ភ្នំពេញៈ អង្គការ UNDP និងស្ថាប័នពាក់ព័ន្ធសម្ពោធជាផ្លូវការនូវរបាយការណ៍ស្តីអំពី «តម្រូវការ និងការផ្គត់ផ្គង់ជំនាញឌីជីថលនៅកម្ពុជា» ដែលបង្ហាញពីការសិក្សា និងការព្យាករពីតម្រូវការ និងការផ្គត់ផ្គង់ជំនាញឌីជីថលនៅក្នុងប្រទេសកម្ពុជា ខណៈអ្នកជំនាញ លើកឡើងថា ជំនាញជីឌីថល និងការអប់រំនៅកម្ពុជានៅមានកម្រិត ដែលទាមទារឱ្យមានការចូលរួមបន្ថែម។
កាលពីថ្ងៃទី ១៤ ខែធ្នូ ស្ថាប័នពាក់ព័ន្ធ អ្នកជំនាញមកពីស្ថាប័ននានាប្រមាណជាង ២០០ នាក់បានចូលរួមក្នុងពិធីសម្ពោធជាផ្លូវការនូវរបាយការណ៍ស្តីអំពី «តម្រូវការ និងការផ្គត់ផ្គង់ជំនាញឌីជីថលនៅកម្ពុជា» តាមរយៈវីដេអូអនឡាញ ដែលរៀបចំឡើងដោយអង្គការ UNDP។
ក្នុងឱកាសនោះ លោកស្រី Alissar Chaker អ្នកតំណាងអង្គការ UNDP បានថ្លែងថា ការចុះឈ្មោះចូលរៀនជំនាញឌីជីថលនៅកម្ពុជា គឺមានកម្រិតនៅឡើយ ខណៈភាគច្រើននៃអ្នកសិក្សាជំនាញទាំងនេះ គឺជាក្មេងប្រុស។ ជាមួយនឹងចំនួនសិក្សានៅមានកម្រិតនេះ លោកស្រីបន្តថា សូម្បីតែទីផ្សារការងារក៏នៅមានការខ្វះខាតនូវធនធានមនុស្ស ដែលទាមទារឱ្យមានការចូលរួម និងបង្កើននូវធនធានមនុស្សក្នុងវិស័យនេះឱ្យបានទូលំទូលាយ។
ទន្ទឹមនឹងនេះ លោកស្រីបានចាត់ទុកថា កំណើនសេដ្ឋកិច្ច និងការអភិវឌ្ឍដ៏រឹងមាំ និងដ៏យូរអង្វែងរបស់កម្ពុជា នៅក្នុងបរិបទនៃបដិវត្តន៍ឧស្សាហកម្មទី ៤ ពឹងផ្អែកលើសមត្ថភាពរបស់ប្រទេសនេះក្នុងការបង្កើនការប្រកួតប្រជែងសេដ្ឋកិច្ច និងផលិតភាពរបស់ខ្លួន។
ដូច្នេះ លោកស្រីយល់ថា ការវាយតម្លៃស្តីពីតម្រូវការ និងការផ្គត់ផ្គង់ជំនាញឌីជីថល និងព័ត៌មានវិទ្យាសម្រាប់ពេលបច្ចុប្បន្ន និងអនាគត ក៏ដូចជាការដោះស្រាយបញ្ហាប្រឈមចំពោះការទទួលយកបច្ចេកវិទ្យាឌីជីថលពេញលេញ និងការត្រៀមលក្ខណៈនៃកម្លាំងពលកម្មជំនាញដោយភាគីពាក់ព័ន្ធនានា គឺជាជំហានដ៏សំខាន់ឆ្ពោះទៅមុខរបស់កម្ពុជា។
លោកស្រីបញ្ជាក់ថា៖ «ជំនាញឌីជីថលនេះ នៅមានតិចតួចនៅឡើយ ដែលអ្នកសិក្សាភាគច្រើន គឺជាក្មេងប្រុស ដែលការបណ្តុះបណ្តាលជំនាញទន់ ដំណើរការគ្រឿងម៉ាស៊ីន និងជំនាញ AI (បញ្ញានិមិ្មត) និងការសិក្សាពីវិទ្យាសាស្ត្រផ្សេងៗទៀត នៅមានកម្រិតនៅឡើយ។ យ៉ាងណាយើងឃើញថា មានកំណើនជាសកលសម្រាប់ជំនាញនេះ ដែលមានសារៈសំខាន់សម្រាប់កម្ពុជា ក្នុងការបង្កើនជំនាញនេះ។ កម្ពុជាអាចនឹងជម្នះបញ្ហាប្រឈមទាំងអស់នេះ សម្រាប់ឆ្នាំ ២០២៥ ខាងមុខនេះ»។
