ភ្នំពេញៈ គណបក្សហ៊្វុនស៊ិនប៉ិចបានចាប់ផ្តើមបន្តមានជម្លោះផ្ទៃក្នុងឡើងវិញ ក្រោយពីមានការប្រកាសរៀបចំធ្វើសមាជនៅដើមឆ្នាំក្រោយ ដែលគ្រោងថ្វាយព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានគណបក្សនេះ ក៏ប៉ុន្ដែការប្រកាសមិនទាន់បានប៉ុន្មានថ្ងៃផង ក៏មានការបើកកិច្ចប្រជុំគណៈកម្មាធិការនាយកគណបក្សហើយបានច្រានចោលការប្រកាសនេះ ដោយអះអាងថាផ្ទុយនឹងច្បាប់ និងលក្ខន្តិកៈគណបក្ស។
លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិចប្រាប់ភ្នំពេញប៉ុស្តិ៍នៅថ្ងៃទី ១៤ ខែធ្នូ ឆ្នាំនេះថា លោកទទួលបានព័ត៌មានពីកិច្ចប្រជុំ ចំពោះការមិនពេញចិត្តនេះ ប៉ុន្តែក្រុមនេះត្រូវបានសម្តេចក្រុមព្រះ នរោត្តម រណឫទ្ធិ បណ្តេញចេញពីបក្សជាច្រើនឆ្នាំមកហើយ គឺគេមិនមានសិទ្ធិប្រជុំ ឬសម្រេចអ្វីទាំងអស់។
លោកបន្តថា ក្រុមនេះធ្លាប់បានដាក់ពាក្យបណ្តឹងទៅតុលាការពីករណីបណ្តេញចេញនេះ ប៉ុន្តែមកទល់ពេលនេះ តុលាការមិនបានចាត់ការនៅឡើយទេ។
ឥឡូវពួកគាត់នៅតែបន្តធ្វើខុសច្បាប់ ប៉ុន្តែនេះគឺជាសិទ្ធិរបស់គាត់។
គណបក្សនឹងមិនថាអ្វីទេ គ្រាន់តែនឹងរៀបចំពាក្យបណ្តឹងប្តឹងទៅតុលាការ ព្រោះពួកគាត់បានចាត់តាំងតួនាទីភារកិច្ចខ្លួនឯងផ្ទុយពីច្បាប់ និងលក្ខន្តិកៈរបស់គណបក្ស។
លោកបានបញ្ជាក់ថា គណបក្សនៅតែបន្តរក្សាជំហររៀបចំធ្វើសមាជដដែលទេដើម្បីថ្វាយព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានគណបក្សដោយក្នុងនោះមានការគាំទ្រច្រើនពីបណ្តាទូតនានា និងព្រះរាជវង្សានុវង្ស ជាពិសេសមិត្តចិននៅតែប្តេជ្ញាទំនាក់ទំនងការទូតល្អរវាងគណបក្សហ៊្វុនស៊ិនប៉ិច និងគណបក្សកុម្មុយនីស្តចិន។
លោកបន្តថា ក្នុងលក្ខន្តិកៈបានចែងថា ប្រសិនបើអវត្តមានប្រធានគណបក្សក្នុងប្រការណាមួយ អ្នកដែលទទួលបានលិខិតប្រទានសិទ្ធិពីប្រធានដែលព្រះអង្គម្ចាស់ ចក្រាវុឌ្ឍទទួលរួចហើយ និងបានបញ្ជូនទៅក្រសួងមហាផ្ទៃថ្ងៃ ២២ ខែវិច្ឆិកា គឺស្របទៅតាមច្បាប់ ដោយនៅតែធ្វើសមាជទទួលស្គាល់ជាផ្លូវការប៉ុណ្ណោះ។
