ភ្នំពេញៈ នាយកប្រតិបត្តិអង្គការតម្លាភាពកម្ពុជាអះអាងថា ក្នុងរយៈពេល ៣ ឆ្នាំចុងក្រោយនេះ ការប្រព្រឹត្តអំពើពុករលួយខ្នាតតូចនៅប្រទេសកម្ពុជាមានការថយចុះ គួរឱ្យកត់សម្គាល់ ប៉ុន្តែការប្រព្រឹត្តអំពើពុករលួយខ្នាតធំ នៅតែបន្តកើតមានដែលទាមទារឱ្យរដ្ឋាភិបាល និងប្រជាពលរដ្ឋចូលរួមទាំងអស់គ្នាប្រយុទ្ធប្រឆាំងនឹងអំពើពុករលួយនេះ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាប្រាប់ភ្នំពេញប៉ុស្តិ៍ ក្រោយប្រារព្ធពិធីអបអរសាទរទិវាជាតិ និងអន្តរជាតិ ស្តីពីការប្រយុទ្ធប្រឆាំងអំពើពុករលួយឆ្នាំ ២០២១ ក្រោមប្រធានបទ «សិទ្ធិយើង តួនាទីយើង» នាថ្ងៃទី ៩ ធ្នូ ឆ្នាំ ២០២១ ថា ការថយចុះនេះ ដោយសាររាជរដ្ឋាភិបាល តាមរយៈក្រសួងមហាផ្ទៃ អង្គភាពប្រឆាំងអំពើពុករលួយ រដ្ឋបាលថ្នាក់ក្រោមជាតិបានខិតខំប្រឹងប្រែងផ្សព្វផ្សាយ អប់រំ ទាក់ទងនឹងការប្រយុទ្ធប្រឆាំងអំពើពុករលួយ។ លោកថា ក្នុងរយៈពេល ៤-៥ ឆ្នាំកន្លងមកនេះ ការផ្តល់សេវាសាធារណៈរបស់ថ្នាក់ជាតិ និងថ្នាក់ក្រោមជាតិ ឃើញថា មានលក្ខណៈល្អប្រសើរជាងមុនដែលធ្វើឱ្យការកើតឡើងនៃអំពើពុករលួយមានតិចបំផុត។ ប៉ុន្តែនៅមានបញ្ហាច្រើនដែរ ជាពិសេសអំពើពុករលួយ ខ្នាតធំនៅតែបន្តកើតមានដដែល។
លោកថ្លែងថា៖ «យើងមិនមានតួលេខទេ ប៉ុន្តែយើងបានសួរនាំប្រជាពលរដ្ឋ ហើយគាត់ឆ្លើយថា ការបង់ប្រាក់ក្រៅសេវា សេវាសាធារណៈ [ជាអំពើពុករលួយតូចៗ] មានការថយចុះ។ ប៉ុន្តែនៅមានបញ្ហាអំពើពុករលួយខ្នាតធំ គឺនៅមាន នៅតាមក្រសួង និងថ្នាក់ក្រោមជាតិ»។
បើតាមលោក ពិសី ទិវាអន្តរជាតិ ប្រយុទ្ធប្រឆាំងអំពើពុករលួយត្រូវបានគេប្រារព្ធធ្វើជារៀងរាល់ឆ្នាំនៅថ្ងៃទី ៩ ធ្នូ។ ជាពិសេសប្រទេសដែលមានហត្ថលេខីលើសច្ចាប័នអំពីអនុសញ្ញាស្តីពីការប្រឆាំង អំពើពុករលួយ ដែលជាយន្តការរបស់អង្គការសហប្រជាជាតិ។ ក្នុងឆ្នាំនេះ អង្គការតម្លាភាពបានប្រារព្ធធ្វើនៅ ២ ខេត្ត គឺខេត្តកំពត និងបាត់ដំបង ដើម្បីជំរុញឱ្យមន្ត្រីសាធារណៈ សង្គមស៊ីវិល និងឯកជនទាំងអស់ត្រូវមានតួនាទីក្នុងការប្រយុទ្ធប្រឆាំងអំពើពុករលួយនេះ។ ជាពិសេសផ្តល់សំឡេងឱ្យពលរដ្ឋនៅខេត្ត ចំពោះការយល់ឃើញរបស់ពួកគាត់ជុំវិញ ការទាមទារក្នុងការបង្កើនការប្រឆាំងអំពើពុករលួយ និងសុចរិតភាពឱ្យកាន់តែល្អប្រសើរជាងបច្ចុប្បន្ន។