លោកស្រី Alissar Chaker បង្ហាញក្តីសង្ឃឹមថា របាយការណ៍ស្រាវជ្រាវនេះនឹងផ្តល់ជាធាតុចូលមួយ ដល់ភាគីពាក់ព័ន្ធ និងដើម្បីជំរុញឱ្យយុវជនខ្មែរ ចាប់យកជំនាញឌីជីថលជាគ្រឹះឱ្យស្របទៅនឹងតម្រូវការ និងដើម្បីឈានទៅសម្រេចបាននូវគោលដៅរបស់រដ្ឋាភិបាលដែលឱ្យឈ្មោះថា រដ្ឋាភិបាលឌីជីថល។
លោក ហ៊ាន សំបឿន អនុប្រធានវិទ្យាស្ថានជាតិនៃបណ្ឌិត្យសភាបច្ចេកវិទ្យាឌីជីថលកម្ពុជាដែលជាស្ថាប័នមួយចូលរួមធ្វើការស្រាវជ្រាវលើរបាយការណ៍នេះ បាននិយាយថា របាយការណ៍ស្រាវជ្រាវនេះ គឺបានធ្វើការស្ទង់មតិពីបណ្តាក្រុមហ៊ុនជាង ២០០ និងបានចាប់ផ្តើមតាំងពីដើមឆ្នាំ ២០២០ ដើម្បីធ្វើយ៉ាងណារកឱ្យឃើញពីតម្រូវការ បញ្ហាប្រឈម និងដំណោះស្រាយសម្រាប់ឆ្លើយតបនឹងការដាក់ចេញនូវគោលនយោបាយរបស់រដ្ឋាភិបាល ដែលកំពុងផ្តោតលើសេដ្ឋកិច្ច និងសង្គមឌីជីថល ឆ្នាំ ២០២១ ដល់ឆ្នាំ ២០៣៥។
លោកអះអាងថា៖ «ដើម្បីរុញច្រានសេដ្ឋកិច្ចឌីជីថលប្រទេសកម្ពុជាឱ្យមានដំណើរការទៅមុខ នោះឃើញថាជំនាញឌីជីថលនៅកម្ពុជា ជំនាញឌីជីថល និងការអប់រំ នៅមានបញ្ហាប្រឈមផងដែរ ដូចជា ភាពមិនស៊ីគ្នា រវាងជំនាញ និងកង្វះខាតនូវជំនាញ ដែលភាគច្រើនតែងតែកើតមាននៅក្នុងប្រទេសកំពុងអភិវឌ្ឍន៍»។
លោក ហ៊ាន សំបឿន បានអះអាងបន្តថា កម្រិតនៃជំនាញ ដែលមិនស៊ីគ្នា និងការខ្វះខាតនេះហើយ ដែលធ្វើឱ្យមានការយឺតយ៉ាវនវានុវត្តន៍ និងការចាប់យកបច្ចេកវិទ្យាថ្មី ដែលគោលនយោបាយរបស់កម្ពុជាបានដាក់នេះ ដោយទាមទារតម្រូវឱ្យមានព័ត៌មានច្បាស់លាស់ បញ្ហាពីតម្រូវការនាពេលបច្ចុប្បន្ន និងអនាគត សម្រាប់ជាទុនក្នុងការបង្កើតធនធានមនុស្សនៅក្នុងវិស័យទាំងនេះ។
បើតាមរបាយការណ៍ដែលបានបង្ហាញនេះ បានអះអាងថា ក្នុងរយៈពេល ២ ឆ្នាំយ៉ាងតិច តម្រូវការជំនាញឌីជីថលនេះ នឹងនៅតែបន្តមានទីផ្សារការងារតាមរយៈក្រុមហ៊ុនដែលផ្តល់សេវាពាក់ព័ន្ធនឹងប្រព័ន្ធឌីជីថល ខណៈជំនាញធំៗចំនួន ៤ ដែលត្រូវការចាំបាច់ និងកើនឡើង មានដូចជា អ្នកបង្កើតកម្មវិធី អ្នកជំនាញផ្នែកបណ្តាញកុំព្យូទ័រ អ្នកជំនាញផ្នែករចនាក្រាហ្វិក និងអ្នកជំនាញចម្រុះផ្នែកផ្សព្វផ្សាយ៕