.jpg)
យុវជនត្រូវចោទពីបទរួមភេទជាមួយក្មេងស្រីក្រោមអាយុ។ រូបថត នគរបាល
បាត់ដំបងៈ តុលាការខេត្តបាត់ដំបងកាលពីថ្ងៃទី១៥ ធ្នូ បានចេញដីកាឃុំខ្លួនយុវជនម្នាក់ ក្នុងពន្ធនាគារខេត្តពាក់ព័ន្ធបទរួមភេទជាមួយក្មេងស្រីអាយុ១៣ឆ្នាំម្នាក់ប្រព្រឹត្តនៅផ្ទះសំណាក់ស្ថិតក្នុង ឃុំ-ស្រុកកំរៀង ខេត្តបាត់ដំបងកាលពីថ្ងៃទី១២ ធ្នូ ឆ្នាំ២០២១។
លោកស្រី ជា ច័ន្ទរស្មី អ្នកនាំពាក្យតុលាការខេត្តបាត់ដំបងប្រាប់ភ្នំពេញប៉ុស្តិ៍នៅរសៀលថ្ងៃទី១៦ ធ្នូ ថា ចៅក្រមស៊ើបសួរនៃតុលាការខេត្តបាត់ដំបងកាលពីថ្ងៃទី១៥ ធ្នូ ឆ្នាំ ២០២១ បានចេញដីកាឃុំខ្លួនជនត្រូវចោទម្នាក់ឈ្មោះកុយ គីណា អាយុ ១៥ឆ្នាំ។
លោកស្រីថ្លែងថា៖«ជនត្រូវចោទម្នាក់នេះត្រូវបានលោកស្រីចៅក្រមស៊ើបសួរ ជុំ សង្វា ជាអ្នកចេញដីកាឃុំតាមការចោទពីតំណាងអយ្យការពីបទរំលោភសេពសន្ថវៈ។ ជននេះបានឃុំខ្លួនពីថ្ងៃទី១៦ ធ្នូ»។
ដោយឡែកពាក់ព័ន្ធការឃាត់ខ្លួនវិញត្រូវបានលោក ប៊ន់ វណ្ណារ៉ា នាយការិយាល័យនគរបាលប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តបាត់ដំបងឱ្យដឹងនៅរសៀលថ្ងៃទី១៦ ធ្នូ ថា កាលពីថ្ងៃទី១៣ ធ្នូ ឆ្នាំ២០២១ សមត្ថកិច្ចរបស់លោកបានទទួលពាក្យបណ្តឹងពីស្ត្រីម្នាក់ជាម្តាយក្មេងរងគ្រោះដោយចោទប្រកាន់លើយុវជនម្នាក់ឈ្មោះកុយ គីណា អាយុ១៥ឆ្នាំ មានរបរជាកម្មករ។
លោកបន្តថា ក្នុងការប្តឹងនោះ ម្តាយក្មេងស្រីរងគ្រោះបានរៀបរាប់ថានៅវេលាម៉ោងជាង២រសៀល ថ្ងៃទី១២ ធ្នូ ឆ្នាំ ២០២១ មានយុវជនម្នាក់បានល្បួងកូនស្រីរបស់គាត់អាយុ១៣ឆ្នាំយកទៅរំលោភសេពសន្ថវៈស្ថិតត្រង់ចំណុច ផ្ទះសំណាក់ មួយកន្លែង ស្ថិតនៅភូមិឡាក់ហុកពីរ ឃុំកំរៀង ស្រុកកំរៀង ខេត្តបាត់ដំបង។
លោកបញ្ជាក់ថា ក្រោយឃាត់ខ្លួន និងនាំមកសាកសួរនៅការិយាល័យរបស់លោកគឺជនសង្ស័យបានឆ្លើយសារភាពថា រូបគេពិតជាបានរំលោភសេពសន្ថវៈលើក្មេងស្រីរងគ្រោះពិតប្រាកដមែន។
លោកបន្តថា៖«ខាងតុលាការ លោកចោទ និងត្រូវបានចៅក្រមស៊ើបសួរ ឃុំខ្លួនពីថ្ងៃទី១៥ ធ្នូ។ ក្រោមបទចោទ រួមភេទជាមួយអនីតិជនអាយុក្រោម១៥ឆ្នាំតាមមាត្រា៤២ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ»៕
