.jpg)
សកម្មភាពពលរដ្ឋស្វែងរកអន្តរាគមន៍ទប់ស្កាត់ការទន្ទ្រានដីសហគមន៍។ រូបថត FB
កំពង់ធំៈ សហគមន៍ច្រាំងក្រហម នៅឃុំតាំងក្រសៅ ស្រុកប្រាសាទសំបូរ ស្នើសុំអាជ្ញាធរខេត្តកំពង់ធំជួយអន្តរាគមន៍ទប់ស្កាត់ជាបន្ទាន់ចំពោះការទន្ទ្រានយកដីសហគមន៍ ព្រោះមានអ្នកលួចសង់រោង សង់ផ្ទះ និងដាំដើមចន្ទីលើដីសហគមន៍ជាបន្តបន្ទាប់ ហាមឃាត់មិនឈ្នះ។ យ៉ាងណាជុំវិញរឿងនេះអាជ្ញាធរ និងមន្ត្រីជំនាញ អះអាងថា កំពុងស្ថិតនៅក្នុងការស្រាវជ្រាវ។
លោក ស៊ន ស៊ុម ប្រធានសហគមន៍ច្រាំងក្រហម ថ្លែងនៅថ្ងៃទី ១៣ ខែធ្នូថា មានប្រជាពលរដ្ឋមកពីកន្លែងផ្សេងចូលទន្ទ្រានលើដីសហគមន៍ច្រាំងក្រហមនៅភូមិជាំ ឃុំតាំងក្រសៅ ស្រុកប្រាសាទសំបូរ ដោយប្រើរូបភាពសាងសង់រោង សង់ផ្ទះ ហើយពួកគេធ្វើជាចុះទៅរុះរើចេញវិញ និងចោទថា សហគមន៍បានរួមគំនិតគ្នាជាប្រព័ន្ធជាមួយអាជ្ញាធរក្នុងការសម្រួលឱ្យមានការទន្ទ្រានយកដីទៅវិញ។
លោកថា មានពលរដ្ឋមួយចំនួនទៀតកំពុងចូលទៅចាប់ដីនៅទីនោះធ្វើជាកម្មសិទ្ធិរបស់ខ្លួន ខ្លះទៀតព័ទ្ធរបងយក និងកន្លែងខ្លះបានដាក់ស្លាកលក់ទៀតផង ទោះបីជាទៅប្រាប់ ពន្យល់ណែនាំយ៉ាងណា ក៏អ្នកទាំងនោះមិនព្រមរុះរើចេញឡើយ។ លោកបញ្ជាក់ថា សហគមន៍នេះ លោកគ្រប់គ្រងតាំងពីឆ្នាំ ២០០៨ រហូតមកទល់បច្ចុប្បន្ន ដើមឡើយមិនមានការចូលទន្ទ្រានកាន់កាប់អនាធិបតេយ្យបែបនេះទេ ទើបតែក្នុងឆ្នាំ ២០២០ និង ២០២១ នេះមានសកម្មភាពខ្លាំង។ អ្នកចូលមកទន្ទ្រានទាំងនោះ អាចមានខ្នងជាអ្នកមានលុយ មានអំណាច ព្រោះមិនខ្លាចរអាសហគមន៍ឡើយ។
លោកថ្លែងថា៖ «ដីហ្នឹងពួកខ្ញុំការពារណាស់ ប្រជាជនខ្ញុំស្វិតស្វាញណាស់ ប៉ុន្តែការពារវាអត់ឈ្នះដោយសារអ្នកមានអំណាច និងអ្នកមានលុយលូកលាន់ចូលមក។ នៅឆ្នាំ ២០២០ និង ២០២១ នេះគេចូលដាំចន្ទីពេញក្នុងដីទាំងអស់ឱ្យខាងខ្ញុំធ្វើម៉េចឥឡូវ បើឧទាហរណ៍ថា យើងរាយការណ៍ទៅ រដ្ឋបាលព្រៃឈើ ដាក់ទៅថារវល់ ខាងនេះរវល់ ខាងនោះរវល់ ហើយចេះតែថា ពួកខ្ញុំរាយការណ៍»។
លោក ស៊ុម ថ្លែងថា កន្លងមកនៅពេលលោកទៅជួបជាមួយអភិបាលរងខេត្ត ដែលបានចុះមកពិនិត្យបញ្ហាដីនៅទីនេះ លោកបានសំណូមពរឱ្យអាជ្ញាធរខេត្តដោះស្រាយដីនោះមកឱ្យសហគមន៍វិញគ្រប់ចំនួន ៨៩៨ ហិកតា និងសុំឱ្យបញ្ឈប់រាល់សកម្មភាពដែលទន្ទ្រានទាំងអស់ ប៉ុន្តែមិនបានផលអ្វីឡើយ។ ការគ្រប់គ្រងដីនេះ បើអាជ្ញាធរជួយដោះស្រាយមិនបានមានតែប្រគល់ជូនរដ្ឋាភិបាលវិញ។
