ភ្នំពេញៈ គណបក្សហ៊្វុនស៊ិនប៉ិចគ្រោងរៀបចំធ្វើសមាជគណបក្សនៅអំឡុងខែមករាឆ្នាំ ២០២២ ខាងមុខនេះ ដើម្បីថ្វាយព្រះអង្គម្ចាស់ នរោត្តម ចក្រាវុឌ្ឍ ព្រះបុត្រាច្បងនៃសម្ដេចក្រុមព្រះ នរោត្ដម រណឫទ្ធិ ធ្វើជាប្រធានគណបក្សនេះជាផ្លូវការ ដើម្បីចូលរួមប្រកួតប្រជែងការបោះឆ្នោត ជ្រើសរើសក្រុមប្រឹក្សាឃុំសង្កាត់អាណត្តិទី ៥ ឆ្នាំ ២០២២ និងបោះឆ្នោតសកលឆ្នាំ ២០២៣។
លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច ប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែ ធ្នូ ឆ្នាំ ២០២១ ថា មុនពេលដែលសម្តេចក្រុមព្រះនរោត្តម រណឫទ្ធិ សោយទិវង្គត ព្រះអង្គបានសម្រេចប្រទានសិទ្ធិថ្វាយដល់ព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានស្តីទីដឹកនាំគណបក្ស បន្ទាប់ពីអវត្តមាន ព្រះអង្គ។
លោកបន្តថា ថ្នាក់ដឹកនាំនៃគណបក្សបានទទួលស្គាល់រួចហើយ ប៉ុន្តែមិនទាន់បានបំពេញកាតព្វកិច្ច និងតាមច្បាប់ជាធរមាន ស្របតាមលក្ខន្តិកៈដែលត្រូវបានតម្កល់នៅក្រសួងមហាផ្ទៃ។ ដូច្នេះគណបក្សនឹងរៀបចំធ្វើសមាជរបស់ខ្លួននៅអំឡុងខែមករា ដើម្បីថ្វាយព្រះអង្គម្ចាស់ នរោត្តម ចក្រាវុឌ្ឍ ដែលបច្ចុប្បន្នជាប្រធានស្តីទីឱ្យកា្លយជាប្រធានគណបក្សពេញសិទ្ធិ។
លោកថា៖ «យើងកំណត់រួចហើយ យើងនឹងរៀបចំធ្វើនៅក្នុងអំឡុងខែមករា ពីព្រោះច្បាប់បានចែងច្បាស់ថា បន្ទាប់ពីអវត្តមាន ប្រធានរយៈពេល ៦០ ថ្ងៃ គឺគណបក្សនឹងរៀបចំក្បាលថ្នាក់ដឹកនាំថ្មីមួយ ដើម្បីចូលរួមបោះឆ្នោត ជ្រើសរើសក្រុមប្រឹក្សាឃុំសង្កាត់ ២០២២ និងបោះឆ្នោត ២០២៣ ខាងមុខ»។
លោកបញ្ជាក់ទៀតថា គណបក្សនឹងនៅតែបន្តទទួលបានប្រជាប្រិយភាព និងការគាំទ្រពីប្រជាពលរដ្ឋដដែល ពីព្រោះព្រះអង្គម្ចាស់ នរោត្តម ចក្រាវុឌ្ឍ បានដង្ហែសម្តេចក្រុមព្រះជាយូរណាស់មកហើយ ជាពិសេសលោក ជា បញ្ញវន្ត និងជាយុវជន ១ រូប ដែលគណបក្សគិតថា ព្រះអង្គទទួលបានប្រជាប្រិយភាព និងការគាំទ្រពីសមាជិកសមាជិការបស់គណបក្សបន្ថែមទៀត។
