កំពង់ឆ្នាំងៈ ប្រជាពលរដ្ឋចំនួន ១២ គ្រួសារដែលរស់នៅក្នុងសំណង់អគារចាស់តាំងពីជំនាន់បារាំងដែលមានអាយុកាល ៩០ ឆ្នាំស្ថិតនៅបណ្តោយផ្សារក្រោម ក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ស្ម័គ្រចិត្តចាកចេញជាបណ្តោះអាសន្ន តាមសំណើរបស់អាជ្ញាធរ បន្ទាប់ពីមន្ត្រីជំនាញចុះពិនិត្យវាយតម្លៃថា សំណង់នេះ ចាស់ទ្រុឌទ្រោមខ្លាំង ដែលអាចបង្កគ្រោះថ្នាក់ជាយថាហេតុ។
សេចក្តីជូនដំណឹងរបស់រដ្ឋបាលខេត្តកំពង់ឆ្នាំងបានប្រាប់ឱ្យប្រជាពលរដ្ឋ ១២ គ្រួសារដែលរស់នៅលើសំណង់អគារនោះ ត្រូវរុះរើចេញត្រឹមថ្ងៃទី ១៣ ធ្នូ ឆ្នាំ ២០២១ ជាកំហិត។ សេចក្តីជូនដំណឹងបន្តថា៖ «រដ្ឋបាលខេត្តបានជូនដំណឹងឱ្យរុះរើ ៣ ដងរួចមកហើយ ដូចនេះសូមពលរដ្ឋកំពុងរស់នៅ ១៣ ល្វែង ដែលមានសភាពទ្រុឌទ្រោមយ៉ាងខ្លាំង ត្រូវរុះរើចេញ មិនអាចរក្សាទុកតទៅទៀតបានទេ ចំណែកទ្រព្យសម្បត្តិ សម្ភារផ្សេងៗ និងបណ្ណកម្មសិទ្ធិត្រូវរក្សាទុកឱ្យបានត្រឹមត្រូវដោយខ្លួនឯង»។
អ្នកស្រី សៀង ហួរ អាយុ ៣៨ ឆ្នាំដែលរស់នៅក្នុងសំណង់នេះតាំងពីដូនតាមក បានប្រាប់ភ្នំពេញប៉ុស្តិ៍ថា ការព្រមចាកចេញនេះ ដោយសារអាជ្ញាធរបានសន្យាជួយសម្រួលចេញថ្លៃការរុះរើ ហើយ និងចេញច្បាប់សាងសង់ដល់ពលរដ្ឋ។ ប៉ុន្តែការចំណាយសាងសង់ឡើងវិញអស់ចំនួនប៉ុន្មាននោះ ប្រជាជនដែលជាម្ចាស់កម្មសិទ្ធិនីមួយៗចេញសេវាដោយខ្លួនឯង។
អ្នកស្រីថា៖ «ពួកខ្ញុំមិនទាន់ដឹងច្បាស់ថាអាជ្ញាធរចេញច្បាប់សាងសង់ឱ្យពេលណាទេ គាត់គ្រាន់តែថា នឹងចេញច្បាប់សាងសង់ឱ្យបានឆាប់រហ័សហើយពួកខ្ញុំរង់ចាំមើល បើក្នុងរយៈពេល ១ អាទិត្យ ក្រោយពីរុះរើ អាជ្ញាធរមិនធ្វើអ្វីដែលជាលិខិតស្នាមសម្រាប់ពួកខ្ញុំ យើងនឹងមានការប្រតិកម្ម»។
អ្នកស្រីបានរៀបរាប់ថា ពេលដឹងក្តីមក អ្នកស្រីបានរស់នៅជាមួយជីដូនហើយបច្ចុប្បន្នជីដូនមានអាយុ ១០០ ឆ្នាំហើយ ពួកអ្នកស្រីមានប្លង់រឹងត្រឹមត្រូវតាមច្បាប់។ អ្នកស្រីក៏ទទួលស្គាល់ដែរថា រយៈពេលរស់នៅជាច្រើនឆ្នាំមកនេះសំណង់នោះ ពិតជាទ្រុឌទ្រោម និងមានការកែលម្អ ជួសជុលជាបន្តបន្ទាប់ ប៉ុន្តែអាចរស់នៅបានធម្មតា។
អ្នកស្រីបញ្ជាក់ថា៖ «ផ្ទះខ្លះ មានការជួសជុលជាបន្តបន្ទាប់ ប៉ុន្តែនៅរស់នៅបានដូចសំណង់គេធម្មតាដែរ គ្រាន់តែពេលភ្លៀងមក ផ្ទះខ្លះស្រក់ទឹក កាលមិនទាន់ជួសជុលមានហានិភ័យតិចតួចទេ ប៉ុន្តែសម្រាប់អ្នកជួសជុលហើយដូចរស់នៅផ្ទះថ្មីអ៊ីចឹង ដូចអត់មានហានិភ័យខ្លាំងនោះទេ»។