យ៉ាងណាក្ដី លោក ផាន់ សិទ្ធី ដែលត្រូវបានអះអាងថា ទទួលបន្ទុកជាអ្នកនាំពាក្យឱ្យគណៈកម្មាធិការនាយកគណបក្សហ៊្វុនស៊ិនប៉ិច ថ្លែងថា ការដាក់ពាក្យប្តឹងប្រឆាំងនឹងក្រុមលោកគឺជាសិទ្ធិរបស់ភាគីព្រះអង្គម្ចាស់ នរោត្តម ចក្រាវុឌ្ឍ ប៉ុន្តែបើពិនិត្យផ្លូវច្បាប់ និងតុលាការថាត្រឹមត្រូវ ឬខុសច្បាប់យ៉ាងណានោះ ត្រូវតែគោរព ព្រោះភាគីលោកក៏សំអាងលើច្បាប់ដែរ។
លោកបានបន្តថា លោកក៏មិនបានហាមការធ្វើសមាជថ្វាយព្រះអង្គម្ចាស់ នរោត្តម ចក្រាវុឌ្ឍ ធ្វើជាប្រធានគណបក្សដែរ ប៉ុន្តែការធ្វើនោះត្រូវតែស្របទៅតាមច្បាប់ និងលក្ខន្តិកៈ ខណៈកម្មាធិការនាយកនៅមានវត្តមាននៅឡើយ។
ជាមួយនេះ លោកបានបន្ថែមថា មានបុគ្គលខ្លះ មិនមានឈ្មោះក្នុងបញ្ជីគណបក្សទេ ប៉ុន្តែប្រកាសប្តឹងអ្នកដែលមានតួនាទីត្រឹមត្រូវ និងមានឈ្មោះតម្កល់នៅក្រសួងមហាផ្ទៃផង និងក្នុងគណបក្សផងគឺមិនអាចទទួលយកបានទេ។
លោកថា៖ «យើងជាម្ចាស់ផ្ទះ ហើយគេមកប្រាប់យើងថាឱ្យយើងចេញ និងចាត់ទុកថាជាផ្ទះរបស់គេ តើឱ្យខ្ញុំចេញទៅណា បើខ្ញុំនៅហ្នឹងយូរហើយហ្នឹង? មួយទៀត ខ្ញុំក៏មិនដែលឃើញក្រដាសបណ្តេញចេញណាមួយមកដល់ដៃខ្ញុំទេ ខ្ញុំអត់ដែលមានទេ ខ្ញុំឃើញតែបង្ហោះនៅលើហ្វេសប៊ុក ខ្ញុំមិនដឹងថា ព័ត៌មានពិត ឬក្លែងក្លាយទេ»។
យោងតាមសេចក្ដីប្រកាសព័ត៌មានស្តីពីលទ្ធផលនៃអង្គប្រជុំវិសាមញ្ញគណៈកម្មាធិការនាយកគណបក្សហ៊្វុនស៊ិនប៉ិចថ្ងៃទី ១៣ ខែធ្នូ ឆ្នាំនេះ ការតែងតាំងប្រធានស្ដីទីកន្លងមកត្រូវបានក្រសួងមហាផ្ទៃចេញលិខិតលេខ ១៥២៥ សជណ ចុះថ្ងៃទី ១០ ខែកញ្ញា ឆ្នាំ ២០១៨ តម្រូវឱ្យអនុវត្តត្រឹមត្រូវតាមលក្ខន្តិកៈ។
ក៏ប៉ុន្តែរហូតមកទល់ពេលនេះគណបក្សហ៊្វុនស៊ិនប៉ិចពុំទាន់បានចាត់ចែងអនុវត្តតាមនៅឡើយទេ។
សេចក្តីប្រកាសព័ត៌មាននេះបន្តថា ក្នុងស្ថានភាពដែលគណបក្សហ៊្វុនស៊ិនប៉ិចគ្មានប្រធានដឹកនាំ គណបក្សបានស្ថិតក្នុងករណីប្រធានសក្តិ ដូចមានចែងក្នុងប្រការ ២៤ នៃលក្ខន្តិកៈ ដូច្នេះមានតែគណៈកម្មាធិការនាយកទេ ដែលមានសមត្ថកិច្ច កោះប្រជុំសមាជស្របតាមនីតិវិធីដូចមានចែងក្នុងលក្ខន្តិកៈ។
