ភ្នំពេញៈ បន្ទាប់ពីបិទបញ្ចប់ការពិនិត្យបញ្ជីឈ្មោះ និងការចុះឈ្មោះបោះឆ្នោតមក គណៈកម្មាធិការជាតិរៀបចំការបោះឆ្នោត (គ.ជ.ប) បាននិងកំពុងពិនិត្យកែតម្រូវទិន្នន័យបញ្ជីឈ្មោះ និងបញ្ជីដែលត្រូវបានលុបឈ្មោះចេញ ដើម្បីរៀបចំឱ្យទៅជាបញ្ជីបោះឆ្នោតដំបូង ដែលគ្រោងនឹងបិទផ្សាយជាសាធារណៈនៅដើមឆ្នាំក្រោយនៅតាមបណ្តាឃុំ-សង្កាត់នានានៅទូទាំងប្រទេស។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ១៥ ខែធ្នូ ឆ្នាំ ២០២១ ថា ការបិទផ្សាយជាសាធារណៈនូវបញ្ជីបោះឆ្នោដំបូង និងបញ្ជីដែលត្រូវបានលុបឈ្មោះចេញនេះគឺដើម្បីឱ្យប្រជាពលរដ្ឋទៅពិនិត្យមើល និងប្តឹងជំទាស់តវ៉ាស្នើសុំកែតម្រូវមុននឹង គ.ជ.ប ប្រកាសផ្តល់សុពលភាពជាផ្លូវការសម្រាប់យកទៅប្រើប្រាស់ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥ នៅឆ្នាំ ២០២២ ដែលនឹងប្រព្រឹត្តទៅនៅថ្ងៃទី ៥ មិថុនា។
លោកបានពន្យល់ថា ការបិទផ្សាយជាសាធារណៈទាំងបញ្ជីបោះឆ្នោតដំបូង និងទាំងបញ្ជីអ្នកដែលត្រូវបានលុបឈ្មោះចេញនេះគឺត្រូវធ្វើឡើងទន្ទឹមគ្នាក្នុងរយៈពេល ១០ ថ្ងៃ គិតចាប់ពីថ្ងៃទី ៣ ខែមករា ឆ្នាំ ២០២២ ទៅ ដើម្បីឱ្យប្រជាពលរដ្ឋអាចទៅពិនិត្យមើលឈ្មោះរបស់ខ្លួនក្នុងបញ្ជីបោះឆ្នោតដំបូង ដើម្បីឱ្យប្រាកដថា មានឈ្មោះនៅក្នុងបញ្ជីបោះឆ្នោតផង និងទិន្នន័យរបស់គាត់ពិតជាត្រូវបានកត់ត្រាត្រឹមត្រូវទៅតាមឯកសារសម្រាប់យកទៅបោះឆ្នោតផង ។
បើតាមលោក សោម សូរីដា ប្រជាពលរដ្ឋក៏អាចពិនិត្យមើលបញ្ជីឈ្មោះដែលត្រូវបានលុបចេញបានផងដែរ។ ក្នុងករណីពិនិត្យមើលឃើញឈ្មោះរបស់ខ្លួនមាននៅក្នុងបញ្ជីដែលត្រូវបានលុបនោះ ប្រជាពលរដ្ឋមានសិទ្ធិប្តឹងតវ៉ា ដើម្បីរក្សាទុកឈ្មោះរបស់គាត់នៅក្នុងបញ្ជីបោះឆ្នោតវិញ។
លោកបានបញ្ជាក់ថា៖ «បន្ទាប់ពីបិទបញ្ចប់ការប្តឹងតវ៉ា និងប្តឹងជំទាស់ទៅនឹងបញ្ជីបោះឆ្នោតដំបូង ឬបញ្ជីដែលត្រូវបានលុបចេញពីបញ្ជីបោះឆ្នោត ហើយត្រូវបានដោះស្រាយបណ្តឹងបញ្ចប់នៅក្រុមប្រឹក្សាធម្មនុញ្ញ គណៈកម្មាធិការជាតិរៀបចំការបោះឆ្នោតនឹងប្រកាសផ្តល់សុពលភាពនូវបញ្ជីបោះឆ្នោតផ្លូវការនៅថ្ងៃទី ១២ កុម្ភៈ ឆ្នាំ ២០២២»។
លោក សំ សុគន្ធាមី នាយកប្រតិបត្តិអង្គការអព្យាក្រឹត និងយុត្តិធម៌ ដើម្បីការបោះឆ្នោតនៅកម្ពុជា (NICFEC) បានថ្លែងថា ចំពោះការបិទផ្សាយបញ្ជីបោះឆ្នោតដំបូង និងបញ្ជីដែលត្រូវបានលុបឈ្មោះចេញពីបញ្ជីបោះឆ្នោតខាងមុខនេះ អង្គការរបស់លោកនឹងមិនដាក់អ្នកសង្កេតការណ៍ឃ្លាំមើលទៀតទេ ព្រោះអង្គការធ្លាប់បានដាក់អ្នកសង្កេតការណ៍ឃ្លាំមើលរួចហើយកាលពីអំឡុងពេលពិនិត្យបញ្ជី និងចុះឈ្មោះបោះឆ្នោតកន្លងមក។
លោកបានថ្លែងថា៖ «នៅពេលដែល គ.ជ.ប ប្រកាសផ្តល់សុពលភាពហើយ ប្រជាពលរដ្ឋអត់អាចប្តឹងតវ៉ា ឬជំទាស់បានទេ ព្រោះគេទុកពេលឱ្យយើងច្រើនដែរហើយ។ កាលពីពេលចុះឈ្មោះបោះឆ្នោត ក៏គេទុកពេលឱ្យកែតម្រូវបានដែរ ប៉ុន្តែលើកនេះ បើពិនិត្យឃើញខុសអីក៏អាចប្តឹងជំទាស់កែតម្រូវបានដែរ»។
បើតាមលោក សំ សុគន្ធាមី ប្រសិនបើពលរដ្ឋ មិនមានឈ្មោះនៅក្នុងបញ្ជីបោះឆ្នោត ក្រោយពី គ.ជ.ប ប្រកាសផ្តល់សុពលភាពជាផ្លូវការ ប្រជាពលរដ្ឋទាំងនោះអាចរង់ចាំចុះឈ្មោះនៅរៀងរាល់ឆ្នាំបន្តបន្ទាប់ទៀត ព្រោះ គ.ជ.ប តែងតែរៀបចំចុះឈ្មោះអ្នកបោះឆ្នោតថ្មីជារៀងរាល់ចុងឆ្នាំនីមួយៗ។
យោងតាមរបាយការណ៍របស់ គ.ជ.ប បង្ហាញថា ប្រជាពលរដ្ឋដែលមានឈ្មោះបណ្តោះអាសន្នក្នុងការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ ២០២១ ក្នុងរយៈពេល ៥០ ថ្ងៃ សរុបមានចំនួន ៩ ២០៥ ៧៤៣ នាក់ក្នុងនោះអ្នកដែលបានចុះឈ្មោះបោះឆ្នោតថ្មីមានចំនួន ៧ ៩៤២ នាក់ អ្នកដែលត្រូវបានលុបឈ្មោះចេញពីបញ្ជីបោះឆ្នោតមានចំនួន ៩ ៦២៧ នាក់ អ្នកដែលបានកែតម្រូវទិន្នន័យមានចំនួន ៣ ៥០៥ នាក់ និងអ្នកដែលបានផ្ទេរលំនៅចូលក្នុងឃុំ សង្កាត់ថ្មី មានចំនួន ៤ ១៦៦ នាក់៕