លោក អ៊ឹម ណារិន នាយកកម្មវិធីអង្គការតម្លាភាពកម្ពុជាថ្លែងថា អំពើពុករលួយមានទម្រង់ជាច្រើន មិនថាក្នុងរូបភាពជាការសូកប៉ាន់ ការបង្វែរមូលនិធិរបស់រដ្ឋ ដើម្បីប្រើប្រាស់ផលប្រយោជន៍ជាឯកជន ការប្រើប្រាស់តួនាទីដើម្បីប្រយោជន៍ផ្ទាល់ខ្លួន និងបញ្ហាបក្ខពួកនិយម ឥទ្ធិពលរបស់ធុរជនទៅលើមន្ត្រីសាធារណៈ ការកេងបន្លំចំណូលរបស់ជាតិ លំហូរហិរញ្ញវត្ថុទុច្ចរិត ក៏ដូចជាការលាងលុយកខ្វក់ជាដើម ទាំងនេះ គឺជាទម្រង់នៃអំពើពុករលួយ។
លោកបន្តថា ប៉ុន្តែអ្វីដែលត្រូវយកចិត្តទុកដាក់ធ្វើបំផុតនោះ គឺផលប៉ះពាល់នៃអំពើពុករលួយ ពីព្រោះវាមានទំហំធំណាស់។
លោក អ៊ឹង ឆាយ អភិបាលរងខេត្តកំពតថ្លែងក្នុងពិធីនោះដែរថា ប្រទេសកម្ពុជាបានចូលរួមប្រយុទ្ធប្រឆាំងអំពើពុករលួយ ដែលអំពើពុករលួយនេះ គឺជាដំបៅសង្គម ដែលមិនអាចឱ្យសង្គមមានការអភិវឌ្ឍទៅមុខបានលឿនទេ។ រដ្ឋបាលខេត្តកំពត និងរាជរដ្ឋាភិបាលតែងតែយកចិត្តទុកដាក់ទប់ស្កាត់ប្រយុទ្ធនឹងអំពើពុករលួយនេះជានិច្ចកាល។
លោកថា គោលនយោបាយរបស់រាជរដ្ឋាភិបាលបាននិងកំពុងយកចិត្តទុកដាក់ ជាពិសេសជំរុញរដ្ឋបាលថ្នាក់ក្រោមជាតិឱ្យមានការអនុវត្តតួនាទីភារកិច្ចរបស់ខ្លួនត្រឹមត្រូវ និងកំណែទម្រង់ស៊ីជម្រៅរហូតមកដល់ពេលនេះ។ គោលនយោបាយនេះ ធ្វើយ៉ាងណា បម្រើសេវាជូនប្រជាពលរដ្ឋ បានឆាប់រហ័ស។ លោកថា៖ «យន្តការសម្រាប់រដ្ឋបាលថ្នាក់ក្រោមជាតិនេះ បានធ្វើការកំណែទម្រង់យ៉ាងស៊ីជម្រៅ ពិសេសដើម្បីតម្លាភាព គណនេយ្យភាព ប្រសិទ្ធភាព ស័ក្តិសិទ្ធិភាព និងលុបបំបាត់អំពើពុករលួយនេះ។ នៅថ្នាក់ខេត្ត យើងមានការិយាល័យច្រកចេញចូលតែ ១ ដោយប្រមូលផ្តុំសេវាគ្រប់ទាំងអស់របស់ខេត្តឱ្យនៅច្រកចេញ-ចូលតែ ១ ដើម្បីកាត់បន្ថយការចំណាយ ការរត់ការ និងចំណាយពេលវេលាយូរ»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបដិសេធអធិប្បាយ នាថ្ងៃទី ៩ ធ្នូ៕