ភ្នំពេញៈ ពលរដ្ឋប្រមាណ ២០០ នាក់តំណាងឱ្យ ៣៥០ គ្រួសាររស់នៅភូមិអូរជ្រៅ សង្កាត់ដើមមៀន ក្រុងតាខ្មៅ ខេត្តកណ្តាលបានស្នើលោកនាយករដ្ឋមន្ត្រី ហ៊ុន សែន ជួយអន្តរាគមន៍ក្នុងជម្លោះដីបឹងសហគមន៍ជាង ៧ ហិកតា ដោយពួកគាត់បានចោទក្រុមហ៊ុនឯកជនថាបានរំលោភដីយកធ្វើជាកម្មសិទ្ធិផ្ទាល់ខ្លួន។
ក្រុមពលរដ្ឋទាំងនោះបានប្រមូលផ្តុំគ្នានៅជិតដីបឹងមានជម្លោះពីថ្ងៃទី ១២ ធ្នូ តាមបណ្តោយមហាវិថីសម្តេចតេជោ ហ៊ុន សែន ឬហៅថាផ្លូវ ៦០ ម៉ែត្រ ដោយបានលើកបដា និងស្នើលោកនាយករដ្ឋមន្ត្រី ហ៊ុន សែន អន្តរាគមន៍ជម្លោះដីធ្លីដែលបានអូសបន្លាយច្រើនឆ្នាំមកនេះ។
លោក អឿន សំអូន តំណាងពលរដ្ឋបានថ្លែងថា ដីបឹងជីភោដែលមានទំហំ ៧៤ ១៥៣ ម៉ែត្រការ៉េ ត្រូវបានពលរដ្ឋធ្លាប់គ្រប់គ្រង និងអាស្រ័យផលតាំងពីឆ្នាំ ១៩៧០-១៩៨០ មកម្ល៉េះដោយបានដាំត្រកួន កញ្ឆែត និងដាំដំណាំផ្សេងទៀត ដើម្បីលក់ផ្គត់ផ្គង់ជីវភាពគ្រួសារ។ លោកបន្តថា ក្រោយមកក្រុមហ៊ុន ING Holding បានដើរទិញដីនៅក្បែរបឹងនោះ ប៉ុន្តែបែរជាបោះបង្គោលហ៊ុមព័ទ្ធរំលោភយកដីបឹងជីភោទំហំជាង ៧ ហិកតាប៉ះពាល់ដល់ជីវភាពពលរដ្ឋ។
លោកថា៖ «ក្រុមហ៊ុន ING គាត់រំលោភយកតែម្តងនៅថ្ងៃទី ៩ ខែមករា ឆ្នាំ ២០១៦ ក្រុមហ៊ុននេះបានអះអាងថា ដីនោះគាត់បានទិញហើយ និងហាមពលរដ្ឋមិនឱ្យរកត្រី ដាំដំណាំ ហើយគាត់លួចបន្ដចាក់ដីទាំងយប់»។
ក្នុងនាមជាជនរងគ្រោះ ១ រូប លោក សំអូន ស្នើលោកនាយករដ្ឋមន្ត្រី ហ៊ុន សែន អន្តរាគមន៍យកដីនេះជូនពលរដ្ឋប្រើប្រាស់ជាប្រយោជន៍រួមវិញ ឬផ្តល់ដំណោះស្រាយសមរម្យដល់ពួកគាត់។ លោកថា៖ «យើងមិនដឹងថា ក្រុមហ៊ុនឃុបឃិតជាមួយមន្ត្រីណាទេ ដូច្នេះយើងមានតែលើកដៃម្រាម ១០ ស្នើសម្តេចតេជោ ហ៊ុន សែន ជួយពលរដ្ឋ ដើម្បីឱ្យបានដីបឹងនេះមកវិញសម្រាប់អាស្រ័យផល។
បើតាម លោក សំអូន ដីបឹងនោះដំបូងឡើយ ស្ថិតនៅក្នុងខេត្តកណ្តាល ប៉ុន្តែក្រោយមកកាត់ចូលដែនដីរដ្ឋបាលរាជធានីភ្នំពេញវិញ។
ពលរដ្ឋម្នាក់ទៀតលោក យ៉ាវ ហៃសាន្ត បានថ្លែងដែរថា គាត់បានប្រើប្រាស់ដីបឹងនេះតាំងពីឆ្នាំ ១៩៧៩ មក ដោយលោកថា ជាដីដែលលោកនាយករដ្ឋមន្ត្រី ហ៊ុន សែន ទុកឱ្យពលរដ្ឋប្រើប្រាស់ជាសមូហភាព។
លោកថា៖ «ដីបឹងនេះគឺជារបស់រួម ដីសមូហភាពភូមិ សម្តេចវាស់វែងឱ្យប្រើប្រាស់សម្រាប់ដោះស្រាយជីវភាព អ្នកក្រខ្សត់ ដើម្បីឱ្យមកដាំដំណាំ ដើម្បីបន្តជីវភាព»។ លោកបន្តថា មុនមានជម្លោះពលរដ្ឋអាចប្រមូលផលពីបឹងនេះដូចជាការដាំបន្លែ និងរកត្រីទៅលក់ក្នុង ១ ថ្ងៃអាចរកបាន ១ ម៉ឺន ឬ ២ ម៉ឺនរៀល សម្រាប់ផ្គត់ផ្គង់ក្នុងគ្រួសារ។
