.jpg)
សត្វដំរីនៅតំបន់ព្រៃភ្នំគូលែនក្នុងឆ្នាំនេះ។ រូបថត Kulen Elephant Forest
ភ្នំពេញៈ និស្សិត ១ ក្រុមបង្កើតយុទ្ធនាការមួយ ដែលមានឈ្មោះថា ១ ដុល្លារ ដើម្បីស្នាមញញឹមដំរី ដោយរៃអង្គាសថវិកាពីសប្បុរសជន ដើម្បីជួយអភិរក្សសត្វដំរីនៅតំបន់ជើងភ្នំគូលែន និងសម្រាប់ដោះស្រាយបញ្ហាជីវភាពអ្នកភូមិក្នុងតំបន់នោះ បន្ទាប់ពីពួកគេរងផលប៉ះពាល់ ដោយសារគ្មានភ្ញៀវទេសចរចូលទស្សនា។
យុវជន សាមរ៉ុង ហុកស្រ៊ុន ដែលជាប្រធានក្រុមអ្នកផ្តួចផ្តើមក្នុងចំណោមនិស្សិតចំនួន ៧ រូបប្រាប់ភ្នំពេញប៉ុស្តិ៍នាថ្ងៃទី ១៣ ធ្នូ ថា យុទ្ធនាការ ១ ដុល្លារ ដើម្បីស្នាមញញឹមដំរី គឺជាយុទ្ធនាការមួយដែលបានបង្កើតឡើងដោយក្រុមនិស្សិតសុទ្ធសាធ បន្ទាប់ពីមើលឃើញពីផលប៉ះពាល់ និងការខ្វះខាតរបស់ក្រុមអ្នកអភិរក្សសត្វដំរីក្នុងខេត្តសៀមរាប។ ជាពិសេសបញ្ហាប្រឈមនឹងការខ្វះខាតស្បៀងសម្រាប់សត្វដំរី។
យុវជន ហុកស្រ៊ុន បញ្ជាក់ថា៖ «យើងបង្កើតយុទ្ធនាការនេះ ដោយសារឃើញថាដំរីទាំងនេះពីដើមឡើយ គាត់ដឹកភ្ញៀវទេសចរនៅក្នុងខេត្តសៀមរាបយូរហើយ។ តែនៅពេលមើលឃើញពីការធ្វើអំពើឃោរឃៅទៅលើវាហ្នឹង បានគេយកវាទៅធ្វើការអភិរក្សនៅភ្នំគូលែន»។
ហុកស្រ៊ុន បន្ថែមថា៖ «ដោយសារតែមួយរយៈចុងក្រោយនេះ មានការប៉ះពាល់ដោយសារកូវីដ-១៩ ក៏អត់សូវមានភ្ញៀវទេសចរទៅអ៊ីចឹងទៅ ក៏បានប៉ះពាល់ដល់ការរស់នៅរបស់ដំរីដែរ។ យើងក៏គិតថា អាចជួយបានខ្លះ ក្នុងនាមជាសិស្ស»។
យុវជន សាមរ៉ុង ហុកស្រ៊ុន ដែលជានិស្សិតឆ្នាំទី ៤ នៅសាលា Paragon រាជធានីភ្នំពេញ និយាយ ថា យុទ្ធនាការដែលក្រុមខ្លួនបង្កើតនេះ មានរយៈពេល ១ ខែ គឺចាប់ពីដើមខែធ្នូ ហើយនឹងបញ្ចប់នៅដើមខែមករា។ ថវិកាដែលប្រមូលបានពីសប្បុរសជននឹងយកទៅប្រគល់ជូនក្រុមអ្នកអភិរក្ស និងប្រជាសហគមន៍តែម្តង។
យុវជនរូបនេះប្រាប់ថា៖ «យុទ្ធនាការយើងនេះ យើងបង្កើតជាផេកដោយធ្វើការផ្សព្វផ្សាយតាមរយៈបណ្តាញសង្គមហ្វេសប៊ុក ដើម្បីកៀរគរឱ្យមានការចូលរួមពីសប្បុរសជននានា។ យើងទើបតែបាន ១ អាទិត្យទេ តែក៏មានអ្នកចូលរួមជាច្រើន។ យើងសង្ឃឹមថានឹងមានការចូលរួមគាំទ្របន្ថែមទៀត»។
