ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវជាថ្មីដល់អ្នកសារព័ត៌មានឱ្យប្រកាន់ខ្ជាប់ក្រមសីលធម៌វិជ្ជាជីវៈសារព័ត៌មាន មានសុចរិតភាពក្នុងការផ្សព្វផ្សាយ ចៀសវាងការបំពានវិជ្ជាជីវៈធ្វើឱ្យប៉ះពាល់ដល់សេចក្តីថ្លៃថ្នូរស្ថាប័ន និងអ្នកសារព័ត៌មានអាជីពដែលអនុវត្តបានត្រឹមត្រូវ។
លោក ហ៊ុន សែន អំពាវនាវបែបនេះតាមរយៈសារលិខិតអបអរសាទរវេទិកានិពន្ធនាយកសារព័ត៌មានកម្ពុជាស្តីពី «កូវីដ ១៩៖ បញ្ហាប្រឈម និងឱកាសសម្រាប់អ្នកសារព័ត៌មាន» នៅថ្ងៃទី ១១ ធ្នូ»។
លោកថ្លែងថា៖ «ជាថ្មីម្តងទៀត ខ្ញុំសូមអំពាវនាវដល់ថ្នាក់ដឹកនាំស្ថាប័នសារព័ត៌មាន និងបងប្អូនអ្នកសារព័ត៌មាន ទាំងអស់សូមប្រកាន់ខ្ជាប់នូវក្រមសីលធម៌វិជ្ជាជីវៈសារព័ត៌មាន និងមានសុចរិតភាពក្នុងការបំពេញភារកិច្ច ចៀសវាងការបំពានច្បាប់ និងវិជ្ជាជីវៈដោយគិតតែប្រយោជន៍ផ្ទាល់ខ្លួនធ្វើឱ្យប៉ះពាល់ដល់កិត្តិយស សេចក្តីថ្លៃថ្នូរ កិត្យានុភាពស្ថាប័នសារព័ត៌មាន និងអ្នកសារព័ត៌មានអាជីពដែលអនុវត្តបានត្រឹមត្រូវតាមវិជ្ជាជីវៈ»។
តាមរយៈសារលិខិតនោះ លោកនាយករដ្ឋមន្ត្រីក៏អំពាវនាវដល់អ្នកសារព័ត៌មានឱ្យចូលរួមឱ្យកាន់តែសកម្មថែមទៀតក្នុងការប្រយុទ្ធប្រឆាំងនឹងជំងឺកូវីដ ១៩ ដោយធ្វើការផ្សព្វផ្សាយព័ត៌មានអប់រំ និងវិធានការរបស់រដ្ឋាភិបាលក្នុងការទប់ស្កាត់ជំងឺកូវីដ ១៩ ព្រមទាំងចូលរួមប្រយុទ្ធប្រឆាំងនឹងព័ត៌មានក្លែងក្លាយដោយផ្សព្វផ្សាយព័ត៌មានពិត និងធ្វើការបកស្រាយពន្យល់ ដើម្បីបន្សាបព័ត៌មានក្លែងក្លាយឱ្យបានទាន់សភាពការណ៍។
ក្នុងវេទិកានិពន្ធនាយកសារព័ត៌មានកម្ពុជាស្តីពី «កូវីដ ១៩៖ បញ្ហាប្រឈម និងឱកាសសម្រាប់អ្នកសារព័ត៌មាន» ថ្ងៃទី ១១ ធ្នូ នៅសណ្ឋាគារហ៊ីម៉ាវ៉ារី លោក ខៀវ កាញារីទ្ធ រដ្ឋមន្ត្រីក្រសួងព័ត៌មានថ្លែងថា បញ្ហាកូវីដ ១៩ បានបង្កការជ្រួលច្របល់ទូទាំងពិភពលោក មិនមែនតែនៅកម្ពុជាទេ ប៉ុន្តែការលេចឡើងថ្មីមួយទៀតនោះគឺការកើនឡើងច្រើនូវសារព័ត៌មានអនឡាញ។
លោកបន្តថា អ្នកណាក៏អាចធ្វើការជាអ្នកសារព័ត៌មានបានដែរគ្រាន់តែនៅពេលធ្វើត្រូវតែប្រកាន់ខ្ជាប់វិជ្ជាជីវៈ ប៉ុន្តែអ្នកព័ត៌មានមួយចំនួនមិនបានរវល់គិតគូរពីបញ្ហានេះទេសំខាន់គេធ្វើយ៉ាងណាផ្សាយផ្ទាល់ឱ្យមានចំនួនអ្នកមើលច្រើន និងទទួលបានចំណូលច្រើនប៉ុណ្ណោះ។
លោកថ្លែងថា៖ «អ្វីដែលសំខាន់ ពេលណាក្លាយជាអ្នកសារព័ត៌មានត្រូវប្រឹងប្រែងគោរពវិជ្ជាជីវៈ ហើយវិជ្ជាជីវៈអ្នកសារព័ត៌មាននេះ ជាអាវក្រោះរបស់យើងផង ការពារយើងផង លើកកិត្តិយសយើងផង បើយើងមិននាំគ្នាថែរក្សាវិជ្ជាជីវៈ ក្រមសីលធម៌របស់យើងទេ កាលណាយើងចុះនិយាយគេមិនស្តាប់គឺខ្លួនយើងផ្ទាល់ដែលទទួលផលវិបត្តិពីបញ្ហានេះ»។
លោក ប៉ែន បូណា ប្រធានក្លិបអ្នកកាសែតកម្ពុជាថ្លែងថា វិស័យសារព័ត៌មានដែលកំពុងទទួលរងផលប៉ះពាល់ ដោយសារជំងឺកូវីដ ១៩ គឺជាប្រធានបទមួយដែលត្រូវតែលើកយកមកពិភាក្សា។ លោកថា ២ ឆ្នាំជាប់គ្នាហើយដែលក្លិបអ្នកកាសែតលើកយកបញ្ហានេះមកពិភាក្សា ខណៈឆ្នាំនេះវេទិកានិពន្ធនាយកនឹងពិនិត្យមើលបញ្ហាប្រឈម និងឱកាសដែលកើតចេញពីបញ្ហាកូវីដ ១៩។ លោថ្លែងថា៖ «យើងនឹងរិះរកមធ្យោបាយទាំងអស់គ្នាត្រៀមខ្លួនថាតើថ្ងៃមុខត្រូវធ្វើអ្វី ដើម្បីប្រឈមមុខដោះស្រាយបញ្ហាណាមួយដែលកើតឡើងដូចកូវីដ ១៩ ដែលកើតមានពេលនេះជាដើម»៕