ភ្នំពេញៈ សាលាដំបូងរាជធានី-ភ្នំពេញបានចេញដីកាកោះហៅសមាជិកគណបក្សបេះដូងជាតិចំនួន ២ រូបពាក់ព័ន្ធនឹងករណី «ក្លែងបន្លំ» ឱ្យចូលបំភ្លឺនៅថ្ងៃទី ១៦ ធ្នូ ខណៈគណបក្សនេះចាត់ទុកការកោះហៅនេះ គឺជារូបភាពគំរាមកំហែងបំភិតបំភ័យ បំបាក់ស្មារតីប្រជាពលរដ្ឋ ក្នុងបរិយាកាសនយោបាយជាក់ស្តែងដែលគួរឱ្យព្រួយបារម្ភ។
យោងតាមដីកាចំនួន ២ ដែលចុះហត្ថលេខាដោយលោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញកាលពីថ្ងៃទី ៦ ខែធ្នូ ឆ្នាំ ២០២១ បានកោះហៅ លោកស្រី ស៊ីម ធាំ អាយុ ៦១ ឆ្នាំ បច្ចុប្បន្នរស់នៅភូមិត្រាវបាក់ ឃុំតាយ៉ែក ស្រុកសូទ្រនិគម ខេត្តសៀមរាប និងលោក ជា អ៊ាន អាយុ ៦២ ឆ្នាំរស់នៅភូមិងែកងក ឃុំបន្ទាយចក្រី ស្រុកព្រះស្តេច ខេត្តព្រៃវែង ឱ្យចូលបំភ្លឺនៅថ្ងៃទី ១៦ ធ្នូ ឆ្នាំ ២០២១ ករណីក្លែងបន្លំពាក់ព័ន្ធគណបក្សបេះដូងជាតិ។
លោក ផ្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញថ្លែងនៅថ្ងៃទី ១៣ ធ្នូថា លោក មិនមានយោបល់ចំពោះករណីខាងលើនេះទេ។
លោក សៀម ភ្លុក ស្ថាបនិកគណបក្សបេះដូងជាតិ ប្រាប់ភ្នំពេញប៉ុស្តិ៍នៅថ្ងៃទី ១៣ ធ្នូ ថា តាមព័ត៌មានគឺសាលាដំបូងរាជធានីភ្នំពេញបានកោះហៅ សមាជិករបស់លោកមានចំនួនច្រើន ដូចជានៅខេត្តកំពង់ធំ ខេត្តព្រៃវែង និងខេត្តសៀមរាបឱ្យចូលបំភ្លឺ ប៉ុន្តែសមាជិកគាំទ្រគណបក្សបេះដូងជាតិនៅមូលដ្ឋានចំនួន ២ រូបទើបទទួលបានដីកាកោះហៅកាលពីថ្ងៃទី ១២ ខែធ្នូ។
អ្នកទាំង ២ រូបនេះ នឹងទៅចូលរួមឆ្លើយបំភ្លឺ តាមកាលបរិច្ឆេទរបស់សាលាដំបូងរាជធានីភ្នំពេញ ដោយមិនរួញរានោះទេ។
ទោះជាយ៉ាងណាលោកចាត់ទុកការកោះហៅនេះ គឺជារូបភាពមួយគំរាមកំហែងបំភិតបំភ័យ បំបាក់ស្មារតីប្រជាពលរដ្ឋដែលបានគាំទ្របង្កើតគណបក្សនយោបាយដែលមានទស្សនៈផ្ទុយគណបក្សកាន់អំណាច និងគួរឱ្យព្រួយបារម្ភយ៉ាងខ្លាំង។ តាមរដ្ឋធម្មនុញ្ញកម្ពុជាបានធានាការពារសិទ្ធិសេរីភាពប្រជាពលរដ្ឋ ក្នុងការសម្តែងមតិ ឬការចូលរួមបង្កើតសមាគម និងគណបក្សនយោបាយតាមឆន្ទៈខ្លួន ដោយគ្មានការគំរាមកំហែង និងការបំភិតបំភ័យឡើយ។
