The Phnom Penh Post Search

Search form




Logo of Phnom Penh Post newspaper Phnom Penh Post - CPU ​និង​មន្ត្រី​នគរបាល​កម្ពុជាចុះ​ស៊ើប​អង្កេត​បន្ត ​ករណី​ស្លាប់​ក្មេងស្រី​ខ្មែរ​អ៊ិស្លាមនៅ​ខេត្ត​កំពង់​ចាម

CPU ​និង​មន្ត្រី​នគរបាល​កម្ពុជាចុះ​ស៊ើប​អង្កេត​បន្ត ​ករណី​ស្លាប់​ក្មេងស្រី​ខ្មែរ​អ៊ិស្លាមនៅ​ខេត្ត​កំពង់​ចាម

Content image - Phnom Penh Post
មន្ត្រី CPU របស់អូស្រ្តាលី និងមន្ត្រីនគរបាលកម្ពុជា នាថ្ងៃទី ១៥ ធ្នូ បន្តចុះស៊ើបអង្កេតករណីក្មេងស្រីជនជាតិអ៊ិស្លាមស្លាប់ នៅខេត្តកំពង់ចាម។ រូបថត CPU Cambodia

CPU ​និង​មន្ត្រី​នគរបាល​កម្ពុជាចុះ​ស៊ើប​អង្កេត​បន្ត ​ករណី​ស្លាប់​ក្មេងស្រី​ខ្មែរ​អ៊ិស្លាមនៅ​ខេត្ត​កំពង់​ចាម

កំពង់ចាមៈ អង្គភាព​ការពារ​កុមារ​របស់​ប្រទេស​អូ​ស្តា​លី​ប្រចាំ​នៅ​កម្ពុជា (CPU) សហការ​ជាមួយ​មន្ត្រី​ជំនាញ​ក្រសួង​មហាផ្ទៃ ​និង​នគរ​បាល​ជំនាញ​ខេត្ត​កំពង់ចាម​ នៅ​ថ្ងៃ​ទី ១៤​ ធ្នូ បាន​ចុះ​ស៊ើបអង្កេត​បន្តទៀត ​ករណី​ស្លាប់​ក្មេងស្រី​ខ្មែរ​អ៊ិស្លាម​ម្នាក់​នៅ​ភូមិ​ទី១៣​ ឃុំ-​ស្រុក​ កោះ​សូទិន ​ខេត្ត​កំពង់ចាម ​ដែល​សង្ស័យថា​ ជា​អំពើ​ឃាតកម្ម ​កាលពី​ថ្ងៃ​ទី ២៨​ កញ្ញា ​ឆ្នាំ ២០២១។ នេះ​បើតាម​មន្ត្រី​នគរបាល​ខេត្ត​កំពង់​ចាម។

លោក​ ហេង វុទ្ធី ​ស្នងការរង​ទទួល​ផែន​ ការងារ​នគរបាល​ព្រហ្មទណ្ឌ ​ខេត្ត​កំពង់ចាម ​ឱ្យដឹង​នៅ​ថ្ងៃ​ទី ១៥ ​ធ្នូ​ថា ​ការិយាល័យ​ព្រហ្មទណ្ឌ​ខេត្ត​កំពង់ចាម ​សហការ​ជាមួយ​នគរបាល​ជំនាញ​របស់​ក្រសួង​មហាផ្ទៃ ​និង​អង្គភាព​ការពារ​កុមារ​ របស់​ប្រទេស​អូស្ត្រាលី​បាន​ចុះ​ធ្វើការ​ស៊ើបអង្កេត ​និង​ស្រាវជ្រាវ​បន្តទៀត​ពាក់ព័ន្ធ​ការស្លាប់​របស់​ក្មេងស្រី​ខ្មែរ​អ៊ិស្លាម ​ឈ្មោះ​ ឧស្មាន ហ្វា​អី​យ៉េស ​អាយុ​ ១៤ ឆ្នាំ។ ករណី​នេះ​សមត្ថកិច្ច​កំពុង​ស្វែងរក​ជនល្មើស។

