ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈជំរុញឱ្យភាគីពាក់ព័ន្ធសិក្សាឱ្យបានស៊ីជម្រៅអំពីបញ្ហាប្រឈមក្នុងការដោះស្រាយវិវាទការងារឱ្យមានប្រសិទ្ធភាពខ្ពស់ សំដៅធានាបាននូវសុខដុមរមណីយកម្មនៃទំនាក់ទំនងវិជ្ជាជីវៈ ដែលជាកត្តាស្នូលទាក់ទាញការវិនិយោគ។
ការជំរុញនេះធ្វើឡើងក្នុងវេទិកាត្រីភាគីស្តីពីអនាគតនៃការដោះស្រាយវិវាទការងារ ដោយក្រុមប្រឹក្សាអាជ្ញាកណ្តាលនាព្រឹកថ្ងៃទី ១៣ ធ្នូ ដោយមានការចូលរួមពីក្រសួងការងារតំណាងអង្គការ ILO តំណាងក្រុមប្រឹក្សាអាជ្ញាកណ្តាល និងមូលនិធិក្រុមប្រឹក្សាអាជ្ញាកណ្តាល តំណាងអង្គការវិជ្ជាជីវៈរបស់និយោជក តំណាងអង្គការវិជ្ជាជីវៈរបស់កម្មករនិយោជិត និងតំណាងអ្នកបញ្ជាទិញអន្តរជាតិ។
វេទិកាត្រីភាគីនេះ គឺជាឱកាសដ៏សំខាន់ក្នុងការពិនិត្យឡើងវិញនូវសមិទ្ធផលការងារ និងបញ្ហាប្រឈមនានាក្នុងការពង្រឹងទំនាក់ទំនងវិជ្ជាជីវៈនៅកម្ពុជា។ ជាពិសេសការអនុវត្តយន្តការដោះស្រាយវិវាទការងាររួមដោយក្រុមប្រឹក្សាអាជ្ញាកណ្តាល។
នាឱកាសនោះ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានធ្វើការណែនាំដល់គ្រប់ភាគីពាក់ព័ន្ធសិក្សាឱ្យបានស៊ីជម្រៅអំពីបញ្ហាប្រឈមដែលបាន និងកំពុងជួបប្រទះក្នុងការដោះស្រាយវិវាទការងាររួម។ លោកជំរុញក្រុមប្រឹក្សាអាជ្ញាកណ្តាលត្រូវស្វែងរកដំណោះស្រាយរួមគ្នា ប្រកបដោយស្មារតីទទួលខុសត្រូវខ្ពស់ចំពោះវិវាទបុគ្គល។
លោកថ្លែងថា៖ «ភាគីពាក់ព័ន្ធសូមធ្វើការពិចារណាដោយផ្អែកលើមូលដ្ឋានគតិយុត្តជាធរមាន និងដើម្បីផលប្រយោជន៍រួមសំដៅធានាបានសុខដុមរមណីយកម្មនៃទំនាក់ទំនងវិជ្ជាជីវៈ ដែលជាកត្តាស្នូលក្នុងការទាក់ទាញការវិនិយោគ»។
លោក អ៊ិត សំហេង សង្ឃឹមថា គ្រប់ភាគីពាក់ព័ន្ធនឹងបន្តផ្តល់ទំនុកចិត្តដល់ក្រុមប្រឹក្សាអាជ្ញាកណ្តាលដោយផ្អែកលើបទពិសោធ និងការដោះស្រាយបញ្ហាប្រឈមក្នុងការដោះស្រាយវិវាទការងាររួមប្រកបដោយជោគជ័យ។ លោកថា វេទិកាត្រីភាគីនឹងចូលរួមចំណែកយ៉ាងសំខាន់ក្នុងការកំណត់នូវទិសដៅរួមគ្នា ដែលកើតចេញពីការឯកភាព និងការគាំទ្រពីគ្រប់ភាគីពាក់ព័ន្ធលើអនាគតនៃការដោះស្រាយវិវាទការងារដោយក្រុមប្រឹក្សាអាជ្ញាកណ្តាល ប្រកបដោយប្រសិទ្ធភាព និងតម្លាភាពស្របតាមច្បាប់ និងបទប្បញ្ញត្តិជាធរមាន។
