.jpg)
សមត្ថកិច្ចកំពុងត្រួតពិនិត្យសត្វក្រួចបង្កកដែលនាំចូលដោយខុសច្បាប់ពីប្រទេសវៀតណាម។ រូបថត ហ្វេសប៊ុក
កំពតៈ កម្លាំងអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានបង្ក្រាបចាប់សត្វក្រួចបង្កកចំនួន`៣,២តោន ដែលត្រូវបានគេលួចដឹក នាំចូលពីប្រទេសវៀតណាម តាមច្រករបៀងមួយ ក្បែរច្រកព្រែកចាក ក្នុងស្រុកកំពង់ត្រាច ខេត្តកំពត ដោយខុសច្បាប់។
លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និង ផលិតកម្មសត្វ នៃក្រសួងកសិកម្ម រុក្ខាប្រមាញ់ និង នេសាទបានប្រាប់ភ្នំពេញប៉ុស្តិ៍ថា ប្រតិបត្តិការបង្ក្រាប ករណីដឹកជញ្ជូនសត្វក្រួចបង្កក ៣,២តោន នាំចូលខុសច្បាប់ពីប្រទេសវៀតណាមនេះ បានធ្វើឡើង កាលពីរសៀលថ្ងៃទី១៣ធ្នូ នៅចំណុចភូមិក្រាំងគាំ ឃុំត្បែង ស្រុកកណ្ដាលស្ទឹង ខេត្តកណ្ដាល បន្ទាប់ពីក្រុមការងាររបស់លោក បានចុះស្រាវជ្រាវនៅក្នុងភូមិសាស្ត្រខេត្តកំពត ហើយបានប្រទះឃើញរថយន្តមួយគ្រឿង សង្ស័យមានផ្ទុកផលិតផលសត្វពីប្រទេសវៀតណាម បានបើកឆ្លងចូលមកក្នុងប្រទេសកម្ពុជា តាមច្រករបៀងមួយ ស្ថិតក្នុងភូមិសាស្ត្រស្រុកកំពង់ត្រាច ខេត្តកំពត សំដៅឆ្ពោះទៅកាន់ ខេត្តកណ្ដាល។
លោកថ្លែងថា៖«ក្រោយពីមានការសង្ស័យ ក្រុមការងាររបស់យើង ក៏បានស្នើសុំកិច្ចអន្តរាគមន៍ពីកម្លាំងនគរបាលនៃស្នងការដ្ឋាននគរបាលខេត្តកណ្ដាល និងពីអយ្យការអមសាលាដំបូងខេត្តកណ្តាល ដើម្បីជួយស្ទាក់ចាប់ត្រួតពិនិត្យរថយន្តដឹកទំនិញដែលគួរឱ្យសង្ស័យនោះ»។
បើតាមលោកសារ៉ាត់ បន្ទាប់ពីឃាត់រថយន្តសង្ស័យបានហើយនោះ ក្រុមកម្លាំងសមត្ថកិច្ច ក៏បានឆែកឆេររកឃើញសាច់សត្វក្រួចបង្កកចំនួន៦៤ការ៉ុង ដែលមានទម្ងន់សរុប ៣ ២០០គីឡូក្រាម។
ដោយសារអ្នកបើកបរ ឬ ម្ចាស់ទំនិញនោះ មិនមានលិខិតអនុញ្ញាតឱ្យនាំចូលឬចរាចរណ៍ផលិតផលសត្វ ក្រុម មន្ត្រី ជំនាញក៏បានបញ្ជូនទំនិញសាច់សត្វក្រួចបង្កកទាំងនោះ មកកាន់មណ្ឌលចត្តាឡីស័ក នៃអគ្គនាយកដ្ឋានសុខភាពសត្វ និង ផលិតកម្មសត្វ ដើម្បីពិសោធន៍រកមេរោគនៃជំងឺឆ្លង។
លោកសារ៉ាត់បញ្ជាក់ថា៖«យោងតាមលទ្ធផលតេស្តនៃមន្ទីរពិសោធន៍របស់យើង ទំនិញសាច់សត្វក្រួចបង្កកទាំងនោះមានគុណភាពល្អ គ្មានមេរោគនៃជំងឺឆ្លង និង គ្មានសារធាតុគីមីដែលបង្កផលប៉ះពាល់ដល់សុខភាពនោះទេ។ ប៉ុន្តែដោយអ្នកបើកបរ ឬ ម្ចាស់ទំនិញនោះ ពុំមានឯកសារច្បាប់អនុញ្ញាតឱ្យនាំចូលផលិតផលសត្វពីក្រៅប្រទេស ដូច្នេះយើងបានធ្វើការផាកពិន័យអន្តរកាល តាមបញ្ញតិមាត្រា១១៣ នៃច្បាប់ស្ដីពីសុខភាពសត្វ»។
បើតាមមាត្រា១១៣ នៃច្បាប់ស្ដីពីសុខភាពសត្វ អ្នកនាំចូលផលិតផលសត្វ ពីក្រៅប្រទេសដែលគ្មានលិខិតអនុញ្ញាត នឹងត្រូវផ្តន្ទាទោសដោយផាកពីន័យអន្តរកាល ពី១០លានរៀល ទៅ ១៥លានរៀល។
ជុំវិញករណីនេះ លោក សុខ ប៉េង ដែលជាតំណាងម្ចាស់ទំនិញ បានប្រាប់ភ្នំពេញប៉ុស្តិ៍ថា លោកបានបង់ប្រាក់ផាកពិន័យនោះចូលរដ្ឋ តាមការកំណត់របស់សមត្ថកិច្ចជំនាញរួចរាល់ហើយ។
សមត្ថកិច្ចក៏បានប្រគល់ទំនិញទាំងអស់មកលោកវិញផងដែរ បន្ទាប់ពីលទ្ធផលតេស្តបានបង្ហាញថា ទំនិញដែលលោកបាននាំចូលនោះ គឺជាទំនិញដែលមានគុណភាពល្អ និង មានការវិចខ្ចប់បានត្រឹមត្រូវតាមបទដ្ឋានបច្ចេកទេស៕
វីដេអូ៖