លោកបានបញ្ជាក់ថា៖ «ខ្ញុំយល់ឃើញថា វាកំពុងបង្ហាញពិភពលោកថានៅកម្ពុជាកំពុងតែមានការគំរាមកំហែង បំបិទសិទ្ធិសេរីភាព និងបំភិតបំភ័យ ផ្នែកនយោបាយចំពោះអ្នកដែលមានទស្សនៈ និងឆន្ទៈនយោបាយផ្ទុយពីរដ្ឋាភិបាល និងមួយវិញទៀត ជាការរំខានដល់ប្រជាពលរដ្ឋ ព្រោះនៅពេលដែលគាត់មកគាត់ត្រូវការចំណាយលុយធ្វើដំណើរ និងខាតការងាររបស់គាត់ថែមទៀត»។
បើតាមលោក សៀម ភ្លុក ការគាំទ្រគណបក្សនយោបាយពីសំណាក់ប្រជាពលរដ្ឋតាមរយៈការផ្តិតមេដៃនេះបើទោះបីស្នាមមេដៃច្បាស់ ឬមិនច្បាស់ ក្រសួងគ្រាន់តែបដិសេធមិនទទួលស្គាល់ទៅវាចប់បាត់ទៅហើយ ព្រោះវាមិនបង្កព្យៈសនកម្មធ្វើឱ្យប៉ះពាល់ដល់សង្គម ឬបុគ្គលណាដែលត្រូវយកច្បាប់មកអនុវត្តនោះទេ។ ប៉ុន្តែ បើវាបង្កប៉ះពាល់ដល់សន្តិសុខសង្គមតុលាការធ្វើនេះគឺត្រឹមត្រូវ និងទទួលបានការគាំទ្រ។
លោក សំ សុខគង់ មេធាវីការពារក្តីឱ្យគណបក្សបេះដូងជាតិយល់ឃើញថា សាលាដំបូងរាជធានីភ្នំពេញ ចេញដីកាកោះហៅសមាជិកគាំទ្រគណបក្សបេះដូងជាតិចំនួន ២ រូបឱ្យចូលបំភ្លឺ ពាក់ព័ន្ធការ «ក្លែងបន្លំ» នេះបន្ទាប់ពីលោក សៀម ភ្លុក ស្ថាបនិកគណបក្សបេះដូងជាតិ ប្តឹងក្រសួងមហាផ្ទៃដែលបដិសេធមិនចុះបញ្ជីគណបក្សទៅតុលាការកំពូលដែលនឹងត្រូវបើកសវនាការនៅថ្ងៃទី ២៤ ខែធ្នូ ខាងមុខ។
លោកថ្លែងថា៖ «បើតាមការប្រាប់របស់ពួកគាត់ថាពួកគាត់មិនបានក្លែងស្នាមមេដៃ ដូចការចោទប្រកាន់ទេ ខ្ញុំគិតថា វាប៉ះពាល់ដល់ការសម្រេចរបស់តុលាការកំពូលដែរដោយសារតែតុលាការកំពូលមិនទាន់បានសម្រេចថា តើការចេញសេចក្តីសម្រេចរបស់ក្រសួងមហាផ្ទៃហ្នឹង ត្រូវរក្សាទុក ត្រូវលុបចោល ឬ បង្គាប់ឱ្យក្រសួងមហាផ្ទៃចុះឈ្មោះឡើងវិញទេ»។
បើតាមលោក សំ សុខគង់ សាលាដំបូងរាជធានីភ្នំពេញមិនគួរណាធ្វើដីកាកោះហៅសមាជិកគាំទ្រគណបក្សបេះដូងជាតិឱ្យចូលបំភ្លឺជុំវិញករណីក្លែងបន្លំមេដៃនៅពេលនេះនោះទេ គួរតែអនុញ្ញាតឱ្យតុលាការកំពូលសម្រេចបែបណាជាមុនសិន វាល្អជាង។
ភ្នំពេញប៉ុស្តិ៍មិនអាចទាក់ទង លោក ខៀវ សុភ័គ អ្នកនាំពាក្យក្រសួងមហាផ្ទៃសុំធ្វើអត្ថាធិប្បាយករណីនេះបានទេ នៅថ្ងៃទី ១៣ ធ្នូ។ ប៉ុន្តែ ក្រសួងមហាផ្ទៃ កាលពីថ្ងៃទី ១៦ វិច្ឆិកា បានចេញលិខិតបដិសេធមិនចុះបញ្ជីគណបក្សបេះដូងជាតិ ដោយសារការផ្តិតស្នាមមេដៃ មានភាពមិនប្រក្រតី ដោយមានការផ្តិតស្នាមមេដៃជំនួស ការកន្លែងបន្លំអត្តសញ្ញាណបុគ្គល និងការផ្តិតធ្វើឱ្យខូចគុណភាព ដើម្បីបង្កើនបរិមាណចំនួនគណបក្ស៕
វីដេអូ៖