យោងតាមមាត្រា ១៨. ថ្មីនៃច្បាប់ស្ដីពីវិសោធនកម្មច្បាប់ស្តីពីគណបក្សនយោបាយបានអនុញ្ញាតឱ្យគណបក្សនយោបាយចាត់នីតិវិធីដើម្បីជំនួសប្រធានគណបក្សដែលបាត់បង់តួនាទីក្នុងរយៈពេលយ៉ាងយូរ ៩០ ថ្ងៃ គិតពីថ្ងៃបាត់បង់តួនាទីនោះ។ ដោយឡែកប្រការ ២៤ វាក្យខណ្ឌ ៣ នៃលក្ខន្តិកៈគណបក្សហ៊្វុនស៊ិនប៉ិចចែងថា “ក្នុងករណីប្រធានសក្ដិ គណៈកម្មាធិការនាយកត្រូវរៀបចំកោះប្រជុំសមាជ ដើម្បីជ្រើសតាំងប្រធានគណបក្សក្នុងរយៈវេលា ៦០ ថ្ងៃ យ៉ាងយូរ។
ទោះជាយ៉ាងណា គណបក្សហ៊្វុនស៊ិនប៉ិច នៅថ្ងៃទី ១៤ ខែធ្នូ បានប្រកាសបដិសេធទាំងស្រុងចំពោះសេចក្តីប្រកាសស្តីពីលទ្ធផលនៃអង្គប្រជុំវិសាមញ្ញគណៈកម្មាធិការនាយកគណបក្សហ៊្វុនស៊ិនប៉ិចចុះថ្ងៃទី ១៣ ខែធ្នូឆ្នាំ ២០២១ ហើយថា បច្ចុប្បន្នគណបក្សនេះ ស្ថិតក្រោមការដឹកនាំរបស់ព្រះអង្គម្ចាស់ នរោត្តម ចក្រាវុឌ្ឍ ព្រះប្រធានស្ដីទីស្របច្បាប់។
លោក យង់ ពៅ គ្រូបង្រៀនផ្នែកវិទ្យាសាស្ត្រនយោបាយនៃរាជបណ្ឌិត្យសភាកម្ពុជាថ្លែងថា ដំណើរគណបក្សហ៊្វុនស៊ិនប៉ិចដែលបានចូលរួមសង្វៀននយោបាយចាប់តាំងពីឆ្នាំ ១៩៩៣ រហូតមកទល់ពេលនេះមានសភាពឃ្លេងឃ្លោង ដោយសារមានបញ្ហាផ្ទៃក្នុងមិនចេះចប់មិនចេះហើយ។
លោកបន្តថា អ្នកដទៃបានចាត់ទុកថា បញ្ហាផ្ទៃក្នុងនេះ កើតឡើងដោយសារមានការជ្រៀតជ្រែកពីមជ្ឈដ្ឋានខាងក្រៅ ប៉ុន្តែតាមពិតមិនមែនដូច្នោះឡើយ គឺផ្ទៃក្នុងរបស់គណបក្សនេះមានភាពមិនរឹងមាំខ្លួនឯង ដែលទិដ្ឋភាពត្រូវបានកើតមកជាលំដាប់លំដោយតរៀងមកទល់នឹងបច្ចុប្បន្ន។
លោកថ្លែងថា៖ «គណបក្សហ៊្វុនស៊ិនប៉ិចធ្វើដំណើរមកពីគណបក្សធំជាងគេដែលឈ្នះកៅអីនៅក្នុងរដ្ឋសភាច្រើនជាងគេរហូតដល់អស់កៅអីរលីង និងខ្សោយទៅៗរបស់គណបក្ស ដោយសារតែមិនឯកភាពផ្ទៃក្នុងហើយមកដល់ដំណាក់កាលថ្មីទៀត ឥរិយាបថនយោបាយរបស់គណបក្សនេះ នៅតែដដែល គឺមិនមានការឯកភាពគ្នាជាធ្លុងមួយ»។
បើតាមលោក យង់ ពៅ បើគណបក្សនេះមិនមានការឯកភាពផ្ទៃក្នុងទេ គឺមិនអាចទៅឃោសនារកសំឡេងឆ្នោត និងការគាំទ្រពីប្រជាពលរដ្ឋបានទេ។ លោកថា អ្នកនយោបាយ ឬគណបក្សនយោបាយដែលអាចទាញយកសមានចិត្តពីប្រជាពលរដ្ឋគឺត្រូវបង្ហាញភាពរឹងមាំទើបអាចទទួលបានការជឿទុកចិត្ត៕
វីដេអូ៖