.jpg)
ពិធីចុះហត្ថលេខារវាងអាជ្ញាធរមីន និងវិស័យកាត់ដេរនៅកម្ពុជា។ រូបថត CMAA
ភ្នំពេញៈ អាជ្ញាធរមីន (CMAA) និងវិទ្យាស្ថានបណ្ដុះបណ្ដាលវិស័យកាត់ដេរនៅកម្ពុជានៃសមាគមរោងចក្រកាត់ដេរនៅកម្ពុជា (CGTI-GMAC) ចុះហត្ថលេខានៅថ្ងៃទី ១៥ ខែធ្នូ ឆ្នាំ ២០២១ លើភាពជាដៃគូរវាងរដ្ឋាភិបាលកម្ពុជា និងវិស័យឯកជនស្តីពីការបង្កើតកិច្ចសហប្រតិបត្តិការ និងការផ្លាស់ប្តូរនូវការអភិវឌ្ឍសមត្ថភាព ដើម្បីពង្រឹងសមត្ថភាពមន្ដ្រីលើការបំពេញការងារជូនដល់ប្រជាពលរដ្ឋពិសេសនៅតំបន់ដែលមានមីនឱ្យមានភាពរីកចម្រើនផ្នែកសេដ្ឋកិច្ច និងសង្គម។
លោកទេសរដ្ឋមន្ត្រី លី ធុជ អនុប្រធានទី ១ អាជ្ញាធរមីនថ្លែងប្រាប់អ្នកសារព័ត៌នៅក្នុងពិធីនេះថា កិច្ចសហប្រតិបត្ដិការនេះ គឺជាឱកាសមួយរបស់អាជ្ញាធរមីន ដែលបានចុះកិច្ចព្រមព្រៀងកសាងភាពជាដៃគូ ដើម្បីពង្រឹងនូវសមត្ថភាពមន្ដ្រីនៅអង្គភាពអាជ្ញាធរមីន ដើម្បីបំពេញការងារជូនដល់ប្រជាពលរដ្ឋឱ្យបានល្អប្រសើរនាពេលខាងមុខទៀត។
លោកថ្លែងថា៖ «ថ្ងៃនេះជាថ្ងៃសំខាន់ដែលយើងបើកមុខថ្មីមួយទៀតនៃការងារបោសសម្អាតមីន»។
លោកថ្លែងបន្តថា៖ «តាមរយៈកិច្ចសហប្រតិបត្ដិការនេះគឺផ្ដោតលើការបណ្ដុះបណ្ដាលធនធានមនុស្សដល់មន្ដ្រីនៃអាជ្ញាធរមីន។ CGTI-GMAC បានបណ្ដុះបណ្ដាលដល់មន្ដ្រីយើង ២ វគ្គរួចហើយយើងនឹងបន្តបណ្ដុះបណ្ដាលទៅមុខទៀត ដើម្បីពង្រឹងសមត្ថភាពមន្ដ្រីនៅអង្គភាពរបស់យើងក្នុងការចូលរួមដឹកនាំការងារក្នុងវិស័យមីនឱ្យបានរីកចម្រើនឆាប់រហ័ស»។
លោកថ្លែងថា ការងារបោសសម្អាតមីន ដែលបានអនុវត្ដមកជាង ២០ ឆ្នាំកន្លងមកនេះ គឺសម្រេចបានសមិទ្ធផលមួយចំនួនជូនជាតិមាតុភូមិ ដោយបានរំដោះដីមានមីនបានជាង ២ ពាន់គីឡូម៉ែត្រក្រឡា និងបានផ្ដល់ជូនដីដល់ប្រជាពលរដ្ឋធ្វើស្រែចម្ការឡើងវិញ។