ទោះជាយ៉ាងណា លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយ និងអ្នកវិភាគនយោបាយបានបង្ហាញការយល់ឃើញថា ការរៀបចំសមាជគណបក្សហ៊្វុនស៊ិនប៉ិចនៅពេលខាងមុខ ដើម្បីថ្វាយព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានគណបក្សពេញសិទ្ធិ ជំនួសសម្តេចក្រុមព្រះ នរោត្តម រណឫទ្ធិ នឹងមិនទទួលបានប្រជាប្រិយភាព និងការគាំទ្រពីប្រជាពលរដ្ឋទេ ព្រោះព្រះនាមរបស់អង្គមិនសូវឮដល់ពលរដ្ឋដែលពិបាកក្នុងការកសាងជំនឿទុកចិត្តផងដែរ។
លោកបន្តថា គណបក្សហ៊្វុនស៊ិនប៉ិចពីកន្លងមកនេះទទួលបានការគាំទ្រពីមនុស្សចាស់ៗ ជំនាន់មុនដែលធ្លាប់គាំទ្រសម្តេចព្រះបរមរតនកោដ្ឋ នរោត្តម សីហនុ ប៉ុន្តែ កម្លាំងការគាំទ្រនៅក្នុងជួរគណបក្សបានបែកខ្ញែកគ្នាច្រើន ដែលធ្វើឱ្យគណបក្សនេះពិបាក ហើយកម្លាំងធំនៅក្នុងគណបក្សត្រូវបានសមាហរណកម្មជាមួយគណបក្សកាន់អំណាចនៅឆ្នាំ ២០០៨។
លោកថ្លែងថា៖ «យើងគិតទៅគណបក្សហ្នឹងវាពិបាកការកសាងតម្លៃឡើងវិញឱ្យប្រជាពលរដ្ឋគាំទ្រ ខ្ញុំគិតថា វាពិបាកណាស់ ព្រោះអ្នកដឹកនាំថ្មីក៏មិនសូវមានឈ្មោះបោះសំឡេង និងមិនសូវសកម្ម។ បញ្ហាឈឺឆ្អាលរបស់ប្រជាពលរដ្ឋក៏មិនសូវមានហើយទៅឃោសនាយកការគាំទ្រគឺយកមិនបានទេ ព្រោះមិនធ្វើសកម្មភាពផងហ្នឹង ហើយបានតម្លៃពីណាឱ្យពលរដ្ឋគាំទ្រនោះ»។
បើតាមលោក ឯម សុវណ្ណារ៉ា គណបក្សហ៊្វុនស៊ិនប៉ិចត្រូវបានប្រជាពលរដ្ឋជ្រើសរើសយកម្តងរួចហើយកាលពីឆ្នាំ ១៩៩៣ ប៉ុន្តែគណបក្សនេះហាក់មិនមានអ្វីកែទម្រង់ និងឆ្លើយតបទៅនឹងសេចក្តីត្រូវការរបស់ប្រជាពលរដ្ឋនោះទេ ដែលធ្វើឱ្យបាត់សេចក្តីទុកចិត្តច្រើនចាប់តាំងពីពេលនោះមកដល់បច្ចុប្បន្ន។
លោកថា ព្រះអង្គម្ចាស់ នរោត្តម ចក្រាវុឌ្ឍ ដែលគ្រោងឡើងធ្វើជាប្រធានគណបក្សថ្មី គួរតែបញ្ចេញសកម្មភាពឱ្យបានច្រើនក្នុងការជួយ ឬឈឺឆ្អាលចំពោះប្រជាពលរដ្ឋដែលត្រូវបានរំលោភបំពាន ដើម្បីកសាងតម្លៃ និងប្រជាប្រិយភាពឱ្យប្រជាពលរដ្ឋមានជំនឿទុកចិត្តឡើងវិញ បើមិនធ្វើដូច្នោះទេគណបក្សនេះនៅតែមិនមានប្រជាប្រិយភាព និងទទួលបានការគាំទ្រពីប្រជាពលរដ្ឋដូចនៅក្នុងឆ្នាំ ២០១៧ ដដែល។
ព្រះអង្គម្ចាស់ នរោត្តម ចក្រាវុឌ្ឍ ដែលជាបុត្រាច្បងរបស់សម្ដេចក្រុមព្រះនរោត្ដម រណឫទ្ធិ និងព្រះអង្គម្ចាស់ក្សត្រី នរោត្តម ម៉ារី ត្រូវបានតែងតាំងជាព្រះប្រធានស្ដីទីនៃគណបក្សហ៊្វុនស៊ិនប៉ិច នាថ្ងៃទី ៨ ខែសីហា ឆ្នាំ ២០១៨៕
វីដេអូ៖