.jpg)
ជនសង្ស័យ និងគ្រឿងញៀនដែលសមត្ថកិច្ចចាប់បាន។ រូបថត ហ្វេសប៊ុក
ព្រះសីហនុ/កំពង់ស្ពឺៈ យ៉ាងហោចណាស់មានជនជាតិចិនម្នាក់ស្លាប់ និង ២ នាក់ទៀតត្រូវបានចាប់ខ្លួនជាមួយគ្រឿងញៀនជិត ១,៥ តោន ក្រោយការប៉ះទង្គិចដោយអាវុធរវាងនគរបាលប្រឆាំងគ្រឿងញៀន និងក្រុមឧក្រិដ្ឋកម្មគ្រឿងញៀនលើកំណាត់ផ្លូវជាតិលេខ ៤ ក្នុងស្រុកកំពង់សិលា ខេត្តព្រះសីហនុ កាលពីថ្ងៃទី ១២ ខែធ្នូ ឆ្នាំ ២០២១។ នេះបើតាមមន្ត្រីជាន់ខ្ពស់ក្រសួងមហាផ្ទៃ។
លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកប្រឆាំងបទល្មើសគ្រឿងញៀនក្រសួងមហាផ្ទៃបានប្រាប់ភ្នំពេញប៉ុស្តិ៍នៅថ្ងៃទី ១៣ ធ្នូថា ការបង្ក្រាបបទល្មើសគ្រឿងញៀនដ៏ធំនេះមានការចូលរួមពីសមត្ថកិច្ចនគរបាលប្រឆាំងគ្រឿងញៀនរាជធានី-ខេត្តចំនួន ៤ រួមមាន រាជធានីភ្នំពេញ កំពង់ស្ពឺ ព្រះសីហនុ និង ខេត្តកោះកុង ដោយចាប់បានមេខ្លោងជាតិចិនម្នាក់ឈ្មោះ Ye Yean Sow អាយុជាង ៥០ ឆ្នាំស្នាក់នៅទីតាំងដីជួល ១ កន្លែងក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។ រីឯបក្ខពួក ២ នាក់ទៀត មានឈ្មោះ Ly Tung Han អាយុ ៣២ ឆ្នាំបានស្លាប់ ក្រោយពីប៉ះទង្គិចដោយអាវុធនៅទីតាំងកើតហេតុ និងម្នាក់ទៀតឈ្មោះ Ly Po Han អាយុ ៤៧ ឆ្នាំជាអ្នកបើកបររថយន្តត្រូវបានចាប់ខ្លួនជាមួយគ្រឿងញៀនប្រភេទ Ketamine ជិត ១,៥ តោន។
លោកបានបញ្ជាក់ថា៖ «បច្ចុប្បន្នជនសង្ស័យឈ្មោះ Ye YeanSow និងឈ្មោះ Ly Po Han រួមទាំងវត្ថុតាងគ្រឿងញៀនប្រភេទ Ketamine ចំនួន ១ ៤៨០ គីឡូក្រាម និងសារធាតុគីមីផ្សំសម្រាប់កែច្នៃធ្វើជាគ្រឿងញៀនប្រមាណ ៧០ តោនរួមទាំងអាវុធ K54 មួយដើម និងរថយន្តទំនើប ២ គ្រឿងត្រូវបានកម្លាំងនគរបាលជំនាញបញ្ជូនមកកាន់រាជធានីភ្នំពេញ ដើម្បីសាកសួរចម្លើយ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ»។
បើតាមលោក ម៉ក់ ជីតូ ពេលនេះ សមត្ថកិច្ចជំនាញកំពុងបន្តស្រាវជ្រាវបន្ថែមដើម្បីស្វែងរកចាប់ខ្លួនអ្នកពាក់ព័ន្ធមួយចំនួនទៀត។
តាមប្រភពពីអាជ្ញាធរស្រុកឱរ៉ាល់ ទីតាំងដែលជនសង្ស័យជួលកែច្នៃគ្រឿងញៀននោះគឺស្ថិតនៅខាងក្រោយរោងចក្រផលិតតំណាប់ស្វាយរបស់ក្រុមហ៊ុន RICHFARMASIA CO.,LTD ក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
យ៉ាងណាក្ដី នាយកក្រុមហ៊ុន RICHFARM ASIA CO.,LTD លោក ហ៊ុន ឡាក់ បានប្រាប់ភ្នំពេញប៉ុស្តិ៍ថា ក្រុមហ៊ុនរបស់លោកមិនជាប់ពាក់ព័ន្ធនឹងករណីនេះទេ បើទោះជារោងចក្រផលិតតំណាប់ស្វាយជាដៃគូរបស់ក្រុមហ៊ុនលោកស្ថិតនៅក្បែរទីតាំងកែច្នៃគ្រឿងញៀននោះក្ដី។
លោកថ្លែងថា៖ «ក្រុមហ៊ុនរបស់ខ្ញុំគ្រាន់តែជាអ្នកកុម្ម៉ង់ទិញតំណាប់ផ្លែស្វាយចេញពីរោងចក្រកែច្នៃផ្លែស្វាយ ១ កន្លែងនៅក្នុងតំបន់នោះ ហើយស្លាកក្រុមហ៊ុនរបស់យើងដាក់នៅទីនោះ ដើម្បីបង្ហាញដល់អតិថិជនរបស់យើងពីប្រភពតំណាប់ផ្លែស្វាយដែលយើងកុម្ម៉ង់ទិញប៉ុណ្ណោះ។
