ភ្នំពេញៈ សហភាពសហព័ន្ធយុវជនកម្ពុជា (ស.ស.យ.ក.) សហការជាមួយមន្ទីរអប់រំ យុវជន និងកីឡា សម្របសម្រួលផ្តល់កន្លែងស្នាក់នៅ និងតម្រូវការចាំបាច់មួយចំនួនដល់សិស្សានុសិស្សថ្នាក់ទី ១២ ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ដែលនឹងប្រព្រឹត្តទៅនាចុងខែធ្នូ ឆ្នាំ ២០២១ ខណៈសម័យប្រឡងនេះមានបេក្ខជនសរុបជាង ១១ ម៉ឺននាក់។
សេចក្ដីណែនាំរបស់សហភាពសហព័ន្ធយុវជនកម្ពុជាឱ្យដឹងថា ក្នុងឱកាសនៃការប្រឡងសញ្ញាបត្រមធ្យមសិក្សាទុតិយភូមិ នាថ្ងៃទី ២៧ និង ២៨ ធ្នូ ឆ្នាំ ២០២១ ខាងមុខនេះ មានបេក្ខជនមួយចំនួនអាចមានលំនៅឆ្ងាយពីមណ្ឌលប្រឡង នៅតាមបណ្តារាជធានី ខេត្ត ដែលអាចធ្វើឱ្យមានការលំបាកមួយចំនួន ដូចជាការធ្វើដំណើរ និងការស្នាក់នៅជាដើម។
ដូច្នេះដើម្បីចូលរួមចំណែកសម្របសម្រួលតាមលទ្ធភាពដល់សិស្សានុសិស្ស និងគ្រួសារ ស.ស.យ.ក. តម្រូវឱ្យគណៈកម្មាធិការរាជធានី- ខេត្ត ស្វែងរកលទ្ធភាពផ្តល់ជាកន្លែងស្នាក់នៅ កន្លែងទុកដាក់កង់ ម៉ូតូ នៅក្រៅមណ្ឌលប្រឡង និងតម្រូវការចាំបាច់មួយចំនួនទៀត តាមរយៈគ្រប់រូបភាព និងលទ្ធភាពដែលអាចជួយបាន។
សេចក្តីណែនាំបញ្ជាក់ថា «ក្នុងអំឡុងពេលប្រឡងនាពេលខាងមុខនេះ គណៈកម្មាធិការកណ្តាលនឹងពិនិត្យលទ្ធភាពសហការជាមួយមន្ទីរអប់រំ យុវជន និងកីឡា និងអាជ្ញាធរមូលដ្ឋានទូទាំងប្រទេស លើការសម្របសម្រួលដល់សិស្សទី ១២ ដែលមកប្រឡងនៅទីរួមខេត្ត និងទីតាំងប្រមូលផ្តុំមណ្ឌលប្រឡងដទៃទៀត»។
ជាមួយគ្នានេះ ស.ស.យ.ក. ក៏បានណែនាំឱ្យគណៈកម្មាធិការរាជធានី-ខេត្តបន្តចូលរួមឱ្យបានសកម្មជាមួយបុគ្គលិកអប់រំគ្រប់លំដាក់ថ្នាក់ ដើម្បីធានានិរន្តរភាពនៃការអប់រំ ដែលទទួលរងផលប៉ះពាល់ពីការរីករាលដាលនៃជំងឺកូវីដ ១៩ ដោយគោរពឱ្យបានម៉ឺងម៉ាត់តាមវិធានការសុខាភិបាល។ ជាពិសេសណែនាំឱ្យសមាជិកសមាជិកា ដែលចូលរួមសម្របសម្រួលត្រូវមានការប្រុងប្រយ័ត្នឱ្យបានខ្ពស់ និងប្រកាន់ខ្ជាប់វិធានការ ៣ ការពារ និង ៣ កុំ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា សាទរចំពោះការចូលរួមចំណែករបស់សហភាពសហព័ន្ធយុវជនកម្ពុជាក្នុងការសម្របសម្រួលដល់សិស្សានុសិស្សដែលនឹងចូលរួមប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២០-២០២១ នេះ។
លោកបញ្ជាក់ថា៖ «ថ្នាក់ដឹកនាំក្រសួងអប់រំ យុវជន និងកីឡាសូមថ្លែងអំណរគុណយ៉ាងជ្រាលជ្រៅ ចំពោះសហភាពសហព័ន្ធយុវជន-កម្ពុជាដែលចូលរួមចំណែកក្នុងការជួយសម្រួលដល់ប្អូនៗសិស្សានុសិស្ស នូវកន្លែងស្នាក់នៅ ព្រមទាំងតម្រូវការចាំបាច់ផ្សេងៗ ដែលទឹកចិត្តដ៏ប្រពៃនេះ បង្ហាញពីការយកចិត្តទុកដាក់ចំពោះយុវជនកម្ពុជា»។
លោក រស់ សុវាចា ថ្លែងថា តាមយន្តការឆ្នាំកន្លងមក ក្រសួងអប់រំបានស្នើកិច្ចសហការពីក្រសួងមហាផ្ទៃ អង្គភាពប្រឆាំងអំពើពុករលួយ ស.ស.យ.ក. ក្រសួង-ស្ថាប័នពាក់ព័ន្ធ អាជ្ញាធរមូលដ្ឋានដើម្បីចូលរួមគ្រប់ដំណាក់កាលនៃដំណើរការប្រឡងបាក់ឌុបសម័យប្រឡង ថ្ងៃទី ២៧ ធ្នូ ២០២១។ លោកថា ការចូលរួមនេះ ដើម្បីបន្តអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបានស្របនឹងវិធានការសុវត្ថិភាពសុខភាព ខណៈនៅទូទាំងប្រទេស ដំណើរការរៀបចំប្រឡងបាក់ឌុបបាននិងកំពុងប្រព្រឹត្តទៅតាមការគ្រោងទុក។
បើតាមលោក រស់ សុវាចា ការប្រឡងសញ្ញាបត្រមធ្យមសិក្សាទុតិយភូមិ សម្រាប់សិស្សថ្នាក់ទី ១២ រយៈពេល ២ ថ្ងៃ គឺមានបេក្ខជនប្រឡងទូទាំងប្រទេសចំនួន ១១៥ ១៤៩ នាក់ក្នុងនោះបេក្ខនារីមានចំនួន ៦០ ៦៨២ នាក់។ ក្នុងបេក្ខជនសរុបនេះ ចំពោះបេក្ខជនស្វ័យរិន គឺមានចំនួន ៤ ៣៣៤ នាក់ នារី ១ ៧៦២ នាក់។ ចំណែកបេក្ខជនបំពេញវិជ្ជាចំនួន ៣ ៤៦១ នាក់ នារី ១ ០៥៣ នាក់ និងបេក្ខជនស្វ័យរិនបំពេញវិជ្ជា ២ ០៤៣ នាក់ នារី ៤៦៨ នាក់។ មណ្ឌលប្រឡងទូទាំងប្រទេសមាន ២០៤ និងមាន ៤ ៦៥២ បន្ទប់ មានគណ:កម្មការអប្បមាទចំនួន ៦១២ នាក់ និងជំនួយការអប្បមាទ ១ ៥៧៨ នាក់៕