ភ្នំពេញៈ សមត្ថកិច្ចជំនាញបានអំពាវនាវឱ្យប្រជាពលរដ្ឋ បង្កើនការប្រុងប្រយ័ត្នបន្ថែមទៀត ចំពោះបញ្ហាគ្រោះអគ្គិភ័យក្នុងរដូវរំហើយនេះ ខណៈមានគ្រោះអគ្គិភ័យបានកើតឡើងផ្ទួនៗគ្នាក្នុងរាជធានី-ខេត្តចំនួន ៣ ក្នុងរយៈពេលប៉ុន្មានថ្ងៃកន្លងមកនេះ បង្កឱ្យមានជនរងគ្រោះស្លាប់ និងរងរបួសចំនួន ៤ នាក់ខូចខាតលំនៅឋានសរុបជិត ១០០ ខ្នង និងខូចខាតដំណាំអំពៅ ៤០ ហិកតា។
ប្រធាននាយកដ្ឋានបង្ការពន្លត់អគ្គិភ័យ និងសង្គ្រោះនៃក្រសួងមហាផ្ទៃលោក នេត វន្ថា បានថ្លែងថា៖ «សូមបង្កើនការប្រុងប្រយ័ត្ន ចំពោះការប្រើប្រាស់ភ្លើង ទាំងសម្រាប់ការដាំស្ល ឬដុតកម្ទេចសំរាម និងស្មៅនៅក្នុងចម្ការស្រែ ព្រោះក្នុងរដូវរំហើយនេះមានខ្យល់បក់បោកខ្លាំង ងាយបង្កជាគ្រោះអគ្គិភ័យ។ ទន្ទឹមនឹងនេះ ការប្រើឧបករណ៍អគ្គិសនីចាស់ៗ ក៏ងាយនឹងបង្កឱ្យផ្ទុះឆ្លងចរន្តអគ្គិសនី បង្កជាគ្រោះអគ្គិភ័យផងដែរ»។
បើតាមលោក វន្ថា នៅក្នុងរយៈពេល ១២ ថ្ងៃនៃខែធ្នូ ឆ្នាំ ២០២១ នេះ គ្រោះអគ្គិភ័យបានកើតឡើងចំនួន ៨ លើកនៅក្នុងរាជធានី-ខេត្តចំនួន ៤ រួមមាន ភ្នំពេញ សៀមរាប ក្រចេះ និង ខេត្តស្វាយរៀងបណ្ដាលឱ្យមានជនរងគ្រោះស្លាប់ចំនួន ៥ នាក់ និងរងរបួស ៣ នាក់ ខូចខាតលំនៅឋានសរុប ៩៥ ខ្នង និង ខូចខាតដំណាំអំពៅប្រមាណ ៤០ ហិកតា។ លោកបញ្ជាក់ថា៖ «ករណីគ្រោះអគ្គិភ័យនេះ ភាគច្រើនបណ្ដាលមកពីការផ្ទុះឆ្លងចរន្តអគ្គិសនី និងភ្លើង [អុស ធ្យូង ចង្ក្រានហ្គាស និងធូបទៀន] ខ្វះការប្រុងប្រយ័ត្ន»។
ស្រដៀងគ្នានេះលោក ព្រំ យ៉ន ប្រធានការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញថ្លែងថា ការភ្ជាប់ខ្សែបណ្ដាញអគ្គិសនី មិនត្រូវតាមបទដ្ឋានបច្ចេកទេស និងការប្រើប្រាស់ឧបករណ៍អគ្គិសនីចាស់ៗ ព្រមទាំងកង្វះខាតការត្រួតពិនិត្យមុនពេល និងក្រោយការប្រើប្រាស់ឧបករណ៍អគ្គិសនីជាកត្តាបង្កឱ្យមានគ្រោះអគ្គិភ័យកើតឡើង។
លោកថ្លែងថា៖ «មានសំណង់មិនរៀបរយជាច្រើន នៅរាជធានីភ្នំពេញយើងតំបន់ដែលមានសំណង់មិនរៀបរយទាំងនោះ មានការភ្ជាប់ខ្សែបណ្ដាញអគ្គិសនី ខ្វែងខ្វាត់ និងមិនសមស្របតាមលក្ខណៈបច្ចេកទេស ដែលងាយបង្កឱ្យកើតមានការផ្ទុះឆ្លងចរន្តអគ្គិសនី ក្លាយជាគ្រោះអគ្គិភ័យនៅពេលមានការប្រើប្រាស់ឧបករណ៍អគ្គិសនីចាស់ៗ ដែលស្រូបទាញថាមពលអគ្គិសនីច្រើនហួសពីបរិមាណកំណត់»។
បើតាមលោក ព្រំ យ៉ន ក្នុងរយៈពេល ១២ ថ្ងៃនៃខែធ្នូនេះ គ្រោះអគ្គិភ័យបានកើតឡើងចំនួន ៥ លើកក្នុងនោះនៅក្នុងខណ្ឌឫស្សីកែវ ចំនួន ២ លើក នៅខណ្ឌសែនសុខ ចំនួន ២ លើក និងនៅខណ្ឌដូនពេញ ១ លើក បណ្ដាលឱ្យខូចខាតផ្ទះសរុប ៩៥ ខ្នង ប៉ុន្តែមិនបង្កឱ្យមានជនរងគ្រោះស្លាប់ និងរងរបួសនោះទេ។
