ភ្នំពេញៈ ក្រសួងអប់រំ យុវជន និងកីឡា សហការជាមួយទីភ្នាក់ងារ KOICA ប្រចាំកម្ពុជា និងដៃគូអភិវឌ្ឍន៍មួយចំនួនទៀត រៀបចំមហោស្រពជាតិលើកទី ១ ស្ដីពីពិព័រណ៍ការអប់រំស្ទែម (STEM) រយៈពេល ៣ ថ្ងៃ ដើម្បីជំរុញ និងលើកកម្ពស់ការអប់រំបែបស្ទែមនេះដោយ ផ្តោតលើវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យានៅតាមសាលារៀន។
យោងតាមក្រសួងអប់រំបានឱ្យដឹងថា ការអប់រំតាមបែបស្ទែម (STEM) គឺសំដៅលើ មុខជំនាញផ្នែក វិទ្យាសាស្ត្រ (Science) បច្ចេកវិទ្យា (Technology) វិស្វកម្ម (Engineering) និងគណិតវិទ្យា (Mathematics)។
លោក ច័ន្ទ រ័ត្ន ប្រធានមជ្ឈមណ្ឌលស្រាវជ្រាវគរុកោសល្យជំនាន់ថ្មីនៃវិទ្យាស្ថានជាតិអប់រំថ្លែងក្នុងពេលបើកមហោស្រពកាលពីថ្ងៃទី ១៣ ធ្នូថា ការអប់រំនាពេលបច្ចុប្បន្នមានការផ្លាស់ប្ដូរលឿន លើសពីការរំពឹងទុក ដែលតម្រូវឱ្យមានការរៀបចំផែនការត្រឹមត្រូវ និងច្បាស់លាស់ ឆ្លើយតបការផ្លាស់ប្ដូរនៃបរិបទសកលភាវូបនីយកម្ម។ មហោស្រពជាតិលើកទី ១ ស្ដីពីពិព័រណ៍ការអប់រំស្ទែម តាមប្រព័ន្ធអនឡាញនាពេលនេះ គឺបានចូលរួមចំណែកក្នុងការចែករំលែក ចំណេះដឹង បទពិសោធ កិច្ចការងារនៃការអប់រំស្ទែម និងការបញ្ជ្រាបការប្រើប្រាស់បច្ចេកវិទ្យាព័ត៌មានក្នុងវិស័យអប់រំ ព្រមទាំងបានឆ្លុះបញ្ចាំងពីតួនាទី និងសារៈសំខាន់នៃបច្ចេកវិទ្យាក្នុងវិស័យអប់រំផងដែរ។
លោកថ្លែងថា៖ «គោលបំណងនៃការរៀបចំមហោស្រពនេះគឺដើម្បីផ្លាស់ប្ដូរបទពិសោធតាមរយៈកិច្ចពិភាក្សាពីគំរូផ្សេងៗនៃការអប់រំស្ទែម ទស្សនៈនៃការយល់ឃើញ លើការអនុវត្ដការអប់រំស្ទែមនៅកម្រិតសាលារៀន និងបានផ្ដល់ឱកាសដល់លោកគ្រូ អ្នកគ្រូ សិស្សានុសិស្ស រក្សាបាននូវបណ្ដាញទំនាក់ទំនង ជាសហគមន៍ ព្រមទាំងបានអភិវឌ្ឍសមត្ថភាព ចំណេះដឹង និងបទពិសោធលើវិជ្ជាជីវៈរបស់ខ្លួនផងដែរ»។
លោក ច័ន្ទ រ័ត្ន ថ្លែងថា អ្នកសិក្សាស្រាវជ្រាវ គ្រូបង្រៀន គ្រូឧទ្ទេស ទីប្រឹក្សាអប់រំ អ្នកប្រឹក្សាយោបល់ សិស្សានុសិស្ស ត្រូវបានអញ្ចើញឱ្យចូលរួមក្នុងមហោស្រពនេះ ដើម្បីចែករំលែក ចំណេះដឹង និងបទពិសោធលើការងារអប់រំស្ទែមក្នុងបរិបទ កំណែទម្រង់វិស័យអប់រំនៅព្រះរាជាណាចក្រកម្ពុជា ដើម្បីសម្រេចបាននូវចក្ខុវិស័យរបស់រាជរដ្ឋាភិបាល គឺនៅឆ្នាំ ២០៣០ ប្រជាជនកម្ពុជានឹងមានប្រាក់ចំណូលមធ្យមកម្រិតខ្ពស់។ មហោស្រពនៅពេលនេះប្រព្រឹត្ដទៅរយៈពេល ៣ ថ្ងៃ ចាប់ពីថ្ងៃទី ១៣-១៥ ខែធ្នូ ឆ្នាំ ២០២១ តាមប្រព័ន្ធអនឡាញ ហ្ស៊ូម ដោយមានបទបង្ហាញជាវីដេអូ មកពីរាជធានីភ្នំពេញចំនួន ៥៤ វីដេអូ តាមខេត្តមួយចំនួនធំ សរុបមានចំនួន ១១៦ វីដេអូ សម្រាប់ចាក់បង្ហាញជូនរយៈពេល ៣ ថ្ងៃនេះ។
