កោះកុងៈ ចាប់ពីថ្ងៃនេះទៅ អ្នករស់នៅក្នុងក្រុងខេមរភូមិន្ទ ខេត្តកោះកុង នឹងអស់កង្វល់អំពីបញ្ហាកង្វះទឹកស្អាតប្រើប្រាស់ទៀតហើយ ដោយក្រុមការងារបច្ចេកទេសកំពុងបង្កើនល្បឿនការងារតភ្ជាប់បណ្តាញទឹកស្អាតជូនពលរដ្ឋ។ នេះបើតាមមន្ត្រីជំនាញផ្នែកភ្ជាប់បណ្ដាញទឹកស្អាតនៃរដ្ឋាករទឹកខេត្តកោះកុង។
លោក ជុំ វណ្ណា ប្រធានក្រុមភ្ជាប់បណ្ដាញទឹកស្អាតនៃរដ្ឋាករទឹកខេត្តកោះកុង ដែលជាបុត្រសម្ព័ន្ធរបស់ក្រុមហ៊ុន LYP Group Co.,Ltd ប្រាប់ភ្នំពេញប៉ុស្តិ៍ នាថ្ងៃទី ១៤ ធ្នូ ថានៅពេលនេះ ក្រុមការងាររបស់លោកកំពុងបង្កើនល្បឿនការងារភ្ជាប់បណ្ដាញទឹកស្អាតនៅទូទាំងក្រុងខេមរភូមិន្ទ និងស្រុកមណ្ឌលសីមា។ តាមគម្រោង ការភ្ជាប់បណ្ដាញផ្គត់ផ្គង់ទឹកស្អាតក្នុងក្រុង-ស្រុកជាប់មាត់សមុទ្រទាំង ២ នេះនឹងត្រូវភ្ជាប់ឱ្យបាន ១០០ ភាគរយ នៅដើមឆ្នាំ ២០២៣។
លោកថ្លែងថា៖ «បច្ចុប្បន្ន ក្រុមការងារយើងបានភ្ជាប់បណ្ដាញទឹកស្អាតក្នុងក្រុងខេមរភូមិន្ទ និងស្រុកមណ្ឌលសីមាបានសម្រេច ៨០ ភាគរយហើយ ដែលគិតជាខ្នងផ្ទះចំនួនជាង ៨ ០០០ ខ្នង ដែលតួលេខនេះ នៅមិនទាន់បូកបញ្ចូលនូវចំនួនខុនដូ សណ្ឋាគារ និងផ្ទះសំណាក់ធំៗនៅឡើយទេ»។
លោកបន្ថែមថា៖ «ហើយម្ចាស់ខ្នងផ្ទះដែលបានភ្ជាប់បណ្ដាញទឹកស្អាតរបស់ក្រុមហ៊ុនយើងរួចហើយនោះ នឹងអស់បញ្ហាអំពីកង្វះខាតទឹកស្អាតប្រើប្រាស់ទៀតហើយ»។
បើតាមលោក ជុំ វណ្ណា រដ្ឋាករទឹកខេត្តកោះកុងបានបង្កើនសមត្ថភាពនៃការផលិតទឹកស្អាតបានប្រមាណ ២ ម៉ឺនម៉ែត្រគុបក្នុង ១ ថ្ងៃសម្រាប់ចែកចាយជូនដល់អ្នកប្រើប្រាស់ប្រចាំថ្ងៃ។ ព្រោះក្រុមហ៊ុនបានសាងសង់អាងស្តុកទឹកដ៏ធំមួយ នៅតំបន់ទឹកធ្លាក់តាប៉ន ស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ ដែលអាងស្តុកទឹកនេះមានសមត្ថភាព ផ្ទុកទឹកបានដល់ទៅជាង ៣ លានម៉ែត្រគុប។
ទោះយ៉ាងណា ប្រជាពលរដ្ឋនៅភូមិកោះប៉ោ និងភូមិបឹងកាឆាងនៃឃុំប៉ាក់ខ្លង ស្រុកមណ្ឌលសីមា បានស្នើឱ្យក្រុមការងារ បច្ចេកទេសនៃរដ្ឋាករទឹកខេត្តកោះកុង ចុះសិក្សារកមធ្យោបាយតភ្ជាប់បណ្ដាញទឹកស្អាតដល់សហគមន៍របស់ពួកគាត់ ដែលគ្មានប្រភពទឹកសាបប្រើប្រាស់។
