាកឡង់គ្រីស័រ ៥៧០ និងរថយន្តម៉ាកម៉ាស្តា ២ គ្រឿងត្រូវបានឆេះខូចខាតទាំងស្រុង។ ក្រៅពីនេះក៏មានឆេះសម្ភារប្រើប្រាស់សម្រាប់បំពាក់ម៉ូតូមួយចំនួនធំទៀតផង។
លោក ភី នូច បញ្ជាក់ថា៖ «ការឆេះនេះមិនបណ្តាលឱ្យគ្រោះថ្នាក់បាត់បង់ជីវិតមនុស្សទេ។ ករណីនេះដែរ យើងបានទប់ទល់សភាពការណ៍បានទាន់ពេលវេលា។ ព័ត៌មានបឋម គឺមកពីឆ្លងចរន្តអគ្គិសនី»។
លោក ហោ វណ្ណា អធិការនគរបាលក្រុងកំពតប្រាប់នៅថ្ងៃទី ៩ ធ្នូ ថា ចំពោះការជួយធ្វើអន្តរាគមន៍ពន្លត់អគ្គិភ័យនេះគឺសមត្ថកិច្ចនគរបាលក្រុងកំពតសហការជាមួយកម្លាំងនគរបាលនៃស្នងការដ្ឋាននគរបាលខេត្តកំពត។ ខាងស្នងការដ្ឋាននគរបាលខេត្តបានប្រើប្រាស់រថយន្តពន្លត់អស់ ៣ គ្រឿង ហើយអធិការដ្ឋាននគរបាលប្រើរថយន្តទឹកអស់ ៣ គ្រឿងទៀត។
លោកបន្តថា ក្នុងហេតុការណ៍ឆេះនេះ បើតាមមន្ត្រីជំនាញខាងពន្លត់អគ្គិភ័យរបស់ការិយាល័យនគរបាលបង្ការ និងពន្លត់អគ្គិភ័យខេត្តកំពតបង្ហាញថា សម្ភារដែលមាននៅក្នុងហាង ភាគច្រើនជាសម្ភារគ្រឿងម៉ូតូ ហើយត្រូវបានឆេះខូចខាតស្ទើរទាំងស្រុង។
លោកបន្ថែមថា៖ «ព័ត៌មានបឋមដែលបានមកពីម្ចាស់ផ្ទះគាត់ប្រាប់សមត្ថកិច្ចយើងថា ការឆេះនេះបណ្តាលមកពីឆ្លងចរន្តអគ្គិសនី។ សមត្ថកិច្ចរបស់យើង រួមទាំងមន្ត្រីជំនាញពន្លត់អគ្គិភ័យខេត្តបានប្រើមធ្យោបាយបាញ់ទឹកធ្វើការទប់ស្កាត់ភ្លើងមិនឱ្យរាលដាលដល់ផ្ទះជិតខាងបានជោគជ័យ»៕
វីដេអូ៖
