.jpg)
មន្ត្រីអង្គការ WCS សហការជាមួយមន្ត្រីក្រសួងបរិស្ថាន វិទ្យានប៉ាស្ទ័រកម្ពុជា និងនាយកដ្ឋានសត្វព្រៃនិងជីវៈចម្រុះ ព្រមទាំងការិយាល័យផលិតកម្មនិងសុខភាពសត្វខេត្តសៀមរាប ចុះពិនិត្យស្រាវជ្រាវលើរីរុសផ្តាសាយបក្សីនៅព្រែកទាល់ រ៉ាមសារ ខេត្តបាត់ដំបង នាថ្ងៃទី៨ ធ្នូ។ រូបថត WCS
ភ្នំពេញៈ អង្គការសមាគមអភិរក្សសត្វព្រៃនៅកម្ពុជា (WCS) សហការជាមួយវិទ្យាស្ថានប៉ាស្ទ័រកម្ពុជា រដ្ឋបាលព្រៃឈើ និងក្រសួងបរិស្ថានកំពុងធ្វើការសិក្សាស្រាវជ្រាវអំពីមេរោគផ្តាសាយបក្សីលើប្រភេទបក្សីព្រៃ និងបក្សីស្រុកតាមតំបន់អភិរក្សក្នុងប្រទេសកម្ពុជា ដើម្បីរកមើលវីរុសផ្តាសាយបក្សីនិងលើកម្ពស់ការយល់ដឹងអំពីការឆ្លងនៃជំងឺផ្ដាសាយបក្សីដល់ពលរដ្ឋ។
លោក កែន សិរីរដ្ឋា ប្រធានអង្គការ WCS ប្រាប់ភ្នំពេញប៉ុស្ដិ៍ នៅថ្ងៃទី១២ ធ្នូ ថា កាលពីថ្ងៃទី៧-៨ ខែធ្នូ ឆ្នាំ២០២១ អង្គការ WCS សហការជាមួយវិទ្យាស្ថានប៉ាស្ទ័រកម្ពុជា នាយដ្ឋានសត្វព្រៃនិងជីវៈចម្រុះ និងមជ្ឈមណ្ឌលសង្គ្រោះសត្វព្រៃភ្នំតាម៉ៅនៃរដ្ឋបាលព្រៃឈើ នាយកដ្ឋានដីសើមទឹកសាបនៃក្រសួងបរិស្ថាន មន្ទីរបរិស្ថានខេត្តបាត់ដំបង និងការិយាល័យផលិតកម្ម និងសុខភាពសត្វខេត្តសៀមរាប បានធ្វើការសិក្សាស្រាវជ្រាវអំពីមេរោគផ្តាសាយបក្សីនៅតំបន់រ៉ាមសារព្រែកទាល់ និងជាតំបន់ស្នូលនៃមណ្ឌលបឹងទន្លេសាប ស្ថិតក្នុងស្រុកឯកភ្នំ ខេត្តបាត់ដំបង។
លោកឱ្យដឹងថា ការសិក្សាស្រាវជ្រាវនេះ បានផ្តោតសំខាន់លើការប្រមូលយកសំណាកពីសត្វស្លាបព្រៃ និងសត្វស្លាបស្រុកតាមទីតាំងដែលសត្វទាំង២ប្រភេទប្រើប្រាស់រួមគ្នា ស្ថិតក្នុងតំបន់ការពារធម្មជាតិចំនួន៤ គឺបឹងព្រែកល្ពៅក្នុងខេត្តតាកែវ អន្លង់ព្រីងក្នុងខេត្តកំពត បឹងស្នេហ៍ក្នុងខេត្តព្រៃវែង និងតំបន់រ៉ាមសារព្រែកទាល់ ។ ចំណែកសំណាកបក្សីទាំងអស់នឹងត្រូវយកទៅពិនិត្យដើម្បីរកមើលវីរុសផ្តាសាយបក្សី។
លោកសិរីរដ្ឋា ថ្លែងថា៖«ការសិក្សាស្រាវជ្រាវអំពីមេរោគផ្តាសាយបក្សី គឺជាផ្នែកមួយនៃផែនការរបស់អង្កការ WCS ដើម្បីធ្វើឯកសារមួយ ដើម្បីចងក្រងពីរបៀបនៃការយកសំណាក និងការពិនិត្យលើមេរោគមួយចំនួនលើបក្សីព្រៃ និងបក្សីស្រុក។ ពិសេសប្រភេទបក្សីដែលជាសត្វកម្រ។ កន្លងមកយើងធ្វើចោះចោះ ប៉ុន្ដែឥឡូវយើងចាប់ផ្ដើមពង្រីកទៅតាមតំបន់គោលដៅនៃការងារអភិរក្សរបស់យើង»។
លោកបានឱ្យដឹងថា បច្ចុប្បន្នក្រុមការងារទើបតែបានប្រមូលសំណាក និងមិនទាន់បានបញ្ជូនទៅមន្ទីរពិសោធន៍ ពិនិត្យនៅឡើយទេ។ ក្រុមការងារត្រូវការពេលវេលាមួយចំនួនទៀត លើការពិនិត្យសំណាកនេះ។
លោកសិរីរដ្ឋា ថ្លែងថា៖«យើងយកសំណាកពីសត្វបក្សីចម្រុះ ជាពិសេសប្រភេទពពួកសត្វកម្រដែលជិតផុតពូជ។ បើយើងរកឃើញថា មានសត្វបក្សីណាដែលមានសុខភាពមិនល្អ ដែលវាសំកុក ឬវាងាប់ គឺយើងយកសំណាកពិនិត្យមើលបក្សីទូទៅដែរ។ ប៉ុន្ដែ គោលដៅរបស់យើង គឺយើងសម្គាល់ទៅលើពពួកសត្វបក្សីកម្រ និងជិតផុតពូជប៉ុណ្ណោះ»។
លោកបន្តថាការយកសំណាកមកសិក្សាស្រាវជ្រាវនេះ គឺចង់ដឹងថាសត្វបក្សីនោះមានជំងឺអ្វីដែរទេ។ បើសិនជាយកសំណាកបានមកវិភាគនៅមន្ទីរពិសោធន៍ បើបក្សីនោះមានមេរោគផ្ដាសាយបក្សី ក្រុមការងារនឹងចាត់វិធានការ និងធ្វើការផ្សព្វផ្សាយដល់ប្រជាពលរដ្ឋកុំឱ្យបរបាញ់ ឬក៏ទទួលទានបក្សីទាំងនោះ ព្រោះអាចមានមេរោគឆ្លងមកមនុស្សបាន។
លោកញ្ជាក់ថា៖«គោលដៅសំខាន់របស់យើង គឺចង់លើកម្ពស់ការយល់ដឹងអំពីការឆ្លងនៃជំងឺផ្ដាសាយបក្សី។ នេះជាអ្វីដែលយើងចង់ធ្វើ»។
បើតាមលោកសិរីរដ្ឋា ការយកសំណាកនេះ ចំពោះសត្វបក្សីព្រៃ គឺបានយកសំណាក ដូចជា សត្វត្រយង សត្វទុង ជាដើមចំណែកសត្វស្រុក មានដូចជាសត្វមាន់ ទា ជាដើម។ លោកបានឱ្យដឹងថា ការសិក្សាស្រាវជ្រាវនេះ ទទួលបានការគាំទ្រមូលនិធិពីទីភ្នាក់ងារកាត់បន្ថយការគំរាមកំហែងនៃក្រសួងការពារជាតិសហរដ្ឋអាមេរិក៕
វីដេអូ៖
