.jpg)
មន្ត្រីនគរបាល នៅអគ្គនាយកដ្ឋានអន្តោប្រវេសន៍ ជួបប្រជុំកន្លងមក។ រូបថត នគរបាល
ភ្នំពេញៈ មន្ត្រីជំនាញនៃអគ្គនាយកដ្ឋានអន្តោប្រវេសន៍គ្រោងនឹងចុះធ្វើបច្ចុប្បន្នភាពសាកល្បងនៃការស្នាក់នៅរបស់ជនអន្តោប្រវេសន៍ក្នុងសង្កាត់បឹងកេងកង ខណ្ឌបឹងកេងកងក្នុងពេលឆាប់ៗ និងបន្ទាប់មក នឹងធ្វើនៅសង្កាត់មួយនៅខេត្តព្រះសីហនុ ដើម្បីប្រមូលយកបទពិសោធ មុននឹងឈានទៅធ្វើបច្ចុប្បន្នភាពជនអន្តោប្រវេសន៍ទូទាំងប្រទេស។
ការគ្រោងចុះធ្វើបច្ចុប្បន្នភាពជនបរទេសសាកល្បងនេះ ធ្វើឡើងបន្ទាប់ពីរកឃើញថាទិន្នន័យនៅក្នុងប្រព័ន្ធគ្រប់គ្រងជនបរទេស FPCS ខុសពីទិន្នន័យនៅតាមគោលដៅជាក់ស្តែង។
លោកឧត្តមសេនីយ៍ឯក អ៊ុក ហៃសីឡា អគ្គនាយករងនៃអគ្គនាយកដ្ឋានអន្តោប្រវេសន៍ថ្លែងនៅថ្ងៃទី ៨ ខែធ្នូថា ការធ្វើការងារជាមួយនគរបាលប៉ុស្តិ៍រដ្ឋបាលសង្កាត់បឹងកេងកងក្នុងពេលកន្លងមក តាមរយៈការផ្ទៀងផ្ទាត់តាមបញ្ជីស្នាមបង្ហាញថា ទិន្នន័យខ្លះមានក្នុងប្រព័ន្ធអនឡាញ FPCS ប៉ុន្តែមិនមាននៅក្នុងគោលដៅជាក់ស្តែង។ ហេតុនេះ មន្ត្រីជំនាញអគ្គនាយកដ្ឋានអន្តោប្រវេសន៍នឹងចុះទៅពិនិត្យជាក់ស្តែង នៅតាមគោលដៅដែលដំបូងនឹងធ្វើសាកល្បងនៅសង្កាត់បឹងកេងកង ខណ្ឌបឹងកេងកង រាជធានីភ្នំពេញក្នុងពេលឆាប់ខាងមុខ។
លោកថ្លែងថា៖ «ដោយមានការអនុញ្ញាតពីឯកឧត្តម នាយឧត្តមសេនីយ៍អគ្គនាយក គាត់ឱ្យយើងចុះផ្ទាល់ទៅដល់ទីតាំងតែម្តង យើងដាក់ទីតាំងទៅ។ ឧទាហរណ៍ថា ឥឡូវសង្កាត់បឹងកេងកងមាន ១០០ គោលដៅ តែនគរបាលប៉ុស្តិ៍គាត់ថា អត់មានទេមានតែ ៨០ អ៊ីចឹង ២០ ហ្នឹងយើងត្រូវតែពិនិត្យជាក់ស្តែង ថាតើយ៉ាងម៉េច បានក្នុងគោលដៅហ្នឹងមាននៅក្នុងប្រព័ន្ធ តែម្ចាស់គោលដៅគេថាអត់មាន»។
លោក អ៊ុក ហៃសីឡា ប្រាប់ថា ក្រោយពីការសាកល្បងធ្វើនៅសង្កាត់បឹងកេងកង មន្ត្រីជំនាញក៏នឹងធ្វើនៅសង្កាត់មួយទៀតក្នុងខេត្តព្រះសីហនុ។ នៅពេលបានលទ្ធផលនឹងប្រជុំដកបទពិសោធរួចនឹងណែនាំទៅដល់សមត្ថកិច្ចនគរបាលរាជធានី- ខេត្តដើម្បីអនុវត្តនៅទូទាំងប្រទេសតែម្តង។ បើតាមលោក ហៃសីឡា