ភ្នំពេញៈ អាជ្ញាសាលានៃសាលាដំបូងរាជធានីភ្នំពេញនឹងចុះអនុវត្តដីកាសម្រេច បង្គាប់ឱ្យស្រាវជ្រាវស្ថានភាពបច្ចុប្បន្ន ផ្ទះរបស់លោក សម រង្ស៊ី និងលោកស្រី ជូឡុង សូមូរ៉ា ដែលជាអតីតទីស្នាក់ការគណបក្សសង្គ្រោះជាតិ ស្ថិតនៅតាមផ្លូវជាតិលេខ ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យនៅថ្ងៃទី ២០ ធ្នូ ឆ្នាំ ២០២១ ខាងមុខ។
យោងតាមលិខិតជូនដំណឹងដែលចុះហត្ថលេខាដោយលោក ទៀង សោភ័ណ អាជ្ញាសាលានៃសាលាដំបូងរាជធានីភ្នំពេញនៅថ្ងៃទី ១៣ ធ្នូ ឆ្នាំ ២០២១ បញ្ជាក់ថា ការចុះអនុវត្តដីកាសម្រេចបង្គាប់ឱ្យស្រាវជ្រាវស្ថានភាពបច្ចុប្បន្នផ្ទះរបស់លោក សម រង្ស៊ី និងលោកស្រី ជូឡុង សូមូរ៉ា សហកូនបំណុលនេះគឺផ្អែកលើសំណុំរឿងអនុវត្តដោយបង្ខំលេខ ២០៤ ចុះថ្ងៃទី ២៨ ខែតុលា ឆ្នាំ ២០២១ របស់សាលាដំបូងរាជធានី។
ពាក់ព័ន្ធនឹងបញ្ហានេះដែរ លោក អ៊ឹម វណ្ណៈ ចៅក្រមសាលាដំបូងរាជធានីភ្នំពេញ កាលពីថ្ងៃទី ៤ ខែវិច្ឆិកាបានចេញដីកាសម្រេចដាក់លក់ដោយបង្ខំនូវផ្ទះរបស់លោក សម រង្ស៊ី និងលោកស្រី ជូឡុង សូមូរ៉ា សហកូនបំណុល បន្ទាប់ពីអ្នកទាំង ២ មិនបានអនុវត្តតាមសាលដីកាស្ថាពរសំណុំរឿងនេះចេញដោយតុលាការកំពូល និងសាលាដំបូងរាជធានីភ្នំពេញ។
តុលាការកំពូលកាលពីថ្ងៃទី ១៩ ខែធ្នូ ឆ្នាំ ២០១៨ បានចេញសាលដីកាស្ថាពរបង្គាប់ឱ្យលោក សម រង្ស៊ី សងជំងឺចិត្តចំនួន ៤ ០០០ លានរៀល ជូនទៅលោកនាយករដ្ឋមន្ត្រី ហ៊ុន សែន ក្នុងសំណុំរឿងបរិហារកេរ្តិ៍។ តុលាការកំពូលកាលពីថ្ងៃទី ១ ខែវិច្ឆិកា ឆ្នាំ ២០១៧ បានចេញសាលដីកាស្ថាពរបង្គាប់ឱ្យលោក សម រង្ស៊ី សងជំងឺចិត្ត ចំនួន ៤ ពាន់លានរៀល ជូនលោក ហេង សំរិន ប្រធានរដ្ឋសភា។ សាលាដំបូងរាជធានីកាលពីថ្ងៃទី ៣០ ខែធ្នូ ឆ្នាំ ២០២០ បានចេញសាលក្រមស្ថាពរបង្គាប់ឱ្យលោក សម រង្ស៊ី សងជំងឺចិត្តចំនួន ២ ពាន់លានរៀលជូនលោក ស ខេង រដ្ឋមន្ត្រីក្រសួងមហាផ្ទៃ និងកាលពីថ្ងៃទី ១ មីនា ឆ្នាំ ២០២១ សាលាដំបូងរាជធានី បានចេញសាលក្រមស្ថាពរបង្គាប់ឱ្យលោក សម រង្ស៊ី បង់ប្រាក់ចំនួន ១ ៨០០ លានរៀលសងជំងឺចិត្តជូនរាជរដ្ឋាភិបាល។
លោក សេង សារី អ្នកវិភាគបញ្ហានយោបាយ និងសង្គមថ្លែងថា «តុលាការ ចេញដីកាលក់ផ្ទះរបស់លោក សម រង្ស៊ី ដែលជាទីស្នាក់ការអតីតគណបក្សសង្គ្រោះជាតិដោយបង្ខំនៅពេលនេះបានបង្ហាញថា គណបក្សកាន់អំណាចកំពុងបិទទំព័រប្រវត្តិសាស្ត្រ របស់គណបក្សសង្គ្រោះជាតិ និងបង្ហាញថា គណបក្សសង្គ្រោះជាតិមិនអាចរស់ឡើងវិញទៀតនោះទេ»៕
វីដេអូ៖