មណ្ឌលគិរីៈ អភិបាលខេត្តមណ្ឌលគិរីបានជំរុញដល់មន្ទីរកសិកម្មរុក្ខាប្រមាញ់ និងនេសាទ មន្ទីរសាធារណការ និងដឹកជញ្ជូនខេត្ត អាជ្ញាធរក្រុងសែនមនោរម្យ រៀបចំធ្វើការកែលម្អនូវសោភ័ណភាពទីធ្លាសួនស្រល់ឱ្យមានបរិស្ថានល្អ ដើម្បីបង្កើនការទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកម្សាន្តក្នុងខេត្តមណ្ឌលគិរី បន្ថែមទៀត។
លោក ថង សាវុន អភិបាលនៃគណៈអភិបាលខេត្តមណ្ឌលគិរី នៅថ្ងៃទី ១១ ខែធ្នូ ឆ្នាំ ២០២១ នេះបានអញ្ជើញចុះពិនិត្យមើលទីតាំងដីសួនស្រល់របស់រដ្ឋ ស្ថិតនៅក្នុងក្រុងសែនមនោរម្យ ដែលគ្រប់គ្រងដោយមន្ទីរកសិកម្មរុក្ខាប្រមាញ់ និងនេសាទខេត្តមណ្ឌលគិរី។
ក្នុងការចុះពិនិត្យទីតាំងដីសួនស្រល់របស់រដ្ឋក្នុងភូមិសាស្ត្រខាងលើនេះ លោកអភិបាលខេត្តបានជំរុញដល់មន្ទីរកសិកម្មរុក្ខាប្រមាញ់ និងនេសាទ មន្ទីរសាធារណការ និងដឹកជញ្ជូនខេត្ត អាជ្ញាធរក្រុងសែនមនោរម្យ ធ្វើការគ្រប់គ្រងដីសួនស្រល់របស់រដ្ឋ និងរៀបចំធ្វើការកែលម្អនូវសោភ័ណភាពទីធ្លាសួនស្រល់ឱ្យមានបរិស្ថានល្អ ដើម្បីបង្កើនការទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកម្សាន្តក្នុងខេត្តមណ្ឌលគិរី កើនឡើងមួយកម្រិតទៀត៕