.jpg)
គ្រឿងញៀនដែលបង្ក្រាបបានត្រូវបាននាំយកមកធ្វើសន្និសីទកាសែតនៅនាយកដ្ឋានប្រឆាំងគ្រឿងញៀន នាថ្ងៃទី១៤ ធ្នូ។ រូបថត ហេង ជីវ័ន
ព្រះសីហនុ/កំពង់ស្ពឺៈ ករណីបង្ក្រាបគ្រឿងញៀនជាង២តោន នៅស្រុកកំពុងសីលា ខេត្តព្រះសីហនុ និងនៅស្រុកឱរ៉ាល់ក្នុងខេត្តកំពង់ស្ពឺ សមត្ថកិច្ចនគរបាលជំនាញ អះអាងថា ជាប្រតិបត្តិការ ២ ក្នុងពេលតែមួយ។
លោកម៉ក់ ជីតូ អគ្គស្នងការរងនគរបាលជាតិ ទទួលបន្ទុកបង្ក្រាបបទល្មើសគ្រឿងញៀន បានប្រាប់នៅថ្ងៃទី១៤ ខែធ្នូនេះថា ករណីទាំង២នេះ សមត្ថកិច្ចនគរបាលជំនាញ បានធ្វើការស្រាវជ្រាវ អស់រយៈពេល៣ខែមកហើយ បន្ទាប់ពីទទួលបានព័ត៌មានពីនគរបាលជំនាញនៃប្រទេសចិនថា មានជនជាតិចិន១ក្រុម ប៉ុនប៉ងធ្វើការកែច្នៃគ្រឿងញៀននៅក្នុងប្រទេសកម្ពុជា ដើម្បីនាំចេញទៅកាន់ប្រទេសមួយចំនួននៅក្នុងតំបន់។ ថ្មីៗនេះ មានសេចក្ដីរាយការណ៍ ពីភ្នាក់ងារសម្ងាត់ថា មានជនជាតិចិន១ក្រុមទៀត មានផែនការដឹកជញ្ជូនគ្រឿងញៀនដ៏ច្រើនសន្ធឹកសន្ធាប់ ចេញពីភ្នំពេញ ក្នុងគោលដៅទៅខេត្តព្រះសីហនុ ឬ ខេត្តកោះកុង ដើម្បីនាំយកទៅកាន់នាវា១នៅកោះតាង។
លោកបញ្ជាក់ថា៖«ក្នុងប្រតិបត្តិការបង្ក្រាបករណីគ្រឿងញៀនទាំង២ករណី ក្នុងពេលតែមួយនេះ សមត្ថកិច្ចយើង បានប្រើសិទ្ធិការពារខ្លួន បាញ់តតបបណ្ដាលឱ្យជនសង្ស័យជនជាតិចិនម្នាក់ស្លាប់នៅនឹងកន្លែង បន្ទាប់ពីជនសង្ស័យរូបនោះ បានបើកឡានបុកបារ៉ាស់ហើយបាញ់មកលើសមត្ថកិច្ចយើងទាំងកម្រោល»។
បើតាមលោកម៉ក់ ជីតូ ក្រោយការបង្ក្រាប ដោយមានការបាញ់ប្រហារគ្នា ជាមួយក្រុមជនសង្ស័យនៅលើកំណាត់ផ្លូវជាតិលេខ៤ ក្នុងភូមិសាស្ត្រស្រុកកំពង់សីលា ខេត្តព្រះសីហនុ ដែលបណ្ដាលឱ្យជនសង្ស័យម្នាក់ស្លាប់ សមត្ថកិច្ចបានចាប់ឃាត់ខ្លួនជនសង្ស័យម្នាក់ ជាមួយគ្រឿញៀន ប្រភេទ Ketamineចំនួន១ ៤៨០គីឡូក្រាម។ បន្ទាប់ពីសួរចម្លើយជនសង្ស័យរូបនោះ សមត្ថកិច្ចក៏បានដឹងពីទីតាំងផលិត ហើយឈានដល់ការបង្ក្រាបចាប់បានមេខ្លោងធំម្នាក់ទៀតនៅក្នុងរោងចក្រផលិតអាល់កុល ក្នុងស្រុកឱរ៉ាល់ ខេត្តកំពង់ស្ពឺ រួមទាំងអ្នកពាក់ព័ន្ធចំនួន១៤នាក់ ដែលក្នុងនោះភាគច្រើនជាកម្មករ។
លោកបញ្ជាក់ថា៖«នៅទីតាំងរោងចក្រនេះ សមត្ថកិច្ចយើងបានរកឃើញថ្នាំញៀនប្រភេទ Ketamine ចំនួន៧៥៣គីឡូក្រាមបន្ថែមទៀត រួមទាំងសារធាតុគីមីផ្សំជាង៨៤តោន។ ដូច្នេះគ្រឿងញៀនដែលយើងបង្ក្រាបបានកាលពីថ្ងៃទី១៣ មានចំនួនសរុបជាង២តោន»។
លោកបានបន្ថែមថា នៅពេលនេះកម្លាំងសមត្ថកិច្ចគរបាលជំនាញកំពុងបន្តស៊ើបសួរជនសង្ស័យ និង កំពុងសហការជាមួយកម្លាំងនគរបាលជើងទឹក ដើម្បីស្រាវជ្រាវរកនាវា របស់ក្រុមជនសង្ស័យនៅកោះតាង៕