ម្យ៉ាងទៀតរោងចក្រកែច្នៃផ្លែស្វាយនោះក៏មិនជាប់ពាក់ព័ន្ធករណីគ្រឿងញៀននេះដែរ ព្រោះទីតាំងរោងចក្រក្នុងតំបន់នេះមានច្រើនហើយមានម្ចាស់ផ្សេងៗគ្នា»។
លោកបានបន្តថា នៅព្រឹកថ្ងៃទី ១៣ ខែធ្នូ លោកបានសហការផ្ដល់របាយការណ៍មួយចំនួន ដើម្បីចូលរួមបំភ្លឺដល់សមត្ថកិច្ចជាពិសេសអាជ្ញាធរខេត្តកំពង់ស្ពឺដោយបញ្ជាក់ថា ក្រុមហ៊ុនរបស់លោកមិនជាប់ពាក់ព័ន្ធក្នុងករណីគ្រឿងញៀននេះទេ។
ការបំភ្លឺរបស់លោក ក្រោយពីមានការផ្សព្វផ្សាយតាមបណ្ដាញសង្គមមួយចំនួនបានភ្ជាប់ស្លាកសញ្ញាក្រុមហ៊ុន RICHFARM ASIA CO.,LTD របស់លោកទៅនឹងករណីនេះ។
ជុំវិញករណីនេះ លោក វ៉ី សំណាង អភិបាលខេត្តកំពង់ស្ពឺបានប្រាប់ភ្នំពេញប៉ុស្តិ៍ថា នៅក្នុងជំហានបឋម លោកជឿថា ក្រុមហ៊ុន RICHFARM ASIA CO.,LTD មិនជាប់ពាក់ព័ន្ធក្នុងករណីគ្រឿងញៀនដ៏ធំនេះទេ។ «ប៉ុន្តែករណីនេះ វាកំពុងស្ថិតក្រោមការស៊ើបអង្កេតរបស់សមត្ថកិច្ចជំនាញនៅឡើយ»។
បើតាមលោក វ៉ី សំណាង មុនពេលមានការចុះបង្ក្រាបនេះសមត្ថកិច្ចនគរបាលខេត្តកំពង់ស្ពឺបានចុះស្រាវជ្រាវអស់រយៈពេលជាង ២ ខែមកហើយ ក្រោយពីទទួលបានតម្រុយពីសមត្ថកិច្ចជំនាញថ្នាក់ជាតិពីករណីសង្ស័យលួចច្នៃគ្រឿងញៀននៅក្នុងស្រុកឱរ៉ាល់។
លោក អំ សំអាត នាយករងអង្គការលីកាដូថ្លែងថា បច្ចុប្បន្ននេះគ្រឿងញៀនជាបញ្ហាធំ និងជាឧបករណ៍មួយបំផ្លាញធនធានមនុស្ស និងបង្កើតអសន្តិសុខក្នុងសង្គមជាតិ។
លោកថ្លែងថា៖ «កន្លងមកនេះយើងបានមើលឃើញថា សមត្ថកិច្ចបង្ក្រាបករណីគ្រឿងញៀនធំៗភាគច្រើនដែលប្រព្រឹត្តឡើងដោយជនជាតិចិន ដូច្នេះមើលទៅគោលដៅនៃអ្នកប្រព្រឹត្ត (អ្នកសង្គមងងឹត) គឺហាក់បីដូចចង់យកទីតាំងទឹកដីកម្ពុជាយើងក្នុងការផលិត ចែកចាយក្នុងស្រុក និងនាំបន្តទៅក្នុងតំបន់»។
បើតាមលោក អំ សំអាត អាជ្ញាធរពាក់ព័ន្ធត្រូវបង្កើនការទប់ស្កាត់ និងបង្ក្រាបលើករណីគ្រឿងញៀន ដោយមានការត្រួតពិនិត្យ និងធ្វើអធិការកិច្ចទៀងទាត់លើក្រុមហ៊ុន និងរោងចក្រមួយចំនួនដែលមានការសង្ស័យ ដើម្បីធានាកុំអោយជនខិលខូចយកលេសក្រុមហ៊ុន និងរោងច្រកទៅផលិតគ្រឿងញៀន និងប្រព្រឹត្តអំពើខុសច្បាប់។
ជុំវិញករណីនេះ លោក ម៉ក់ជីតូ បានថ្លែងថា ការបង្ក្រាបគ្រឿងញៀនដ៏ធំនេះបានបង្ហាញថា កម្ពុជាកំពុងប្រឹងប្រែងខ្លាំងក្នុងការទប់ស្កាត់បទល្មើសគ្រឿងញៀនដោយប្រឆាំងដាច់ខាតការប៉ុនប៉ងយកកម្ពុជាជាទីតាំងផលិតគ្រឿងញៀនសម្រាប់ទីផ្សារក្នុងតំបន់ និងពិភពលោក។
លោកបានឱ្យដឹងថា ក្នុងឆ្នាំ ២០២១ គិតត្រឹមថ្ងៃទី ១៣ ខែធ្នូសមត្ថកិច្ចបង្ក្រាបបទល្មើសគ្រឿងញៀនទូទាំងប្រទេសបានជាង ៥ ០០០ ករណី ចាប់ជនសង្ស័យចំនួនជាង ១ ម៉ឺននាក់ និងរឹបអូសគ្រឿងញៀនចម្រុះបានប្រមាណ ៣ តោន។ លោកថា៖ «ថ្វីបើយ៉ាងដូច្នេះក្ដីប្រទេសកម្ពុជានៅមិនទាន់ក្លាយជាប្រទេសផលិតគ្រឿងញៀននោះទេ ព្រោះយើងបានកាត់ផ្ដាច់បណ្ដាញក្រុមបានទាន់ពេល»៕
វីដេអូ៖
