.jpg)
គ្រឿងញៀនដែលកម្លាំងសមត្ថកិច្ចបង្ក្រាបបាន ហើយនាំយកមកធ្វើសន្និសីទកាសែត នៅនាយកដ្ឋានប្រឆាំងគ្រឿងញៀន កាលពីថ្ងៃទី១៤ ធ្នូ ឆ្នាំ២០២១។ រូបថត ហេង ជីវ័ន
មន្ទីរប្រឆាំងគ្រឿងញៀននៃក្រសួងមហាផ្ទៃ ស្នើសុំអយ្យការអមសាលាដំបូងរាជធានីភ្នំពេញ ពន្យារពេល១ថ្ងៃបន្ថែមទៀត សម្រាប់ការបំពេញនីតិវិធីស៊ើបសួរទៅលើក្រុមជនសង្ស័យក្នុងបទល្មើសគ្រឿងញៀនជាង២តោន ដែលសមត្ថកិច្ចនគរបាលជំនាញ ទើបតែបង្ក្រាបបាននាពេលថ្មីៗនេះ។
លោកអ៊ិន សុង អ្នកនាំពាក្យមន្ទីរប្រឆាំងគ្រឿងញៀនក្រសួងមហាផ្ទៃ ប្រាប់ភ្នំពេញប៉ុស្តិ៍ថា ការសុំពន្យារនេះ ដោយសារសំណុំរឿងគ្រឿងញៀនដ៏ធំមួយនេះ មានជនសង្ស័យរហូតដល់១៣នាក់ ហើយការស៊ើបសួរត្រូវការភាពលម្អិត ដើម្បីប្រាកដថា ជនសង្ស័យទាំងនោះមានប៉ុន្មាននាក់ជាប់ពាក់ព័ន្ធផ្ទាល់ និងប៉ុន្មាននាក់ពាក់ព័ន្ធដោយប្រយោល ហើយប៉ុន្មាននាក់ទៀតមិនពាក់ព័ន្ធក្នុងសំណុំរឿងនេះ។
លោកថ្លែងថា៖«នៅថ្ងៃនេះ[១៥ ធ្នូ ២០២១] យើងនៅមិនទាន់ស៊ើបសួរលើក្រុមជនសង្ស័យទាំងស្រុងនោះអស់នៅឡើយទេ។ ដូច្នេះហើយទើបយើងស្នើសុំអយ្យការអមសាលាដំបូងរាជធានីភ្នំពេញ ពន្យារពេល១ថ្ងៃទៀតដើម្បីឱ្យក្រុមការងារយើង មានពេលគ្រប់គ្រាន់សម្រាប់ស៊ើបសួរពួកគេឱ្យបានលម្អិត»។
បើតាមលោកអ៊ិន សុង ជនពាក់ព័ន្ធធំក្នុងសំណុំរឿងនេះ មាន៤នាក់។ ក្នុងនោះឈ្មោះ Lee Tung Han អាយុ៣២ឆ្នាំ ជនជាតិចិនតៃវ៉ាន់ បានស្លាប់ក្នុងពេលប៉ះទង្គិចដោយអាវុធជាមួយសមត្ថកិច្ច លើកំណាត់ផ្លូវជាតិលេខ៤ ក្នុងចំណុចភូមិសាស្ត្រស្រុកកំពង់សិលា ខេត្តព្រះសីហនុ ខណៈគូកនរបស់គេម្នាក់ទៀតឈ្មោះ LY Po Han ជាអ្នកបើកបររថយន្ត ដឹកជញ្ជូនគ្រឿងញៀន១ ៤៨០គីឡូក្រាមត្រូវបានចាប់ខ្លួន។
ចំណែកឈ្មោះ YE YONG អាយុ៤៨ ជនជាតិចិនតៃវ៉ាន់ ជាមេការគ្រប់គ្រងទីតាំងកៃច្នៃគ្រឿងញៀន នៅក្នុងរោងចក្រផលិតអាល់កុលរបស់ក្រុមហ៊ុនស៊ីន យិន ហ្វេង ខេមបូឌា អ៊ីនដាស់ស្រ្ទី ខូអិលធីឌី ដែលមានទីតាំងស្ថិតក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងម្នាក់ទៀតជាមេខ្លោងធំ ឈ្មោះ Ye Yan Sow អាយុ ៥៨ឆ្នាំ ជនជាតិចិនមានសញ្ជាតិខ្មែរ។
លោកបន្ថែមថា ជនសង្ស័យ៩នាក់ផ្សេងទៀត គឺជាកម្មករ ជាសន្តិសុខ និងជាចុងភៅ។ ក្នុងចំណោមពួកគេទាំងនេះ មានអ្នកខ្លះអាចនឹងមិនដឹងរឿងរោងចក្រ ដែលពួកគេកំពុងបម្រើការងារឱ្យនេះមានលួចលាក់ផលិតគ្រឿងញៀននោះទេ។ រីឯមួយចំនួនទៀត អាចនឹងដឹងរឿងខ្លះពីការនិយាយខ្សិបខ្សៀវរបស់ជនសង្ស័យធំទាំង៤នាក់ខាងលើ។
លោកបញ្ជាក់ថា៖«យើងនឹងសុំគោលការណ៍ពីព្រះរាជអាជ្ញា ដើម្បីពិចារណាទៅលើភាពសង្ស័យរបស់ពួកគេ មុនពេលមានចំណាត់ការនីតិវិធីបញ្ជូនសំណុំរឿងទៅតុលាការនៅថ្ងៃព្រហស្បតិ៍នេះ»។
គួររំឭកថា កម្លាំងសមត្ថកិច្ចនៃមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ នៅថ្ងៃទី១២ ខែធ្នូ ឆ្នាំ២០២១បានសហការជាមួយកម្លាំងនគរបាលនៃស្នងការដ្ឋាននគរបាលរាជធានី-ខេត្តចំនួន៤ រួមមាន រាជធានីភ្នំពេញ ខេត្តកំពង់ស្ពឺ ខេត្តព្រះសីហនុ និងខេត្តកោះកុង បានបង្ក្រាបករណីគ្រឿងញៀនលក្ខណៈទ្រង់ទ្រាយធំ ដោយរឹបអូសវត្ថុតាង គ្រឿងញៀនប្រភេទ Ketamine បានចំនួនជាង២តោន និងសាធារតុគីមីផ្សំជាង៨៤តោន ព្រមទាំងអាវុធខ្លី K54 ១ដើម ម៉ាស៊ីនកែច្នៃផលិតគ្រឿងញៀន ខ្នាតធំចំនួន២០គ្រឿង និងមធ្យោបាយដឹកជញ្ជូនមួយចំនួនទៀត៕