ចំណែកលោក ច្រឹង ផល្លី ស្នងការរងខេត្តក្រចេះទទួលបន្ទុកផ្នែកស្ថិតិ និងអាវុធជាតិផ្ទុះបានប្រាប់ភ្នំពេញប៉ុស្តិ៍ថា ការផ្ទេរសាំងពីប៊ីដុងទៅដប ឬពីរថយន្តស៊ីទែនដឹកសាំងចូលទៅក្នុងស៊ីទែនស្តុកសាំងក្នុងស្ថានីយ ដែលខ្វះការប្រុងប្រយ័ត្ន ឬខុសបច្ចេកទេសអាចបង្កឱ្យមានគ្រោះអគ្គិភ័យកើតឡើង និង ធ្វើឱ្យខូចខាតដល់ទ្រព្យសម្បត្តិ និងអាយុជីវិតចំពោះខ្លួនឯង និងអ្នកដទៃ។
លោក ផល្លី បានលើកយកករណីគ្រោះអគ្គិភ័យ ១ ដែលបានកើតឡើងកាលពីថ្ងៃទី ១០ ធ្នូ នៅចំណុចភូមិឈើទាលភ្លោះក្រោម ឃុំកញ្ជរ ស្រុកឆ្លូង ដែលមានជនរងគ្រោះជាក្មេងស្រី ២ នាក់ស្លាប់ និងឪពុកម្ដាយរបស់ពួកគេ ២ នាក់ទៀតរងរបួស មកពន្យល់ថា ករណីគ្រោះអគ្គិភ័យនោះ គឺបណ្ដាលមកពី «ជនរងគ្រោះជាឪពុក និងជាប្ដីខ្វះការប្រុងប្រយ័ត្ន» ធ្វើឱ្យដួលរលំដបសាំងហូរទៅប៉ះចង្ក្រានហ្គាស ដែលស្ត្រីជាប្រពន្ធកំពុងដាំស្ល បណ្ដាលឱ្យឆាបឆេះផ្ទះ។
លោកបញ្ជាក់ថា៖ «ការធ្វេសប្រហែសតែ ១ ប៉ប្រិចភ្នែក របស់បុរសជាឪពុកនោះ បានធ្វើឱ្យទ្រព្យសម្បត្តិ ទាំងអស់នៅក្នុងផ្ទះឆេះខូចខាតអស់ទាំងស្រុង ព្រមទាំងបណ្ដាលឱ្យកូនស្រីវ័យ ២ ឆ្នាំម្នាក់ស្លាប់ភ្លាមៗនៅនឹងកន្លែង និងកូនស្រីវ័យ ៤ ឆ្នាំម្នាក់ទៀតបានរងរបួសធ្ងន់ ហើយស្លាប់ពេលបញ្ជូនទៅកាន់មន្ទីរពេទ្យនៅភ្នំពេញ។ ចំណែកបុរសជាឪពុក និងស្ត្រីជាប្រពន្ធ ក៏រងរបួសមធ្យមផងដែរ»។
រីឯលោក ហាស សាលី អធិការរងស្រុកស្វាយទាប ខេត្តស្វាយរៀងបានលើកឡើងថា ការបោះកន្ទុយបារី ឬការដុតជញ្ជ្រាំងស្រូវនៅក្នុងដីស្រែ ដោយខ្វះការប្រុងប្រយ័ត្នក៏នឹងបង្កឱ្យមានគ្រោះអគ្គិភ័យកើតឡើងផងដែរ។ លោកថ្លែងប្រាប់ភ្នំពេញប៉ុស្តិ៍ថា កាលពីរសៀលថ្ងៃទី ១០ ខែធ្នូ មានគ្រោះអគិ្គភ័យមួយកើតឡើងនៅចំណុចភូមិកំពោតទូក ឃុំគគីរសោម ស្រុកស្វាយទាប បណ្ដាលឱ្យខូចខាតដំណាំអំពៅ សរុប ៤០ ហិកតារបស់ក្រុមហ៊ុន កុយ ឈី និងក្រុមហ៊ុន សុផាត។
លោកថ្លែងថា៖ «ចម្ការអំពៅរបស់ក្រុមហ៊ុនទាំង ២ នេះ គឺឆេះជារៀងរាល់ឆ្នាំ ឱ្យតែជិតដល់ពេលប្រមូលផល ហើយករណីនេះសមត្ថកិច្ចបានដាក់ការសង្ស័យថា មានការលួចដុតពីក្រុមជនមិនស្គាល់មុខ ឬការបោះភ្លើងកន្ទុយបារីចោលនៅក្នុងចម្ការអំពៅនោះក្នុងចេតនាធ្វើឱ្យឆេះ ហើយករណីនេះសមត្ថកិច្ចយើងកំពុងធ្វើការស្រាវជ្រាវ»។
យោងតាមទិន្នន័យដែលភ្នំពេញ-ប៉ុស្តិ៍ទទួលបាន គ្រោះអគ្គិភ័យនៅក្នុងឆ្នាំ ២០២១ គិតត្រឹមថ្ងៃទី ១២ ខែធ្នូ បានបង្កឱ្យមនុស្សចំនួន ២៥ នាក់ ស្លាប់ និង ៣៨ នាក់ទៀតរងរបួស និងខូចខាតផ្ទះសំបែងជាង ៦០០ ខ្នង តូបលក់ដូរ ២២០ តូប និងទ្រព្យសម្បត្តិគិតជាទឹកប្រាក់រាប់ពាន់លានដុល្លារ៕
វីដេអូ៖