លោក​បន្តថា ​ការបើក​ការស៊ើបអង្កេត​បន្ត​នេះ​ កម្លាំង​ជំនាញ​របស់​លោក​ទទួល​បាន​គោលការណ៍​ពី​លោក​ឧត្តមសេនីយ៍​ទោ​ ឯម កុសល ​ស្នងការ​នគរបាល​ខេត្ត​កំពង់ចាម ​និង​មាន​ការសម្រប​សម្រួល​ផ្លូវច្បាប់​ពី​អយ្យការ​អម​សាលា​ដំបូង​ខេត្ត​កំពង់ចាម​ផងដែរ។​ ចាប់តាំង​ពី​ថ្ងៃ​ទី ២៩ ​កញ្ញា ​ឆ្នាំ ២០២១ មក ​បន្ទាប់ពី​បាន​រកឃើញ​សព​ក្មេងស្រី​រងគ្រោះ​ រហូត​ដល់​ខែធ្នូ​ ឆ្នាំ​ ២០២១ ​នេះ ​សមត្ថកិច្ច​បានធ្វើ​ការងារ​ជាប់​រហូត​មិនបាន​បង្អង់​ដៃ​ទេ។

លោក​ថ្លែងថា​៖ «រឿងនេះ​កម្លាំង​សមត្ថកិច្ច​របស់​យើង​ខិតខំ​ណាស់។ កម្លាំង​ជំនាញ​របស់ខ្ញុំ​នៅតែ​រំកិល​ធ្វើការ​ងារ​នេះ​ផ្ទាល់​នៅ​កន្លែង​កើត​ហេតុ។ ពី​ម្សិលមិញ ​(ថ្ងៃទី ១៤ ​ធ្នូ)​ យើង​ក៏បាន​ធ្វើការងារ​នេះ​មួយ​ជំហាន​ទៀត​ដែរ​ ដែល​បាន​ចុះ​ស្រាវជ្រាវ​ជាមួយ​អង្គភាព​ការពារ​កុមារ ​(CPU)​ របស់​ប្រទេស​អូស្ត្រាលី​ តែ​លទ្ធផល​យ៉ាងណា​នោះ​វា​ជា​វិជ្ជាជីវៈ​របស់​យើង»។

លោក​សន សា​គុណ ​នាយ​ប៉ុស្តិ៍​នគរបាល​ឃុំ​កោះសូទិន ​ប្រាប់​នៅ​ថ្ងៃទី ១៥​ ធ្នូ​ថា ​កាលពី​ថ្ងៃទី ១៤ ​ធ្នូ ​ឆ្នាំ ២០២១​ មាន​ក្រុម​ការងារ​នៃ​អង្គភាព​ការពារ​កុមារ ​របស់​ប្រទេស​អូស្ត្រាលី ​និង​នគរបាល​ជំនាញ​ខេត្ត​កំពង់ចាម​ បាន​ចុះ​ធ្វើការ​ស្រាវជ្រាវ​ករណី​សំណុំ​រឿង​ក្មេងស្រី​រងគ្រោះ​ឈ្មោះ​ឧស្មាន ហ្វា​អី​យ៉េស។ ប៉ុន្តែ​លោក​មិនបាន​ចូលរួម​ទេ ​ដោយសារ​មិនមែន​ជា​ជំនាញ​របស់​លោក។

លោក​បញ្ជាក់ថា​៖ «ខ្ញុំ​គ្រាន់តែ​ដឹងថា​ ក្រុមការងារ​បាន​ចុះ​ស្រាវជ្រាវ​ម្តងទៀត​ជុំវិញ​ការស្លាប់​របស់​ក្មេង ​ហើយ​រហូតមក​ដល់​ពេល​នេះ​ក៏​យើង​នៅតែ​កំពុង​បន្ត​ស្វែង​រង​ជន​ដៃដល់​ដែរ»។