លោក វឹន សាវ៉ាទ មេភូមិកោះប៉ោ ប្រាប់ភ្នំពេញប៉ុស្តិ៍ថា បច្ចុប្បន្នប្រជាពលរដ្ឋនៅទូទាំងភូមិកោះប៉ោ ដែលមានចម្ងាយប្រមាណ ១០ គីឡូម៉ែត្រ (តាមផ្លូវទឹក) ពីក្រុងខេមរភូមិន្ទ មិនមានប្រភពទឹកស្អាតប្រើប្រាស់នោះទេ ហើយក៏គ្មានបណ្ដាញទឹកស្អាតចូលទៅដល់នោះដែរ ធ្វើឱ្យពួកគាត់ជួបប្រទះការលំបាកជាខ្លាំងនៅក្នុងជីវភាពរស់នៅប្រចាំថ្ងៃ។
លោកថ្លែងថា៖ «បច្ចុប្បន្ន អ្នកភូមិយើងមានចំនួន ១២៩ គ្រួសារ ពួកយើងបានជីកអណ្ដូង ដើម្បីយកទឹកសាបប្រើប្រាស់ តែទឹកអណ្ដូងរបស់ពួកយើង មានជាតិប្រៃភ្លាវ និងមានក្លិនស្អុយ ព្រោះភូមិរបស់ពួកយើងហ៊ុមព័ទ្ធដោយទឹកសមុទ្រ។ ដូច្នេះយើងប្រើប្រាស់ទឹកអណ្ដូងនោះ សម្រាប់តែងូត និងបោកគក់សម្លៀកបំពាក់ប៉ុណ្ណោះ។ ដោយឡែកទឹកសម្រាប់បរិភោគ និងដាំស្ល គឺយើងទៅទិញពីផ្សារក្នុងក្រុងខេមរភូមិន្ទ»។
ចំណែកលោក ង៉ែត លុច ប្រធានភូមិបឹងកាចាង ប្រាប់ភ្នំពេញប៉ុស្តិ៍ថា អ្នកភូមិរបស់គាត់បានសហការគ្នាតភ្ជាប់បណ្ដាញទឹកស្អាតពីក្រុមហ៊ុនឯកជនមួយនៅតំបន់ពាមក្រសោប ប៉ុន្តែទឹករបស់ក្រុមហ៊ុនឯកជននោះ មិនស្អាតល្អទេ គឺ មានកករដី ហើយមានតម្លៃទឹកក៏ខ្ពស់ផងដែរ គឺ ៤ ០០០ រៀល ក្នុង ១ ម៉ែត្រគុប ដែលធ្វើឱ្យពួកគាត់មានការចំណាយខ្ពស់ទៅលើថ្លៃទឹក។
លោក ង៉ែត លុច ដែលអះអាងថា ភូមិរបស់គាត់មានប្រជាពលរដ្ឋសរុបចំនួន ១៥៧ គ្រួសារ បាននិយាយថា៖ «យើងចង់ឱ្យក្រុមហ៊ុនរដ្ឋាករទឹកខេត្តកោះកុង មេត្តាជួយភ្ជាប់បណ្ដាញទឹកស្អាតមកដល់ភូមិយើងខ្ញុំ ដើម្បីបានប្រើប្រាស់ ប្រកបដោយផាសុកភាព»។
ជុំវិញករណីនេះ លោក ខ្លឹម គគីរ ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកោះកុង អះអាងថា ការផ្គត់ផ្គង់ទឹកស្អាតរបស់ក្រុមហ៊ុន LYP Groubco.ltd បានត្រឹមតែក្នុងក្រុងខេមរភូមិន្ទ និងស្រុក-មណ្ឌលសីមាប៉ុណ្ណោះ។ បច្ចុប្បន្ន ខាងភាគីក្រុមហ៊ុនក៏ដូចជាមន្ទីរ បានខិតខំបង្កើនល្បឿនតភ្ជាប់បណ្តាញទឹកស្អាតឱ្យដល់ដៃអ្នកប្រើប្រាស់បានគ្រប់ជ្រុងជ្រោយជាមួយនឹងភាពរីកចម្រើនខ្លាំងលើគ្រប់វិស័យ ហើយកំណើនប្រជាជនក៏កាន់តែមានការកើនឡើង។ ក្នុងមួយរយៈកាល ២ ឆ្នាំចុងក្រោយនេះ ការប្រើប្រាស់ទឹកស្អាតកើនឡើងដល់ជិត ១ ម៉ឺនគ្រួសារ ដែលខុសពីឆ្នាំ ២០១៩ នៅក្រុង-ស្រុកទាំង ២ នេះមានអ្នកប្រើទឹកតែជាង ៥ ០០០ គ្រួសារប៉ុណ្ណោះ៕