ចំណែកអ្នកស្រី ភោគ ផៃ ជាអ្នកតវ៉ាម្នាក់ទៀតបានបញ្ជាក់ថា៖ «ខ្ញុំអាស្រ័យផលលើដីនេះតាំងពីឆ្នាំ ៧០ ដាំបន្លែ រកត្រី ហើយបូមទឹកធ្វើស្រូវប្រាំង ឥឡូវនេះខ្ញុំទាមទារយកតែដីនោះមកវិញទេ...»។
អភិបាលរាជធានីភ្នំពេញលោក ឃួង ស្រេង បានថ្លែងថា ក្នុងករណីពលរដ្ឋមិនសុខចិត្តរឿងអ្វីមួយ គួរដាក់ពាក្យទៅអាជ្ញាធរដែនសមត្ថកិច្ចនោះក្រុមការងារនឹងពិនិត្យលទ្ធភាពដោះស្រាយជូន។ លោកថា៖ «គាត់ដាក់ទៅខណ្ឌទៅគេនឹងពិនិត្យតាមឋានានុក្រម ព្រោះស្រុកយើងមានអាជ្ញាធរមាននៅគ្រប់កន្លែង បើមិនសុខចិត្តរឿងអីទៅរកអាជ្ញាធរ ប្រសិនបើមានអីដាក់តាមលិខិតស្នាមរដ្ឋបាលយើងមក យើងនឹងពិនិត្យលទ្ធភាពដោះស្រាយជូនគាត់ថា អ្នកណាខុសអ្នកណាត្រូវ ប៉ុន្តែហាមតែមួយទេគឺហាមធ្វើបាតុកម្ម កូដកម្មខុសច្បាប់»។
ប៉ុន្តែតាមលិខិតស្នើអន្តរាគមន៍បានឱ្យដឹងថា ពលរដ្ឋធ្លាប់បានដាក់ពាក្យបណ្តឹងទៅរដ្ឋបាលខេត្តកណ្តាល មន្ទីររៀបចំដែនដី នគរូបនីយកម្ម និងសំណង់ខេត្តកណ្តាល និងខុទ្ធកាល័យនាយករដ្ឋមន្ត្រី ហ៊ុន សែន ប៉ុន្តែមកទល់ពេលនេះមិនទាន់មានដំណោះស្រាយទេ។
មន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន លោក គង់ ចំរើន ប្រាប់ភ្នំពេញប៉ុស្តិ៍ថា លោកធ្លាប់បានបញ្ជូនពាក្យបណ្តឹងពលរដ្ឋទាំងនោះទៅក្រសួងរៀបចំដែនដី នគរូបនីយកម្ម និងសំណង់រួចហើយក្នុងឆ្នាំ ២០២០។ លោកថា៖ «យើងបានបញ្ជូនឯកសារនោះទៅក្រសួងដែនដី ហើយបណ្តឹងរបស់ប្រជាជនដែលយកមកដាក់យើងមិនហ៊ានទុកទេ យើងបញ្ជូនទៅជំនាញអស់ហើយ»។
ជុំវិញបញ្ហានេះ ភ្នំពេញប៉ុស្តិ៍មិនអាចសុំការអត្ថាធិប្បាយពីក្រុមហ៊ុន ING Holding និងក្រសួងរៀបចំដែនដី នគរូបនីយកម្ម និងសំណង់បាននៅឡើយទេ នៅថ្ងៃទី ១២ ធ្នូ។
នាយករងអង្គការសិទ្ធិមនុស្សលីកាដូលោក អំ សំអាត បានថ្លែងនៅថ្ងៃទី ១២ ធ្នូថា ស្ថាប័នពាក់ព័ន្ធគួរតែចេញមុខដោះស្រាយបញ្ហានេះជូនពលរដ្ឋ ដើម្បីចៀសវាងបាតុភាពនានាដែលអាចកើតឡើង។ លោកថា៖ «បើសិនករណីនេះមិនត្រូវបានដោះស្រាយទេ អ៊ីចឹងវិវាទកាន់តែបន្ត ហើយការអភិវឌ្ឍអាចនឹងគាំងមិនរលូនទៅមុខ ហើយប្រជាពលរដ្ឋនៅតែទាមទារ អ៊ីចឹងយើងបារម្ភខ្លាចមានបាតុភាពនៃអំពើហិង្សា ឬការចាប់ខ្លួនជាដើម»៕
វីដេអូ៖