លោក សាន់ យូ អភិបាលរងខេត្តកំពង់ឆ្នាំងថ្លែងថា ទោះបីជាពលរដ្ឋមិនព្រមរុះរើ អាជ្ញាធរនឹងអនុវត្តវិធានការរដ្ឋបាល ដោយលោកលើកឡើងថា ដើម្បីសុវត្ថិភាពប្រជាពលរដ្ឋ។ លោកថា៖«ពួកគាត់បានចាកចេញជាបណ្តើរៗតាំងពីសប្តាហ៍មុន។ រដ្ឋបាលខេត្តមិនមានបំណងអ្វីក្រៅពីជួយសង្គ្រោះជីវិត និងទ្រព្យសម្បត្តិពួកគាត់ទេ យើងមិនមែនយកអគារគាត់ទេ ផ្ទុយមកវិញ រដ្ឋបាលខេត្តជួយសម្របសម្រួលក្នុងការផ្តល់សេវាជួយសុំច្បាប់សម្រាប់រុះរើ និងសាងសង់ថ្មី»។
លោកគូសបញ្ជាក់ថា ផ្អែកតាមការវាយតម្លៃរបស់មន្ត្រីជំនាញពាក់ព័ន្ធសំណង់នេះមិនអាចជួសជុលប្រើប្រាស់បានទៀតទេ ពីព្រោះអាចប្រឈមនឹងការបាក់រលំទៅថ្ងៃមុខ។ លោកបន្តថា មូលហេតុមិនទុកសំណង់ដែលមានអាយុកាល ៩០ ឆ្នាំនេះ ដោយសារសំណង់នោះមិនមានលក្ខណពិសេស មិនមានក្បាច់ក្បូរ ដូចសំណង់ផ្សេងៗនោះទេ។
លោក ហ៊ីង ភ័ព្វមីនា អភិបាលស្តីទីក្រុងកំពង់ឆ្នាំង បានថ្លែងថា សំណង់នេះជាប្រភេទសំណង់គ្រោះថ្នាក់ ដោយផ្អែកតាមការវាយតម្លៃពីក្រសួងពាក់ព័ន្ធចំនួន ២ ។ លោកបន្តថា៖ «យើងអត់អាចទុកវាបានទៀតទេ ព្រោះមានការវាយតម្លៃច្បាស់លាស់ពីក្រសួង សំណង់នេះមានអាយុ ៩០ ឆ្នាំ សាងសង់ក្នុងឆ្នាំ ១៩៣១ ហើយលទ្ធភាពក្នុងការប្រើប្រាស់អស់ហើយ»។ លោកថា ដោយសារសំណង់នេះជាសហកម្មសិទ្ធិឯកជន ដូច្នេះទុកឱ្យពលរដ្ឋជាអ្នកសម្រេចចិត្តក្នុងការសាងសង់ឡើងវិញ។
សេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ ចុះខែមករា ឆ្នាំ ២០២១ បានឱ្យដឹងថា កាលពីឆ្នាំ ២០២០ មន្ត្រីជំនាញរបស់ក្រសួងបានចុះពិនិត្យវាយតម្លៃពីស្ថានភាពសំណង់អគារ ១៣ ល្វែងនោះ។ ជាលទ្ធផលក្រោយការចុះពិនិត្យជាក់ស្ដែង អគារ ១៣ ល្វែងនេះ មានស្ថានភាពចាស់ទ្រុឌទ្រោម និងខូចខាតខ្លាំងចំពោះគ្រឿងផ្គុំមេ (សសរ ធ្នឹម ប្លង់សេ) ដោយមានភាពដាប ជ្រាបទឹក ប្រេះបែកបេតុង និងច្រែះស៊ីដែកដែលពុំអាចជួសជុលឡើងវិញបាន និងអាចនាំឱ្យមានហានិភ័យខ្ពស់ក្នុងការស្នាក់នៅ។ សេចក្តីជូនដំណឹងបញ្ជាក់ថា៖ «ដូច្នេះ ក្រសួងឯកភាពឱ្យធ្វើការរុះរើចេញនូវសំណង់ខាងលើនេះ ដើម្បីបញ្ចៀសនូវហានិភ័យដែលអាចកើតមានឡើងជាយថាហេតុ និងអាចឱ្យសាងសង់អគារថ្មី»។ ចំណែកសេចក្តីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី ១៣ ខែកុម្ភៈ ឆ្នាំ ២០២០ ក៏បានចេញលទ្ធផលវាយតម្លៃស្រដៀងគ្នាទៅនឹងក្រសួងវប្បធម៌ផងដែរ៕
វីដេអូ៖