ភ្នំពេញៈ អង្គភាពស៊ីម៉ាក់មានផែនការរំដោះផៃ្ទដីរងការគំរាមកំហែង ដោយសារគ្រាប់មីន និងសំណល់យុទ្ធភណ្ឌសង្គ្រាម ជាង ១២៥ គីឡូម៉ែត្រក្រឡាសម្រាប់ផែនការឆ្នាំ ២០២២ ខាងមុខ និងក៏អាចពង្រីកបន្ថែម ដើម្បីសម្រេចមហិច្ឆតាតាមផែនការ។ នេះបើតាមលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC)។
តាមរយៈផែនការនេះ អង្គភាពស៊ីម៉ាក់បានទទួលការគាំទ្រពីគម្រោងផ្សេងៗ សរុបចំនួន ២៥ រួមមាន របស់រាជរដ្ឋាភិបាល គម្រោងជំនួយរបស់រដ្ឋាភិបាលជប៉ុន គម្រោងជំនួយតាមរយ:ដេញថ្លៃពី UNDP និងអាជ្ញាធរមីន គម្រោងជំនួយរបស់រដ្ឋាភិបាលចិន គម្រោងជំនួយរបស់អង្គការជំនួយប្រជាជនន័រវែស (NPA ដែលទទួលបានពីរដ្ឋាភិបាល ន័រវែស និងអាមេរិក) គម្រោងជំនួយអង្គការ APOPO របស់រដ្ឋាភិបាលប៊ែលហ្ស៊ិក គម្រោងជំនួយរបស់អង្គការ JMAS និងគម្រោងជំនួយជាមួយអង្គការ MAG សរុបមានចំនួន ២៥ គម្រោង និងអាចមានលទ្ធភាពពង្រីកបន្ថែម ដើម្បីសម្រេចមហិច្ឆតាផែនការឆ្នាំ ២០២២ ខាងមុខនេះ។
លោក ហេង រតនា អគ្គនាយក CMAC ថ្លែងនៅថ្ងៃទី ១៣ ធ្នូ ថា ក្នុងរយៈពេល ១១ ខែ គិតចាប់ពីខែមករា ដល់ខែវិច្ឆិកា ឆ្នាំ ២០២១ ក្រុមការងារ CMAC បានធ្វើការបោសសម្អាតមីន និងសំណល់យុទ្ធភណ្ឌសង្គ្រាម រំដោះផ្ទៃដីចម្ការមីន និងចម្ការគ្រាប់សរុបទំហំ ៩១ ៩១៩ ៩៧២ ម៉ែត្រក្រឡា ស្មើនឹងជាង ៩២% នៃផែនការ ដោយរុករកឃើញ និងកម្ទេចចោល គ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៨២ ១៣៨ គ្រាប់។ ក្នុងនោះគ្រាប់មីនប្រឆាំងមនុស្សចំនួន ១៦ ១៣៨ គ្រាប់ មីនប្រឆាំងរថក្រោះចំនួន ៣២៣ គ្រាប់ គ្រាប់បែកទម្លាក់ពីយន្ដហោះ ៣៩ គ្រាប់ គ្រាប់បែកចង្កោម ៨ ០៩០ គ្រាប់ មីនច្នៃចំនួន ១៧ គ្រាប់ និងគ្រាប់យុទ្ធភណ្ឌ មិនទាន់ផ្ទុះគ្រប់ប្រភេទមានចំនួន ៥៧ ៥៣១ គ្រាប់។
លោកថ្លែងថា៖ «នេះជាលទ្ធផល មួយដែលបង្ហាញពីការខិតខំរបស់បងប្អូន ហើយជាមោទនភាពដែលយើងសម្រេចបានជោគជ័យ ដោយមិនមានបញ្ហាអ្វីប៉ះពាល់ធ្ងន់ធ្ងរដល់ស្ថានភាពសុខភាពរបស់បងប្អូនក្នុងសម័យកូវីដ-១៩។ អ្វីដែលជាមោទនភាពរបស់យើង គឺយើងអរគុណដៃគូអភិវឌ្ឍន៍ ភ្នាក់ងារផ្តល់ជំនួយទាំងអស់ទោះក្នុងកាលៈទេសៈដ៏លំបាកនៃស្ថានភាពសេដ្ឋកិច្ចក៏ដោយ ក៏នៅតែប្តេជ្ញាបន្តគាំទ្រយើងពេញទំហឹង»។
បើតាមលោកអគ្គនាយកក្នុងរយៈពេល ១១ ខែ ឆ្នាំ ២០២១ នេះ អង្គភាពស៊ីម៉ាក់ និងបណ្តាញស្ម័គ្រចិត្ត តាមភូមិ ឃុំ ស្រុក ក៏បានចុះធ្វើការផ្សព្វផ្សាយអប់រំ ការយល់ដឹងពីគ្រោះថ្នាក់ ដោយសារមីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួនជាង ១៦ ០០០ លើក ដោយចុះជួបតាមខ្នងផ្ទះមានចំនួនជាង ៦០០ ០០០ ខ្នងផ្ទះ មានប្រជាពលរដ្ឋចូលរួមសរុបចំនួនជិត ១ លាននាក់។