បើ​តាម​លោក​សា​គុណ ​ក្មេង​រងគ្រោះ​ឈ្មោះ ​ឧស្មាន ហ្វា​អី​យ៉េស ​រស់នៅ​ក្នុង​ភូមិ​ទី១៣​ ឃុំ​-ស្រុក​កោះសូទិន​ ខេត្ត​កំពង់​ចាម​ ហើយ​ត្រូវបាន​គេ​សម្លាប់​នៅ​ល្ងាច​ថ្ងៃទី២៨ ​កញ្ញា ​ឆ្នាំ២០២១ ​ខណៈ​ក្មេង​រងគ្រោះ​ទៅ​ដឹកគោ​ពី​វាលស្រែ​មក​ផ្ទះ ​កាលពី​វេលា​ម៉ោង​ប្រហែល ​៥ ល្ងាច ​ថ្ងៃ​ទី ២៨ ​កញ្ញា​ តែ​បាត់​ខ្លួន​រហូត។ លុះ​នៅវេលា​ម៉ោង​ជាង​ ១០ ព្រឹក​ថ្ងៃ​ទី ២៩ ​កញ្ញា ​ឆ្នាំ២០២១ ​ទើប​ក្រុម​គ្រួសារ​និង​អ្នកភូមិ​រកឃើញ​សាកសព​ក្នុង​ចម្ការពោត​នៅ​ម្តុំ​ទីតាំង​ឃ្វាលគោ​ មាន​ចម្ងាយ​ពី​ភូមិ​ប្រហែល​២០០​ម៉ែត្រ​។

លោក​បន្តថា ​បើតាម​មន្ត្រី​ជំនាញ​កោសល្យវិច័យ ​និង​គ្រូពេទ្យ​ខេត្ត​កំពង់ចាម​ ប្រាប់​កាលពី​ថ្ងៃទី២៩ ​កញ្ញា ​ថា ​សព​ក្មេង​រង​គ្រោះ​មាន​ស្នាម​ជាំ​ត្រង់​ក ​និង​ស្នាម​ជាំ​នៅ​ចង្កា។ រីឯ​ប្រដាប់ភេទ​ ក៏​គ្មាន​ស្លាកស្នាម ​មិនមាន​ការរំលោភ​សេពសន្ថវៈ​ឡើយ។

លោក​នូ លីម ​ជា​មេភូមិ​ទី១៣ ​ឃុំ​កោះសូទិន​ ប្រាប់​នៅ​ថ្ងៃទី១៥​ ធ្នូ ថា​ ក្មេង​រងគ្រោះ​មាន​បងប្អូន​៣នាក់​ ស្រី២ ​ប្រុស​១ ​នាង​ជា​កូនពៅ។ សមត្ថកិច្ច​ជំនាញ​ខេត្ត​កំពង់ចាម ​និង​ខាង​អង្គភាព​ការពារ​កុមារ(CPU)​របស់​ប្រទេស​អូស្ត្រាលី​បាន​ចុះ​ដល់​ភូមិ​របស់​លោក​កាលពី​ថ្ងៃ​ទី១៤ ​ធ្នូ​ ដើម្បី​ប្រមូល​វត្ថុតាង​ ដូចជា ​រូបថត ​និង​សម្ភារ​ប្រើប្រាស់​របស់​ក្មេងរងគ្រោះ​យកទៅ​ធ្វើ​កោ​សល្យវិច័យ​បន្ថែម​ទៀត។

លោក​បញ្ជាក់ថា​៖«សព​ក្មេងស្រី​ ប្រហែលជា​បាក់​ឆ្អឹងក ​ព្រោះ​ពី ក​ ទៅ​ក្បាល​ទន់។​ បើ​មិន​យកដៃ​ទប់​ គឺ​ក្បាល​ធ្លាក់​ដល់​ស្មា​តែ​ម្តង។​ ប្រហែល​ជា​ជន​ដៃដល់​ប៉ង​រំលោភ​តែ​មិនបាន​សម្រេច​ក៏​សម្លាប់​ចោល​ទៅ»៕

អត្ថបទគួរចាប់អារម្មណ៍