ជារៀងរាល់ឆ្នាំ នៅថ្ងៃទី ៣ ខែធ្នូ ព្រះរាជាណាចក្រកម្ពុជាតែងបានប្រារព្ធពិធីជួបជុំ ដើម្បីអបអរសាទរទិវាជនមានពិការភាពជាតិ និងអន្តរជាតិយ៉ាងអធិកអធម។ ជាអកុសល ដោយសារកូវីដ ១៩ នៅថ្ងៃទី ៣ ខែធ្នូ ឆ្នាំ ២០២១ នេះ កម្ពុជាមិនបានប្រារព្វទិវាអបអរសាទរជនមានពិការភាពកម្ពុជាលើកទី ២៣ និងអន្តរជាតិលើកទី ៣៩ ដែលបានកំណត់ក្រោមប្រធានបទ «ភាពជាអ្នកដឹកនាំ និងការចូលរួមរបស់ជនមានពិការភាព ដើម្បីឆ្ពោះទៅរកការស្តារឡើងវិញ ក្រោយកូវីដ ១៩ ប្រកបដោយបរិយាប័ន្ន ផាសុកភាព និងចីរភាព» ឡើយ។
ទោះបីទិវាមិនត្រូវបានរៀបចំអឹកធឹកដូចបណ្តាឆ្នាំមុនៗក្តី ក៏ព្រះករុណាព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រជាទីសក្ការៈដ៏ខ្ពង់ខ្ពស់បំផុត និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានចេញព្រះរាជសារ និងសារលិខិតដោយឡែកពីគ្នាដែលមានខ្លឹមសារបង្ហាញពីការនឹករឭក ការយកចិត្តទុកដាក់ចំពោះសុខ ទុក្ខ សុខុមាលភាពកូនចៅ និងជនរួមជាតិដែលមានពិការភាពនៅកម្ពុជា ជាពិសេសក្នុងស្ថានភាពកូវីដ-១៩ដ៏អាក្រក់នេះ។
ក្នុងព្រះរាជសារ ព្រះមហាក្សត្របានអំពាវនាវដល់បងប្អូនជនរួមជាតិ ពិសេសបងប្អូនមានពិការភាពទៅទទួលវ៉ាក់សាំងឱ្យបានគ្រប់ៗគ្នាតាមការណែនាំរបស់រាជរដ្ឋាភិបាលកម្ពុជា ក្រសួងសុខាភិបាល និងសូមបន្តអនុវត្តវិធានការសុខាភិបាល «៣កុំ ៣ការពារ» ដែលដាក់ចេញដោយសម្តេចអគ្គមហាសេនាបតីតេជោនាយករដ្ឋមន្ត្រីនៃព្រះរាជាណាចក្រកម្ពុជា។
តាមគំនិតខ្ញុំ ទិវាជាតិជនពិការថ្ងៃទី ៣ ខែធ្នូ ជាថ្ងៃដ៏ល្អ និងមានអត្ថប្រយោជន៍ជាច្រើនសម្រាប់ប្រជាជនទូទៅ ជាពិសេសសម្រាប់ជនពិការឱ្យកាន់តែប្រសើរឡើង ស្វែងយល់ពីច្បាប់ស្តីពីការការពារ និងការលើកកម្ពស់សិទ្ធិជនពិការ។
វាក៏បង្ហាញពីការយកចិត្តទុកដាក់របស់រដ្ឋាភិបាលក្នុងការលើកកម្ពស់សិទ្ធិជនពិការ និងលើកកម្ពស់សិទ្ធិនេះឱ្យកាន់តែទូលំទូលាយ។ ជាងនេះទៅទៀត ដើម្បីលើកទឹកចិត្តជនពិការឱ្យចូលរួមសកម្មភាពផ្សេងៗក្នុងសង្គម ក៏ដូចជាការផ្តល់ឱកាសការងារនៅក្នុងស្ថាប័ន សាធារណៈ និងអង្គការឯកជន ដោយគ្មានការរើសអើង។
ហើយការយល់ដឹង និងការលើកកម្ពស់ជនមានពិការភាព មិនមែនមនុស្សតែម្នាក់ ឬស្ថាប័នមួយអាចធ្វើបាននោះទេ ប៉ុន្តែមនុស្សគ្រប់រូប និងស្ថាប័នពាក់ព័ន្ធត្រូវចូលរួម និងប្រើប្រាស់គ្រប់ទម្រង់នៃការផ្សព្វផ្សាយពីថ្នាក់ជាតិដល់សហគមន៍ និងការតស៊ូមតិ ដើម្បីលុបបំបាត់ការរើសអើង និងផ្លាស់ប្តូរទម្លាប់ គិត ថាពិការភាព ជាកម្មពៀរពីជាតិមុន ប៉ុន្តែវាជាកត្តាជីវសាស្ត្រ ជំងឺ និងគ្រោះថ្នាក់ជាដើម ដែលមានដូចជា កង្វះអាហារូបត្ថម្ភ គ្រោះថ្នាក់ចរាចរណ៍ និងគ្រោះថ្នាក់ដោយសារគ្រាប់មីន។ លើសពីនេះទៀតជនពិការខ្លួនឯងត្រូវតែអាចជម្នះ គ្រប់ឧបសគ្គ ដើម្បីទទួលបានភាពឧត្តុង្គឧត្តម និងជាប្រជាពលរដ្ឋដែលមានប្រយោជន៍នៅក្នុងសង្គម៕