លោក ហេង រតនា ប្រាប់ថា ជាមួយគ្នានេះ ក្រុមការងារក៏បានចុះពិនិត្យទីតាំងគ្រាប់មីន និងយុទ្ធភណ្ឌមិនទាន់ផ្ទុះដែលប្រជាពលរដ្ឋបានរាយការណ៍ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទបានចំនួនជិត ១៥ ៤០០ គ្រាប់ និងអាវុធធុនស្រាលមួយចំនួនផងដែរ។
លោកបន្តថា តាមលទ្ធផលដែលបានផ្តល់ការអប់រំនេះ សង្កេតឃើញថា ទី ១ ពលរដ្ឋបានយល់ដឹង និងចេះផ្តល់នូវព័ត៌មានទីតាំងគ្រាប់ ដែលធ្លាប់ជួបកន្លងមកដើម្បីឱ្យស៊ីម៉ាក់ទៅយកមកកម្ទេចចោល។ លោកថា នេះជាឥរិយាបថមួយដែលពលរដ្ឋបានចូលរួមសហការរាយការណ៍ពីទីតាំងគ្រាប់ ដែលគាត់ធ្លាប់ជួបប្រទះ បានជោគជ័យ ជាង ១ ម៉ឺនគ្រាប់។ ប៉ុន្តែប្រទេសខ្លះ ១ ឆ្នាំបានតែ ១០០ ឬ ២០០ គ្រាប់ប៉ុណ្ណោះ បើគិតពីការចូលរួមសហការរបស់ប្រជាពលរដ្ឋ។
លោកថ្លែងថា៖ «ការអប់រំមួយទៀត គឺគាត់ផ្លាស់ប្តូរឥរិយាបថរបស់ គាត់កាន់តែទូលំទូលាយ ជាងមុន ដោយគាត់ស្ម័គ្រចិត្តចូលរួមជាមួយយើងតែម្តង គឺចូលរួមតាមរយៈបណ្តាញស្ម័គ្រចិត្ត»។
លោក អ៊ឹម ប៊ុនយូ មេឃុំតាគ្រាម ស្រុកបាណន់ ខេត្តបាត់ដំបង ថ្លែងនៅថ្ងៃទី ១៤ ធ្នូ ថា គ្រាប់មីន និងគ្រាប់យុទ្ធភណ្ឌមិនទាន់ផ្ទុះ នៅតែជាក្តីបារម្ភមួយសម្រាប់ប្រជាពលរដ្ឋក្នុងឃុំតាគ្រាម។ ព្រោះពេលខ្លះពលរដ្ឋបានប្រទះឃើញគ្រាប់ទាំងនោះ នៅពេលជីកប្រឡាយ ឬឃ្វាលគោជាដើម ប៉ុន្តែយ៉ាងណាក៏ដោយ អង្គការស៊ីម៉ាក់កំពុងបន្តស្រាវជ្រាវរុករកសម្អាត និងប្រមូលយកទៅកម្ទេចចោលជាបន្តបន្ទាប់។
លោកបន្តថា ការបោសសម្អាតប្រមូលគ្រាប់មីន និងគ្រាប់យុទ្ធភណ្ឌមិនទាន់ផ្ទុះមានប្រយោជន៍ច្រើន ហើយធ្វើឱ្យប្រជាពលរដ្ឋមានភាពកក់ក្តៅ និងមិនសូវភ័យខ្លាចគ្រោះថ្នាក់ដោយសារគ្រាប់ទាំងនោះទៀត។ បច្ចុប្បន្ន ពលរដ្ឋយល់ដឹងជាងមុន និងបានចូលរួមសហការល្អក្នុងការរាយការណ៍មកអាជ្ញាធរ ឬសមត្ថកិច្ច ព្រមទាំងចេះប្រយ័ត្ន និងការពារខ្លួនដោយមិនបំពានទីកន្លែងមានមីនផងដែរ។
លោកថ្លែងថា៖ «មានប្រយោជន៍ទី ១ បងប្អូនយើងមិនព្រួយបារម្ភពីគ្រោះថ្នាក់ដោយសារគ្រាប់មិនទាន់ ផ្ទុះ ទី ២ ទៀតបងប្អូនយើងគាត់ថា អាចសាងសង់ទីលំនៅអីនៅតាមដីភូមិរបស់គាត់ អ៊ីចឹងទៅណា។ បើសិនជាការសហការរបស់យើង មិនបានល្អ នឹងធ្វើឱ្យពលរដ្ឋមានបញ្ហាគ្រោះថ្នាក់ស្ទើរតែរាល់ឆ្នាំ តាមរយៈការធ្វើចម្ការ ឃ្វាលគោ និងការអាស្រ័យផលផ្សេងៗ»៕