តំបន់អភិរក្សសត្វដំរីនៅជើងភ្នំគូលែន មានទីតាំងនៅភូមិបុស្សធំ ឃុំខ្នារពោធិ៍ ស្រុកសូទ្រនិគម ខេត្តសៀមរាបត្រូវបានបង្កើតឡើង កាលពីចុងឆ្នាំ ២០១៩ បន្ទាប់ពីបានសម្រេចប្រមូលសត្វដំរីចំនួន ១៣ ក្បាលរបស់ប្រជាសហគមន៍ដែលប្រកបរបរដឹកភ្ញៀវទស្សនាកម្សាន្តតាមតំបន់អង្គរយកមករក្សាទុកក្នុងតំបន់នេះ។
លោក ពីយ៉ូត ដាវីតហ្យាយ៉ា សហស្ថាបនិកតំបន់អភិរក្សសត្វដំរីនៅជើងភ្នំគូលែន ប្រាប់ភ្នំពេញ-ប៉ុស្តិ៍នៅថ្ងៃទី ១៣ ធ្នូ ថា គោលដៅនៃការប្រមូលសត្វដំរីទាំងនេះ ដើម្បីកាត់បន្ថយការធ្វើអំពើឃោរឃៅលើសត្វដំរី ដោយផ្តល់ឱ្យពួកគេនូវសេរីភាព និងការរស់នៅជាមួយនឹងធម្មជាតិជំនួសវិញ។
ប៉ុន្តែក្រោយគម្រោងដំណើរការ លោកបន្តថា ស្ថានភាពនៃការផ្ទុះកូវីដ ១៩ ក៏បានផ្ទុះឡើង ដែលជាហេតុធ្វើឱ្យប៉ះពាល់ស្ថិរភាព និងការរស់នៅរបស់ប្រជាសហគមន៍ និងការរស់នៅរបស់សត្វដំរី ព្រោះតែចំណូលដែលរំពឹងពីភ្ញៀវទេសចរចូលមើលកម្សាន្តក្នុងតំបន់អភិរក្ស ត្រូវបានបាត់បង់ជាបណ្តើរៗ។
លោកថ្លែងថា៖ «តាមពិតទៅ គម្រោងដំរីនេះ យើងមានបញ្ហាប្រមូលថវិកាតាំងពីដើមដំបូង ផ្ទុះកូវីដ ១៩ នៅដើមឆ្នាំ ២០២០ មកម៉្លេះ។ ព្រោះអីនៅខេត្តសៀមរាប គម្រោងយើងរស់តែជាមួយចំណូល ទេសចរណ៍ ហើយយើងបើកដំណើរការមិនទាន់ស្រួលបួលផង ក៏កូវីដនេះធ្លាក់មក។ ចំណូលយើងឥឡូវបានតែភ្ញៀវក្នុងស្រុក ដែលខ្សត់ជាងមុនឆ្ងាយណាស់»។
លោក ពីយ៉ូត ដាវីតហ្យាយ៉ា ឱ្យដឹងថា ក្នុង ១ ថ្ងៃ សត្វដំរីក្នុងតំបន់អភិរក្សត្រូវស៊ីចំណី យ៉ាងហោចណាស់ប្រមាណជា ២០០ ទៅ ៣០០ គីឡូ ដែលក្នុង ១ ថ្ងៃៗ តំបន់អភិរក្សសត្វដំរីជើងភ្នំគូលែន ត្រូវចំណាយផ្គត់ផ្គង់ដំរីចំនួន ១៣ ក្បាល។ លោកបង្ហាញក្តីសង្ឃឹមថា ការបង្កើតជាយុទ្ធនាការរបស់ក្រុមនិស្សិតក្នុងពេលនេះ គឺជាផ្នែកមួយ ដើម្បីចូលរួមជួយដល់សត្វដំរីក្នុងប្រទេសកម្ពុជា។
យុវជន លាង គុំមៈ ដែលបានចូលរួមផ្តល់ថវិកាតាមរយៈយុទ្ធាការនេះបាននិយាយថា ការចូលរួមរបស់ខ្លួន ក៏ព្រោះមើលឃើញថា ការជួយទៅលើសត្វដំរី វាជាការជួយមួយផ្នែកទៅលើសង្គមផងដែរ ខណៈដែលសត្វដំរីអាចទាក់ទាញជនបរទេសមកទស្សនា ហើយវាអាចធ្វើឱ្យប្រទេសកម្ពុជាមានភ្ញៀវទេសចរច្រើន៕