លោកបានថ្លែងថា៖ «រាល់ថ្ងៃពួកខ្ញុំពិភាក្សាគ្នា ប្រសិនបើរដ្ឋត្រូវការពួកខ្ញុំសុខចិត្តជូនរដ្ឋវិញហ្មង ឱ្យតែរដ្ឋយកទៅធ្វើជាលក្ខណៈរដ្ឋាភិបាល កុំលក់ទៅឱ្យពួកឯកជន គឺពួកខ្ញុំអត់ព្រមទេ»។
លោក ប៊ុន រ៉ា មេឃុំតាំងក្រសៅ ថ្លែងនៅថ្ងៃទី ១៣ ខែធ្នូថា ប្រជាពលរដ្ឋក្នុងសហគមន៍ច្រាំងក្រហមពិតជាមិនបានទៅលក់ដីសហគមន៍នោះទេ គឺមានតែចូលរួមថែរក្សាការពារឱ្យនៅគង់វង្ស ប៉ុន្តែមានប្រជាពលរដ្ឋមកពីកន្លែងផ្សេងទៀតបានចូលទៅទន្ទ្រានដីសហគមន៍នេះ ហើយអះអាងខ្លួនថា ជាពលរដ្ឋក្នុងសហគមន៍ច្រាំងក្រហម។
លោកមេឃុំបញ្ជាក់ថា ប្រជាជនក្នុងសហគមន៍ច្រាំងក្រហមបានអាស្រ័យផលនៅទីនោះតាំងពីឆ្នាំ ២០០៥ និងក្លាយជាសហគមន៍តាមច្បាប់តាំងពីឆ្នាំ ២០០៨ ដែលដើមឡើយ សហគមន៍នេះមានប្រមាណ ១៥០ គ្រួសារ។
មន្ត្រីសម្របសម្រួលសមាគមអាដហុកប្រចាំខេត្តកំពង់ធំ លោក សុក រដ្ឋា ប្រាប់ភ្នំពេញប៉ុស្តិ៍នៅថ្ងៃទី ១៣ ខែធ្នូថា លោក មិនបានដឹងពីបញ្ហាដីធ្លីក្នុងសហគមន៍ច្រាំងក្រហមទេ។
ចំណែកលោក សុខ ហៃ អភិបាលរង និងជាអ្នកនាំពាក្យរដ្ឋបាលខេត្តកំពង់ធំអះអាង នៅថ្ងៃទី ១៣ ខែធ្នូថា ជុំវិញរឿងនេះលោកក៏មិនទាន់ទទួលបានព័ត៌មានច្បាស់លាស់នៅឡើយដែរ ប៉ុន្តែយ៉ាងណា លោកនឹងប្រាប់ឱ្យមន្ត្រីចុះទៅពិនិត្យមើល។
លោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំថ្លែងនៅថ្ងៃទី ១៣ ខែធ្នូថា បញ្ហាដីធ្លីនៅទីនោះ មន្ត្រីជំនាញបានចុះទៅធ្វើការសិក្សាស្រាវជ្រាវនៅទីនោះមួយរយៈពេលមកហើយ ដោយឡែកបច្ចុប្បន្នកំពុងបន្តការងារបន្ថែមទៀត ដោយសារតែដីនៅទីនោះមានច្រើនហិកតា។ ជានីតិវិធីមន្ត្រីជំនាញត្រូវតែសិក្សាឱ្យបានច្បាស់លាស់ និងពិនិត្យមើលទិដ្ឋភាពច្បាប់គតិយុត្តទាំងអស់។ យ៉ាងណា លោកបញ្ជាក់ថា តាមព័ត៌មានដែលទទួលបានពីមន្ត្រីជំនាញចុះទៅផ្ទាល់ គឺមិនមានសំណង់រឹងនៅទីនោះទេ។
លោកថ្លែងថា៖ «តាមព័ត៌មានដែលខ្ញុំបានទទួលគឺដូចជារើអស់ហើយ វាមិនមែនជាសំណង់អីទេ គ្រាន់តែថារបៀបយកបង្គោល ២-៣ ទៅធ្វើអ៊ីចឹងទៅ ហើយមិនមានជាសំណង់អីរឹងមាំទេតាមខ្ញុំដឹង ព្រោះអីទីតាំងហ្នឹងយើងបានចុះធ្វើមួយសាហើយ ប៉ុន្តែវាមានការលួចដាំអី ចន្ទីអ៊ីចឹងមែន នៅក្នុងតំបន់ហ្នឹង យ៉ាងណា នីតិវិធីយើងកំពុងបន្ត»៕
