វិទ្យាស្ថាន ខេមអេដ ប៊ីហ្សនេសស្គូល គឺជាគ្រឹះស្ថានឧត្តមសិក្សាដែលត្រូវបានទទួលស្គាល់ជាអន្តរជាតិ និងជាវិទ្យាស្ថានឈានមុខគេនៅកម្ពុជាដែលផ្តោតសំខាន់លើផ្នែកគណនេយ្យ ហិរញ្ញវត្ថុ សវនកម្ម ដោយក្នុងរយៈពេលជាង ២០ ឆ្នាំកន្លងមកនេះ ខេមអេដ បានផ្តល់ការបណ្តុះបណ្តាលនិស្សិតកម្ពុជាយ៉ាងច្រើននៅក្នុងវិស័យហិរញ្ញវត្ថុ ដើម្បីឱ្យពួកគេមានសមត្ថភាពខ្ពស់នៅក្នុងទីផ្សារការងារ និងអាជីវកម្ម ដែលកំពុងរីកចម្រើនទាំងសម្រាប់ទីផ្សារក្នុងស្រុក និងអន្តរជាតិ។
វគ្គសិក្សាថ្នាក់គណនេយ្យករជំនាញ នៅវិទ្យាស្ថាន ខេមអេដ គឺរៀបចំឱ្យនិស្សិតមានចំណេះដឹងទូលំទូលាយ ប្រកបដោយជំនាញវិជ្ជាជីវៈ នៅក្នុងវិស័យគណនេយ្យ សវនកម្ម ច្បាប់អាជីវកម្ម ហិរញ្ញវត្ថុ ការអនុវត្តពន្ធដារ និងមានច្រើនទៀត។ និស្សិតដែលសិក្សានៅវិទ្យាស្ថាន ខេមអេដ ថ្នាក់បរិញ្ញាបត្រផ្នែក គណនេយ្យ និងហិរញ្ញវត្ថុ (BA+CAT) កម្មវិធីអន្តរជាតិ CAT និង ACCA សុទ្ធសឹងតែឆ្លងកាត់ការប្រឡងជាអន្តរជាតិ ដែលរៀបចំឡើងដោយស្ថាប័នអន្តរជាតិ ACCA ដែលមានទីតាំងនៅចក្រភពអង់គ្លេស។
ចំពោះថ្នាក់បរិញ្ញាបត្រផ្នែកគណនេយ្យ និងហិរញ្ញវត្ថុ (BA+ CAT) គឺត្រូវសិក្សារយៈពេល ៤ ឆ្នាំមាន ៨ ឆមាស ហើយក្នុង ១ ឆមាស មានរយៈពេល ៦ ខែ។ ថ្នាក់បរិញ្ញាបត្រផ្នែកគណនេយ្យ និងហិរញ្ញវត្ថុសិក្សាផ្តោតសំខាន់លើផ្នែកគណនេយ្យ ហិរញ្ញវត្ថុ សវនកម្ម និងពាណិជ្ជកម្ម។
អ្វីដែលកាន់តែពិសេសទៀតនោះ វិទ្យាស្ថាន ខេមអេដ ដែលបណ្តុះបណ្តាលជំនាញហិរញ្ញវត្ថុឈានមុខគេនៅកម្ពុជា ក៏ផ្តល់ឱកាស អាហារូបករណ៍ដល់និស្សិតសម្រាប់ថ្នាក់ (BA+CAT) ផងដែរ ដោយផ្ដល់អាហារូបករណ៍រហូតដល់ ៤ ០០០ ដុល្លារ។
ដើម្បីទទួលបានអាហារូបករណ៍សិក្សាថ្នាក់ BA+CAT នៅសាលា ខេមអេដ និស្សិតត្រូវឆ្លងកាត់ការប្រឡងរយៈពេល ២ ម៉ោងកន្លះលើមុខវិជ្ជាអង់គ្លេស និងគណិតវិទ្យា រួមទាំងការសម្ភាសរយៈពេល ៥ ទៅ ១០ នាទី ហើយនិស្សិតអាចណាត់ និងជ្រើសរើសថ្ងៃប្រឡង និងកំណត់ម៉ោងប្រឡងដោយខ្លួនឯងចាប់ពីថ្ងៃចន្ទ ដល់ថ្ងៃអាទិត្យ ពីម៉ោង ៨ ព្រឹក ដល់ ម៉ោង ៥ រសៀល ហើយនិស្សិតនឹងធ្វើការប្រឡងតាមរយៈអនឡាញ។ ការផ្តល់ជូនអាហារូបករណ៍នេះផ្តោតសំខាន់លើថ្នាក់បរិញ្ញាបត្រផ្នែកគណនេយ្យ និងហិរញ្ញវត្ថុ (BA+CAT) នៅសាលា ខេមអេដ សម្រាប់រយៈពេល ៤ ឆ្នាំ។
