ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានសហការជាមួយគណៈកម្មការប្រកួតប្រជែង និងអ្នកប្រើប្រាស់អូស្ត្រាលី (ACCC) រៀបចំបើកវគ្គបណ្ដុះបណ្ដាលរយៈពេល២ ថ្ងៃ ស្ដីពីការដោះស្រាយវិវាទ និងការដោះស្រាយបណ្ដឹង ។
លោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក ក.ប.ប ប្រាប់ភ្នំពេញប៉ុស្តិ៍ថា វគ្គបណ្ដុះបណ្ដាលនេះ ត្រូវរៀបចំឡើង រយៈពេលពីរថ្ងៃ គឺនៅថ្ងៃទី ១៥-១៦ ធ្នូ ដោយមានការចូលរួមពីអគ្គនាយករង ប្រធាននាយកដ្ឋាន អនុប្រធាន នាយកដ្ឋាន ប្រធាន/អនុប្រធានសាខា ក.ប.ប រាជធានី ខេត្តទាំង២។
នៅថ្ងៃទី ១៥ ធ្នូ ក.ប.ប បានសិក្សាពីដំណើរការ នៃការទទួលបណ្តឹងរបស់ ACCC ។ ក្នុងដំណើរការនេះ ACCC បានធ្វើបទបង្ហាញ ដើម្បីធ្វើជាធាតុចូលដល់ ក.ប.ប ក្នុងការដោះស្រាយ នៅពេលដែលមានពាក្យបណ្តឹងណាមួយកើតឡើង ដោយមានដំណើការនិងការវិភាគទៅលើការរកស៊ី កាធ្វើពាណិជ្ជកម្ម ដោយមិនកំណត់វិស័យណាមួយឡើយ ឱ្យតែជាវិស័យពាក់ព័ន្ធនឹងបណ្តឹង។
លោកបញ្ជាក់ទៀតថា សម្រាប់នៅថ្ងៃទី ១៦ ខែធ្នូ នឹងមានការចែករំលែកនូវបទពិសោធ របស់ប្រទេសថៃ ក្នុងយន្តការនៃការដោះស្រាយបណ្តឹង ដោយសិក្សាទៅលើគោលការណ៍អាស៊ាន ពាក់ព័ន្ធនឹងយន្តការសម្របសម្រួលដោះស្រាយក្រៅប្រព័ន្ធតុលាការជាដើម ។
លោកថ្លែងថា៖ « ក្រោយវគ្គបណ្តុះបណ្តាល បើអាច នៅពេលមើលឃើញថា យន្តការណាមួយល្អ និងទទួលបានដោយភាគីជម្លោះណាមួយ យើងអនុវត្តវិធានការនោះ នៅក្នុងលក្ខខណ្ឌ ដែលមិនរំលោភទៅនឹងក្រមព្រហ្មទណ្ឌ»។
បើតាម លោក ផាន អូន អគ្គនាយកដ្ឋាន ក.ប.ប មានជំហរក្នុងការចង់ដោះស្រាយបណ្តឹង ឱ្យបានកាន់តែឆាប់កាន់តែប្រសើរ ពាក់ព័ន្ធនឹងបណ្តឹងដែលភាគីជម្លោះមាន ដោយធ្វើយ៉ាងណា អាចទទួលយកដំណោះស្រាយបានក្រៅប្រព័ន្ធតុលាការ ដែលមិនមែនជាបទល្មើសព្រហ្មទណ្ឌ ។
យោងតាមវគ្គបណ្ដុះបណ្ដាល ស្តីពី «ការដោះស្រាយវិវាទ និងការដោះស្រាយបណ្ដឹង» នេះបង្ហាញថា វគ្គបណ្តុះបណ្តាលនេះ ទទួលបានការចែករំលែកបទពិសោធ ពាក់ព័ន្ធទៅនឹងកិច្ចការពារអ្នកប្រើប្រាស់ ដោយជំនាញការចំនួន ៥រូប មកពីប្រទេសអូស្ត្រាលី និងប្រទេសថៃ លើប្រធានបទចំនួន ៤ សំខាន់ៗ ។
ប្រធានបទសំខាន់ទាំង ៤ នេះ រួមមាន ១ -ទិដ្ឋភាពទូទៅ នៃដំណើរការដោះស្រាយបណ្ដឹងរបស់ ACCC ២- ទិដ្ឋភាពទូទៅនៃការដោះស្រាយវិវាទ ក្រៅប្រព័ន្ធតុលាការ (ADR) និងគោលការណ៍ណែនាំ ADR របស់អាស៊ាន ៣- ទស្សនៈរបស់ ACCC លើការដោះស្រាយវិវាទ៖ វិធីសាស្ត្រក្នុងការចូលរួមជាមួយពាណិជ្ជករ និងការចរចាលទ្ធផលដើម្បីដោះស្រាយវិវាទក្រោមច្បាប់អ្នកប្រើប្រាស់ និង ៤- ទិដ្ឋភាពទូទៅ នៃប្រព័ន្ធការពារអ្នកប្រើប្រាស់ថៃ៖ មេរៀនពីបទពិសោធរបស់ថៃ៕