លោកលើកទឹកចិត្តឱ្យបន្តយន្តការគាំទ្រហិរញ្ញវត្ថុពីពហុភាគី ប៉ុន្តែចៀសវាងការធ្វើចលនាទាមទារឱ្យមានការកាត់វិភាគទានពីកម្មករនិយោជិតតាមរយៈសហជីព ដើម្បីគាំទ្រហិរញ្ញវត្ថុរបស់ក្រុមប្រឹក្សាអាជ្ញាកណ្តាលក្នុងដំណាក់កាលនៃការស្តារសេដ្ឋកិច្ចក្នុង និងក្រោយវិបត្តិកូវីដ ១៩ ដែលអាចជះឥទ្ធិពលអវិជ្ជមានដល់ការពង្រឹងទំនាក់ទំនងវិជ្ជាជីវៈ និងការលើកកម្ពស់កម្រិតជីវភាពរបស់កម្មករនិយោជិត។
នាយកប្រតិបត្តិនៃក្រុមប្រឹក្សាអាជ្ញាកណ្តាលលោក ម៉ែន និមិ្មត ថ្លែងថា ក្នុងរយៈពេល ១៨ ឆ្នាំមកនេះ ការដោះស្រាយវិវាទរួមតាមរយៈក្រុមប្រឹក្សាអាជ្ញាកណ្តាលមានប្រមាណ ៣ ០០០ សំណុំរឿង ដែលអត្រាជោគជ័យមាន ៧៥ ភាគរយ។
លោកថា៖ «ប្រភេទវិវាទដែលដោះស្រាយរវាងកម្មករនិយោជិត និងនិយោជក គឺជាប្រភេទវិវាទរួម។ បញ្ហាកើតឡើងដោយសារការបណ្តេញចេញ ការបើកប្រាក់ខែខុស ធ្វើការលើសម៉ោងដែលជាប្រភេទវិវាទចម្បង»។
លោកបន្តថា ក្រៅពីនោះ មានប្រភេទវិវាទផ្សេងទៀតទាក់ទងទៅនឹងការរើសអើងពាក់ព័ន្ធស្ត្រីបំបៅដោះកូនត្រូវការកន្លែងត្រឹមត្រូវក្នុងសហគ្រាស និងវិវាទផ្សេងៗទៀតដែលរាប់ថាជាវិវាទផលប្រយោជន៍។ លោកថា ការដោះស្រាយនៅក្រុមប្រឹក្សាអាជ្ញាកណ្តាលមានភាពខុសគ្នាខ្លាំងជាមួយការដោះស្រាយវិវាទនៅតាមតុលាការ។ លោកបន្តថា៖ «អ្វីដែលខុសគ្នាសំខាន់នោះ គឺយើងប្រើពេលវេលាតែ ១៥ ថ្ងៃទេ ក្រោមផ្លូវច្បាប់។ ប៉ុន្តែបើភាគីវិវាទគាត់ព្រមព្រៀងគ្នាថា សុំឱ្យអាជ្ញាកណ្តាលចំណាយពេលបន្ថែមទៀត ដោយសារបញ្ហាស្មុគស្មាញ យើងអាចពន្យារពេលលើសពី ១៥ ថ្ងៃ បន្ទាប់មកយើងចេញសេចក្តីបង្គាប់ទៅគេ អាចយកទៅប្រើប្រាស់បានថា អ្នកណាជាអ្នកឈ្នះ»។
លោក និម្មិត បន្តថា៖ «ប៉ុន្តែបើនៅតុលាការ មាន ៣ ជាន់នៅសាលាដំបូង សាលាឧទ្ធរណ៍ និងតុលាការកំពូល ហើយការដោះស្រាយនៅតុលាការជាការរកយុត្តិធម៌ស៊ីជម្រៅ។ ត្រូវប្រើប្រាស់ពេលវេលាច្រើនណាស់ ហើយដោះស្រាយបានទាំងវិវាទបុគ្គល និង វិវាទរួមដែលត្រូវការពេលរាប់ខែ ឬរាប់ឆ្នាំ»។
ប្រធានសហភាពសហជីពយុវជនការពារសិទ្ធិកម្មករកម្ពុជា លោក ឡុង សុផាត ថ្លែងថា វត្តមាននៃក្រុមប្រឹក្សាអាជ្ញាកណ្តាល គឺជាយន្តការមួយ បង្កើតឡើងដោយច្បាប់ស្តីពីការងារ។ ការដោះស្រាយមានភាពល្អច្រើន។
លោកថ្លែងថា៖ «តាំងពីបង្កើតក្រុមប្រឹក្សាអាជ្ញាកណ្តាលយើងមើលឃើញដំណើរការក្នុងការដោះស្រាយវិវាទការងារជារួមកន្លងមក គឺប្រសិទ្ធភាពធ្វើឱ្យមានសុខដុមរមណីយកម្មនៅកន្លែងការងារ គឺមានភាពល្អច្រើន ដោយសារភាគីនិយោជក និងកម្មករនិយោជិត នៅពេលមានវិវាទកើតឡើង គាត់បានជួបគ្នានៅក្រុមប្រឹក្សាអាជ្ញាកណ្តាល មុនឈានដល់តុលាការ»៕