ភ្នំពេញៈ ក្រសួងអប់រំ យុវជន និងកីឡា នៅថ្ងៃទី ៩ ធ្នូនេះបានធ្វើសិក្ខាសាលាណែនាំស្តីពីតួនាទី និងភារកិច្ចរបស់ជំនួយការអប្បមាទនៅទូទាំងប្រទេសជាង ១ ៥០០ នាក់សម្រាប់ត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡងនាថ្ងៃ ២៧-២៨ ធ្នូ ២០២១ ខណៈបេក្ខជនប្រឡងឆ្នាំនេះមានចំនួនសរុប ១១៥ ១៣៩។ នេះបើតាមមន្ដ្រីអ្នកនាំពាក្យក្រសួងអប់រំ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងប្រាប់ភ្នំពេញ-ប៉ុស្ដិ៍នៅថ្ងៃទី ៩ ធ្នូ ថា នៅថ្ងៃទី ៩ ខែធ្នូនេះក្រសួងអប់រំបានធ្វើសិក្ខាសាលាណែនាំស្តីពីតួនាទី និងភារកិច្ចរបស់ជំនួយការអប្បមាទទូទាំងប្រទេស សម្រាប់ត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង នាថ្ងៃ ២៧-២៨ ធ្នូ ២០២១ ដើម្បីឱ្យដំណើរការប្រឡងសញ្ញាបត្រមធ្យមសិក្សាទុតិយភូមិឆ្នាំនេះប្រព្រឹត្តទៅស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន។
លោកបានថ្លែងថា៖ «ដើម្បីឱ្យដំណើរការប្រឡងសញ្ញាបត្រមធ្យមសិក្សាទុតិយភូមិ នាថ្ងៃ ២៧-២៨ ធ្នូ ២០២១ ប្រព្រឹត្តទៅស្របតាមគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ទន្ទឹមនឹងវិធានការសុវត្ថិភាពសុខភាព ក្រសួងអប់រំ បានរៀបចំសិក្ខាសាលាស្ដីពីតួនាទីភារកិច្ចរបស់ជំនួយការអប្បមាទទូទាំងប្រទេស ដែលសិក្ខាសាលានេះបានប្រព្រឹត្តទៅព្រមគ្នាទូទាំងប្រទេស»។
លោកបញ្ជាក់ថា អង្គសិក្ខាសាលាមានគោលបំណងផ្តោតលើប្រធានបទចំនួន ៤ គឺទី ១ ការរៀបចំយន្តការដំណើរការមណ្ឌលសំណេរ។ ទី ២ តួនាទី និងភារកិច្ចរបស់គណៈកម្មការអប្បមាទទូទាំងប្រទេស។ ទី ៣ តួនាទី និងភារកិច្ចរបស់ជំនួយការអប្បមាទទូទាំងប្រទេស។ ទី ៤ បទប្បញ្ញត្តិ និងកម្រិតវិន័យចំពោះបុគ្គលិកអប់រំ ក្នុងការប្រឡងសញ្ញាបត្រមធ្យមសិក្សាទុតិយភូមិ។
លោក រស់ សុវាចា បានថ្លែងថា ក្រសួងអប់រំបានចេញសេចក្តីណែនាំប្រតិបត្តិស្ដីពីវិធានការសុខភាព និងសុវត្ថិភាព សម្រាប់ការប្រឡងសញ្ញាបត្រមធ្យមសិក្សាទុតិយភូមិ ដើម្បីធានាបាននូវការការពារសុខភាព និងសុវត្ថិភាពជូនបុគ្គលិកអប់រំ និងសិស្សានុសិស្សទាំងអស់។
លោកបានឱ្យដឹងថា ទិន្នន័យបឋមគិតត្រឹមថ្ងៃទី ៩ ខែធ្នូនេះ ចំនួនបេក្ខជនប្រឡងសញ្ញាបត្រមធ្យមសិក្សាទុតិយភូមិ សរុប ១១៥ ១៣៩ នាក់ក្នុងនោះមានបេក្ខនារីចំនួន ៦០ ៦៦១ នាក់។ មណ្ឌលប្រឡងមាន ២០៤ មណ្ឌល បន្ទប់ប្រឡងមាន ៤ ៦៥២ បន្ទប់។ គណៈកម្មការអប្បមាទមាន ៦១២ នាក់ និងជំនួយការអប្បមាទមាន ១៥៧៨ នាក់។
លោក សុវាចា បានបញ្ជាក់ថា បេក្ខជនប្រឡងឆ្នាំនេះ ពិន្ទុដែលបេក្ខជនប្រឡងត្រូវធ្វើឱ្យបាន ដើម្បីប្រឡងជាប់គឺ ២៣៧ ពិន្ទុ នៃពិន្ទុសរុបចំនួន ៥០០ ពិន្ទុ។
កន្លងមក ក្រសួងអប់រំបានកំណត់យកកាលបរិច្ឆេទនៃការប្រឡងនេះនៅថ្ងៃទី ៦ ខែធ្នូ ឆ្នាំ ២០២១។ ប៉ុន្ដែក្រោយមកក្រសួងបានសម្រេចរំកិលកាលបរិច្ឆេទប្រឡងបាក់ឌុបទៅថ្ងៃ ២៧-២៨ ធ្នូ ២០២១ ដើម្បីទុកឱកាសជូនសិស្សថ្នាក់ទី ១២ មានពេលបន្ថែមដើម្បីរៀនត្រៀមសម្រាប់ការប្រឡង។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ប្រាប់អ្នកសារព័ត៌មានកាលពីថ្ងៃទី ៣ ខែវិច្ឆិកា កន្លងទៅនេះថា សាលាដែលបើកដំណើរការឡើងវិញមានជាង ១ ៣០០ សាលា ដែលមានសិស្សជាង ២ លាននាក់បានចូលរៀនឡើងវិញ។ លោកថ្លែងថា៖ «ការប្រឡងទៀតសោតគឺដើម្បីលើកទឹកចិត្តឱ្សសិស្សខំប្រឹងរៀន។ បើសិនជាយើងមិនឱ្យគាត់ប្រឡង គឺច្បាស់ជាគាត់ឈប់រៀន»៕