កំពង់ឆ្នាំងៈ អាជ្ញាធរខេត្តកំពង់ឆ្នាំង ប្រាប់អ្នកដែលចង់បម្រើសេវាកម្ម អនាម័យ និងបរិស្ថានដាក់ពាក្យស្នើសុំធ្វើអាជីវកម្មទៅរដ្ឋបាលក្រុង-ស្រុកដោយផ្ទាល់ និងភ្ជាប់តារាងឧបសម្ព័ន្ធ ដោយមាន បញ្ជី ចំណាយ លម្អិតលើសម្ភារ មធ្យោបាយ និងកម្លាំងពលកម្ម និងមិនត្រូវប្រើប្រាស់ឈ្មោះ តួនាទី មុខងារ ក្នុងស្ថាប័នបច្ចុប្បន្នឡើយ ចៀសវាងមានវិសមភាព។
លោក នៃ ចារី អភិបាលរងនៃគណៈអភិបាលខេត្តកំពង់ឆ្នាំង នៅសាលប្រជុំ គ៦ នៃសាលាខេត្តកំពង់ឆ្នាំង នៅថ្ងៃទី ១០ ខែធ្នូ ឆ្នាំ ២០២១ បានរៀបចំកិច្ចប្រជុំស្តីពីការពិនិត្យ ពិភាក្សាលើសំណើសុំធ្វើអាជីវកម្ម សេវាអនាម័យ និងបរិស្ថាន នៅក្រុងកំពង់ឆ្នាំង និងស្រុករលាប្អៀរ។
តាមរយៈកិច្ចប្រជុំនោះ លោកអភិបាលរងខេត្តកំពង់ឆ្នាំង បានសម្រេចឱ្យអ្នកដែលមានបំណងចង់បម្រើសេវាកម្ម អនាម័យ និងបរិស្ថានទៅដាក់ពាក្យស្នើសុំធ្វើអាជីវកម្មទៅរដ្ឋបាលក្រុង-ស្រុកដោយផ្ទាល់ និងភ្ជាប់តារាងឧបសម្ព័ន្ធ ដោយមាន បញ្ជីចំណាយ លម្អិតលើសម្ភារ មធ្យោបាយ និងកម្លាំងពលកម្ម។
ជាមួយគ្នានោះអភិបាលខេត្តនេះ បានណែនាំថា មិនត្រូវប្រើប្រាស់ឈ្មោះ តួនាទី មុខងារ ក្នុងស្ថាប័នបច្ចុប្បន្នឡើយ ចៀសវាងមានវិសមភាព។ បន្ថែមលើនោះត្រូវសហការអនុវត្តជាមួយរដ្ឋបាលក្រុង-ស្រុកពាក់ព័ន្ធ និងមន្ទីរអង្គភាពពាក់ព័ន្ធ ដោយអនុវត្តស្របតាមនីតិវិធីព្រមទាំងត្រូវបំពេញនីតិវិធីពាក់ព័ន្ធជាមួយនឹងក្រសួងស្ថាប័នឱ្យបានមុនសប្តាហ៍ទី ៤ ខែធ្នូ ឆ្នាំ ២០២១៕