.jpg)
កម្មករតវ៉ាបើកប្រាក់ជំពាក់ពីក្រុមហ៊ុនសាងសង់ កាលពីម្សិលមិញ។ រូបថត ហ្វេសប៊ុក
ភ្នំពេញៈ តំណាងកម្មករប្រមាណ ៥០ នាក់បានប្រមូលផ្តុំគ្នាតវ៉ានៅព្រឹកថ្ងៃទី ១៤ ខែធ្នូ នៅមុខការដ្ឋានសាងសង់មួយកន្លែងស្ថិតនៅតាមបណ្ដោយផ្លូវលេខ ៣៦ ភូមិបឹងសាឡាង សង្កាត់ទួលសង្កែ ខណ្ឌឫស្សីកែវ បន្ទាប់ពីក្រុមហ៊ុនម៉ៅការសាងសង់អគារនេះ មិនបានទូទាត់ប្រាក់ទៅតាមកិច្ចសន្យា។
តំណាងកម្មករបានអះអាងថា ក្រុមហ៊ុនម៉ៅការសាងសង់ YT ដែលជាអ្នកម៉ៅការសាងសង់គម្រោងដ៏ធំមួយនៅមជ្ឈមណ្ឌលផ្សារបោះដុំ ឈ្មោះថា TCC មិនបានទូទាត់ប្រាក់សាងសង់ទៅតាមកិច្ចសន្យា។
លោក ពៅ កម្មករម្នាក់ដែលធ្វើការសាងសង់អគារនេះរយៈពេល ២ ឆ្នាំបានប្រាប់ភ្នំពេញប៉ុស្តិ៍នៅថ្ងៃទី ១៤ ធ្នូថា ក្នុងអំឡុងពេលកូវីដ ក្រុមហ៊ុន YT បានជំពាក់ប្រាក់ខែកម្មករ ជាហូរហែ ទៅតាមផ្នែកនីមួយៗ ដែលទទួលបានការសាងសង់បន្តពីក្រុមហ៊ុននេះ។ មេការដែលជួលខ្លួន ធ្វើការអះអាងថា ក្រុមហ៊ុននេះជំពាក់ប្រមាណ ១០ ម៉ឺនដុល្លារ។
លោកបានបន្តថា៖ «យើងបានប្រមូលគ្នានេះ ព្រោះតែយើងរង់ចាំយូរហើយ គេចេះតែមិនបើកលុយឱ្យយើង ហើយឱ្យយើងបន្តសាងសង់រហូត។ យើងមកប្រមូលផ្តុំគ្នានេះ គឺសង្ឃឹមថា នឹងមានការជួយដោះស្រាយឱ្យក្រុមហ៊ុននេះ សងលុយមកពួកយើង»។
បើតាមលោក ពៅ បានអះអាងថា គម្រោងដ៏ធំមួយនៅមជ្ឈមណ្ឌលផ្សារបោះដុំ ឈ្មោះថា TCC ត្រូវបានសាងសង់រយៈពេល ជិត ២ ឆ្នាំមកហើយ ដោយបច្ចុប្បន្ននេះ គម្រោងនេះបានសាងសង់បានប្រមាណជាង ៥០ ភាគរយ ដោយមានក្រុមម៉ៅការបន្តជាច្រើនក្រុម បានទទួលការសាងសង់បន្តពីក្រុមហ៊ុនម៉ៅការសាងសង់ YT។
ភ្នំពេញប៉ុស្តិ៍មិនអាចស្វែងរកលេខទំនាក់ទំនងតំណាងក្រុមហ៊ុនម៉ៅការសាងសង់ YT ដើម្បីសុំអត្ថាធិប្បាយបានទេ កាលពីថ្ងៃទី ១៤ ធ្នូ។
លោក ឯក ឃុនដឿន អភិបាលខណ្ឌឫស្សីកែវបានប្រាប់ភ្នំពេញប៉ុស្តិ៍នៅថ្ងៃទី ១៤ ធ្នូ ថា បន្ទាប់ពីមានការប្រមូលផ្តុំតវ៉ារបស់កម្មករ អាជ្ញាធរខណ្ឌបានកោះហៅតំណាងពាក់ព័ន្ធចូលខ្លួនមកដោះស្រាយ និងពិនិត្យលើឯកសារពាក់ព័ន្ធនានា ខណៈការតវ៉ារបស់កម្មករ មិនទាន់មានភាពច្បាស់លាស់ ព្រោះតែកម្មករមានអ្នកម៉ៅការច្រើនផ្សេងៗគ្នា។
លោកបានបញ្ជាក់ទៀតថា៖ «យើងកំពុងតែអញ្ជើញតំណាង ដើម្បីយកឯកសារមកពិនិត្យនៅខណ្ឌ ហើយយើងនឹងបន្តសម្របសម្រួលឱ្យពួកគាត់។ យើងមិនទាន់ដឹងពីរឿងរ៉ាវច្បាស់ទេ ចាំមើលតំណាងកម្មករ យកឯកសារមកឱ្យអស់សិន តែគ្រាន់តែដឹងថា ដោយសារតែអ្នកសាងសង់ និងអ្នកបន្តការសាងសង់ អត់បានបើកលុយឱ្យកម្មករ អ៊ីចឹងយើងមើលឯកសារឱ្យច្បាស់សិន»។
លោក មូល វិរៈ ចៅសង្កាត់ឫស្សីកែវបានប្រាប់ភ្នំពេញប៉ុស្តិ៍ដែរថា អគារការដ្ឋាននេះ គឺបានដំណើរការសងសង់រយៈពេល ២ ឆ្នាំមកហើយ ដោយមានការជួលបន្តពីជនជាតិចិន៕