កន្លងមកមានការធ្វើប្រតិបត្តិការបឋមក្នុងការត្រួតពិនិត្យ ផ្ទៀងផ្ទាត់ការងារគ្រប់គ្រងជនបរទេសតាមប្រព័ន្ធ FPCS នៅក្នុងសង្កាត់ចំនួន ២ គឺនៅរាជធានីភ្នំពេញ និងមួយទៀតនៅខេត្តព្រះសីហនុបានបង្ហាញ ដំណើរការចុះបញ្ជីជនបរទេសតាមប្រព័ន្ធ FPCS បានដំណើរការល្អប្រសើរក្នុងការគ្រប់គ្រងការស្នាក់នៅរបស់ជនបរទេស នៅព្រះរាជាណាចក្រកម្ពុជា។
ប៉ុន្តែក៏នៅមានបញ្ហាមួយចំនួនដែលត្រូវធ្វើការកែលម្អ និងធ្វើឱ្យទំនើបបន្ថែមទៀតដូចជាបញ្ហាដែលបានរកឃើញរួមមានគណនីដែលមិនបញ្ជាក់ទីតាំងច្បាស់លាស់គណនីដែលមិនដំណើរការ ឬគ្មានទិន្នន័យ គណនីដែលព័ត៌មានមិនគ្រប់ ឬគណនីដែលស្ទួន និង បញ្ហាម្ចាស់លំនៅឋានមាន ការធ្វេសប្រហែសមិនគោរពច្បាប់ជាដើម។
លោកបញ្ជាក់ថា៖ «ម្ចាស់លំនៅឋានខ្លះ គាត់ជាខ្មែរហ្នឹង គាត់ឱ្យជនបរទសដែលស្នាក់នៅចុះដោយខ្លួនឯង បង្កើតអាខោនដោយខ្លួនឯង ប៉ុន្តែក្នុងលក្ខខណ្ឌយើងអត់បានទេ គឺបានតែម្ចាស់លំនៅឋានទេ។ បើជនបរទេសហ្នឹង ជាម្ចាស់លំនៅឋានគាត់ចុះបានតែបើជនបរទេសដែលស្នាក់នៅកន្លែងគាត់ អាហ្នឹងក៏ត្រូវចុះឱ្យគេដែរ អត់អាចឱ្យគេចុះខ្លួនឯងទេ»។
ក្នុងកិច្ចប្រជុំស្តីពីលទ្ធផលនៃកិច្ចប្រតិបត្តិការបឋមក្នុងការត្រួតពិនិត្យ ផ្ទៀងផ្ទាត់ ការងារគ្រប់គ្រងជនបរទេសតាមប្រព័ន្ធ FPCS កាលពីថ្ងៃទី ៧ ខែធ្នូ លោកនាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍បានជំរុញដល់ក្រុមការងារ បន្តធ្វើយ៉ាងណា ត្រូវរៀបចំផែនការការងារមួយច្បាស់លាស់ក៏ដូចជាបញ្ហាបច្ចេកទេសឱ្យកាន់តែសុក្រិត្យ ដើម្បីប្រសិទ្ធភាពការងារក្នុងការគ្រប់គ្រងជនបរទេសតាមប្រព័ន្ធ FPCS នាពេលខាងមុខ។
លោកថា៖ «គោលបំណងសំខាន់របស់អគ្គនាយកដ្ឋានអន្តោប្រវេសន៍ក្នុងការប្រើប្រាស់ប្រព័ន្ធ FPCS នេះគឺដើម្បីបំពេញកាតព្វកិច្ចរបស់ខ្លួនក្នុងការគ្រប់គ្រងជនបរទេសដែលកំពុងស្នាក់នៅក្នុងព្រះរាជាណាចក្រកម្ពុជាឱ្យបានច្បាស់លាស់ និងមានប្រសិទ្ធភាព ដែលជាការចូលរួមក្នុងការអភិវឌ្ឍ និងការថែរក្សាសន្តិសុខសុវត្ថិភាពរបស់ជាតិមាតុភូមិ»៕
វីដេអូ៖