លោកថ្លែងថា មហោស្រពនេះអាចជាកាលានុវត្ដភាពថ្មីឆ្លើយតបទៅនឹងកិច្ចខិតខំប្រឹងប្រែង ដើម្បីបង្កើតឱ្យមានសហគមន៍សិក្សាវិជ្ជាជីវៈ លើការអប់រំស្ទែម និងជំរុញឱ្យមានកិច្ចសហប្រតិបត្ដិការរវាងភាគីពាក់ព័ន្ធលើការជំរុញ និងលើកកម្ពស់ការអប់រំស្ទែមនៅកម្ពុជា។ តាមរយៈមហោស្រពនេះ មានលោកគ្រូ-អ្នកគ្រូចំនួន ៤១ នាក់ ដែលបានឆ្លងកាត់ការបណ្ដុះបណ្ដាលនៅមជ្ឈមណ្ឌលបណ្ដុះបណ្ដាលគ្រូសម្រាប់ការអប់រំស្ទែម ចូលរួមចំណែកក្នុងការចែករំលែកវិធីសាស្ដ្របង្រៀនតាមបែបអប់រំស្ទែម និងវិធីបង្កើតលំហាត់ដែលមានការគិតលំដាប់ខ្ពស់ និងដំណោះស្រាយសម្រាប់ជាទុនសម្រាប់ចូលរួមប្រកួតប្រជែងជាលក្ខណៈអន្តរជាតិ។
លោក Rho Hyun Jun តំណាង KOICA នៅកម្ពុជាបានថ្លែងថា៖ «វិស័យអប់រំ ក៏ជាផ្នែកដ៏សំខាន់មួយ សម្រាប់ KOICA ប្រចាំនៅកម្ពុជា ហើយក៏ជាការលើកឡើងនៅក្នុងយុទ្ធសាស្ដ្រសម្រាប់គម្រោងនៃភាពជាដៃគូរបស់យើងផងដែរ។ យោងតាមចំណុចនេះ ក្នុងនាម KOICA ជាដៃគូអភិវឌ្ឍន៍ដ៏សំខាន់ និងជាមិត្តយូរអង្វែងរបស់ប្រទេសកម្ពុជា ទីភ្នាក់ងារ KOICA ក៏បានដាក់វិស័យអប់រំជាវិស័យអាទិភាព ក្នុងការជួយរាជរដ្ឋាភិបាលកម្ពុជា»។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ថ្លែងពេលធ្វើជាអធិបតីបើកពិធីមហោស្រពនេះថា មហោស្រពនេះធ្វើឡើងក្នុងគោលបំណងបង្កើនការយល់ដឹងពីសារៈសំខាន់នៃការអប់រំស្ទែម ដោយមានការចូលរួមពីគ្រប់គ្រឹះស្ថានសិក្សារដ្ឋ គ្រឹះស្ថានបណ្ដុះបណ្ដាលគ្រូ និងគ្រឹះស្ថានសិក្សាឯកជន និងបានផ្ដល់ឱកាសដល់គ្រូបង្រៀន លើមុខវិជ្ជាឯកទេសលើវិទ្យាសាស្ដ្រ គណិតវិទ្យា។ លោកថ្លែងថា៖ «មហោស្រពនេះក៏បានបំផុសលោកគ្រូ-អ្នកគ្រូ បានបង្ហាញនូវសមត្ថភាពក្នុងការបង្រៀនតាមបែបស្ទែម និងអាចឱ្យសិស្សានុសិស្សបង្ហាញនូវស្នាដៃនៃការបង្កើតថ្មីរបស់ខ្លួនតាមរយៈការផលិតជាវីដេអូរយៈពេល ៥ នាទី។ មហោស្រពនេះក៏បានបើកឱកាសដល់យុវជន សិស្សានុសិស្ស ដែលមានទេពកោសល្យបានបង្ហាញនូវសមត្ថភាពរបស់ខ្លួន ផ្នែកស្ទែមលើឆាកជាតិ និងអន្តរជាតិផងដែរ»៕