លោក លី ធុជ បានឱ្យដឹងថា ក្នុងឱកាសកិច្ចសហប្រតិបត្ដិការគ្នានេះ លោកក៏បានអំពាវនាវដល់ GMAC និងសហការី ដែលជាអ្នកបង្កបង្កើតការងារនៅក្នុងប្រទេសកម្ពុជាចូលរួមនៅក្នុងបុព្វហេតុជាតិ តាមរយៈការចូលរួមជួយដល់ប្រជាពលរដ្ឋក្រីក្រនៅតាមបណ្ដាខេត្ដដែលមានមីន តាមរយៈការចូលរួមគាំទ្រដល់ការងារបោសសម្អាតមីននៅក្នុងភូមិណាមួយដែលជាភូមិមានមីន និងពិចារណា ដើម្បីចូលរួមជួយលើការងារបោសសម្អាតមីន នេះដើម្បីបញ្ចប់ទៅតាមផែនការដែលបានកំណត់នាពេលខាងមុខ។ ក្នុងនោះ GMAC មានមិត្ដភក្ដិ និងសហការីជាច្រើនដែលនឹងអាចចូលរួមជួយលើវិស័យមីន និងអាជ្ញាធរមីននាពេលអនាគតផងដែរ។
លោក វ៉ាន់ ស៊ូអៀង ប្រធាន GMAC ថ្លែងថា កិច្ចព្រមព្រៀងភាពជាដៃគូជាមួយអាជ្ញាធរមីនពេលនេះ បានអនុវត្តបេសកកម្មកម្ចាត់មីនជួយជនរងគ្រោះដោយសារមីន និងអប់រំប្រជាពលរដ្ឋអំពីហានិភ័យនៃមីន។
លោកថា អស់រយៈពេលជាង ២០ ឆ្នាំមកហើយ អាជ្ញាធរបានគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន ដោយសម្រេចសមិទ្ធផលគួរឱ្យកត់សម្គាល់ក្នុងនោះផ្ទៃដីរាប់ពាន់គីឡូម៉ែត្រការ៉េត្រូវបានបោសសម្អាតមីន និងដាក់ឱ្យប្រើប្រាស់សម្រាប់ផលិតកម្មសេដ្ឋកិច្ច និងសង្គម។ ក្នុងនោះជនរងគ្រោះដោយសារមីនក៏ត្រូវបានជួយសង្គ្រោះយ៉ាងល្អផងដែរ។
លោកបន្តថា៖ «ដោយមើលលើទិដ្ឋភាពនេះយើងពិតជាមានកិត្តិយសដែលបានចូលរួមដំណើរជាមួយអាជ្ញាធរមីនហើយអាចរួមចំណែកតាមវិធីតូចណាមួយដល់ជោគជ័យបន្ថែមទៀតរបស់អាជ្ញាធរមីននាពេលអនាគតដើម្បីសម្រេចបាននូវចក្ខុវិស័យឆ្នាំ ២០២៥ របស់អាជ្ញាធរមីន»។
លោក ស៊ូអៀង លើកឡើងថា លោកមិនធ្លាប់ដឹងថា សកម្មភាពបោសសម្អាតមីនបានចូលរួមដល់ការអភិវឌ្ឍនៅកម្ពុជា មានទំហំធំធេងនោះទេ នៅពេលបានដឹង ទើបមានអារម្មណ៍តក់ស្លុតចំពោះគ្រោះថ្នាក់ដោយសារមីននេះ។
លោកបន្តថា៖ «យើងដឹងថា ប្រជាពលរដ្ឋបានទទួលរងទុក្ខលំបាកគ្រប់យ៉ាងពីសង្គ្រាម ប៉ុន្ដែអត់បានដឹងថា តើក្រោយពីសង្គ្រាមប្រជាជនយើងនៅតែទទួលរងទុកលំបាកដោយសារគ្រាប់មីន និងសារធាតុផ្ទុះរហូតដល់សព្វថ្ងៃនេះ»។
លោកក៏បានអំពាវនាវដល់វិស័យឯកជនផ្សេងទៀតចូលរួមជាមួយអាជ្ញាធរមីន ដើម្បីជួយដល់ប្រជាពលរដ្ឋ និងសម្រេចគោលដៅប្រទេសកម្ពុជាជាប្រទេសគ្មានមីននៅឆ្នាំ ២០២៥ ខាងមុខ៕