វិទ្យាស្ថាន ខេមអេដ គឺជាវិទ្យាស្ថានមួយដែលមានការទទួលស្គាល់ខ្ពស់នៅក្នុងទីផ្សារការងាររួមជាមួយថ្នាលបណ្ដុះបណ្ដាលដែលប្រកបដោយគុណភាព គុណវុឌ្ឍិ និងការទទួលស្គាល់ ទាំងក្នុងស្រុក និងលើឆាកអន្តរជាតិ។ ក្នុងនោះ ខេមអេដ ត្រូវបានទទួលស្គាល់ទាំងក្នុងស្រុក និងនៅលើឆាកអន្តរជាតិ ដូចជាសមាគមគណនេយ្យករជំនាញ (ACCA) នៅចក្រភពអង់គ្លេស, ស្ថាប័នជំនាញអ្នកវិភាគផ្នែកហិរញ្ញវត្ថុ (CFA) និង Accreditation Council for Business Schools and Programs នៅសហរដ្ឋអាមេរិក, ស្ថាប័នធានាគុណភាពអប់រំនៃបណ្តាញសាកលវិទ្យាល័យអាស៊ាន (AUN-QA) នៅអាស៊ី, ការទទួលស្គាល់ផ្នែកការគ្រប់គ្រងកម្រិតស្ដង់ដា ISO 9001: 2015 ដោយ Guardian Independent Certification ដែលចុះបញ្ជីនៅចក្រភពអង់គ្លេសផងដែរ។
ម្យ៉ាងវិញទៀត កាលពីពេលថ្មីៗនេះ វិទ្យាស្ថាន ខេមអេដ គឺជាវិទ្យាស្ថានឧត្តមសិក្សាមុនគេបង្អស់នៅ កម្ពុជាដែលត្រូវបានទទួលស្គាល់គុណភាពអប់រំកម្រិតផ្កាយ ៥ ពីស្ថាប័ន QS Rating Stars នៅចក្រភពអង់គ្លេស។
ការទទួលស្គាល់នេះនឹងធ្វើឱ្យនិស្សិតកម្ពុជាដែលបញ្ចប់ការសិក្សានៅវិទ្យាស្ថាន ខេមអេដ រឹតតែមានការទទួលស្គាល់ទូលំទូលាយលក្ខណៈអន្តរជាតិ ហើយការទទួលស្គាល់នេះក៏ជួយសម្រួលដល់និស្សិតដែលមានបំណងផ្ទេរការសិក្សាទៅក្រៅប្រទេសផងដែរ។
វិទ្យាស្ថាន ខេមអេដ គឺតែងតែសម្រិតសម្រាំងយកនូវសាស្ត្រាចារ្យ ដែលមានទាំងចំណេះដឹង ជំនាញ បទពិសោធ និងមានគុណវុឌ្ឍិខ្ពស់ សម្រាប់បណ្ដុះបណ្ដាល និងប្រឹក្សាយោបល់ដល់និស្សិត ដែលមកពីសហរដ្ឋអាមេរិក ចក្រភពអង់គ្លេស សិង្ហបុរី ម៉ាឡេស៊ី ហ្វីលីពីន ហុងកុង និងប្រទេសជាច្រើនទៀត ដើម្បីធានាថា និស្សិតដែលបញ្ចប់ការសិក្សានៅ ខេមអេដ គឺមានចំណេះដឹង និងជំនាញផ្នែកហិរញ្ញវត្ថុពិតប្រាកដ។ មកដល់បច្ចុប្បន្ន ខេមអេដ បណ្តុះបណ្តាលនិស្សិតថ្នាក់ BA+CAT បាន ៦ ជំនាន់ សរុបជាង ១ ៤៦៤ នាក់៕