កណ្តាលៈ សមត្ថកិច្ចនគរបាលខេត្តកណ្តាលឃាត់រថយន្តមួយគ្រឿង ដឹកសាច់គោ សាច់ក្របី ចំនួន ៣ តោន កាលពីថ្ងៃទី ១០ ខែធ្នូ ឆ្នាំ ២០២១ ចំណុចផ្លូវជាតិលេខ ៣ ភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល ដែលលួចនាំចូលដោយខុសច្បាប់ពីប្រទេសវៀតណាមតាមច្រកភ្នំដិន។
សមត្ថកិច្ចនៃស្នងការដ្ឋាននគរបាលខេត្តកណ្តាលបានឱ្យដឹងថា លោកឧត្តមសេនីយ៍ត្រី លី សុជាតិ ស្នងការរងទទួលផែនប្រឆាំងបទល្មើសសេដ្ឋកិច្ច បានដឹកនាំកម្លាំងចុះបង្ក្រាបរថយន្ត ១ គ្រឿង ដឹកសាច់គោសាច់ក្របី ចំនួន ៣ តោន លួចនាំចូលខុសច្បាប់ពីប្រទេសវៀតណាម តាមច្រកភ្នំដិន។
ប្រតិបត្តិការនេះធ្វើឡើងនៅថ្ងៃទី ១០ ខែធ្នូ ឆ្នាំ ២០២១ វេលាម៉ោង ១១ និង ០០ នាទី ចំណុចផ្លូវជាតិលេខ ៣ ភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល។ ក្នុងប្រតិបត្តិការនេះ សមត្ថកិច្ចបានដកហូតវត្ថុតាងមួយចំនួនរួមមានរថយន្តមួយគ្រឿងម៉ាក SSANGYONG ពណ៌សពាក់ស្លាកលេខភ្នំពេញ 2H-3680។ សាច់គោ ម៉ាក AL-AMMAR ដាក់ប្រអប់ ក្រដាសពណ៌លឿង ចំនួន ៧៥ ប្រអប់ក្នុងមួយប្រអប់ចំនួន ២០ គីឡូក្រាម ស្មើនឹង ១ ៥០០ គីឡូក្រាម។ សាច់ក្របី ម៉ាក BLACK GOLD ប្រអប់ក្រដាសពណ៌សចំនួន ៧៥ ប្រអប់ក្នុងមួយប្រអប់ចំនួន ២០ គីឡូក្រាមស្មើនឹង ១ ៥០០ គីឡូក្រាម ។ សរុបសាច់គោ និងសាច់ក្របី ចំនួន ១៥០ ប្រអប់ស្មើនឹង ៣ ០០០ គីឡូក្រាម។
សមត្ថកិច្ចបញ្ជាក់ថា នៅថ្ងៃទី ១១ ខែធ្នូនេះ វត្ថុតាងសាច់គោ និងសាច់ក្របី ត្រូវបានយកទៅដុតកម្ទេចចោលទាំងអស់៕