សៀមរាបៈ ស្ថាប័នពាក់ព័ន្ធ និងអ្នកជំនាញ បានជួបពិភាក្សាគ្នា លើកទី២០ ច្បាប់ស្តីពី ការការពារទិន្នន័យ និងការរក្សាព័ត៌មានសម្ងាត់ ខណៈអគ្គនាយកដ្ឋានការពារអ្នកប្រើប្រាស់ (ក.ប.ប) បញ្ជក់ថា ការចូលរួមជជែករបស់ ក.ប.ប គឺដើម្បីប្រមូលធាតុចូល សម្រាប់ដាក់បញ្ចូល ក្នុងសេចក្តីព្រាងច្បាប់ដែលកម្ពុជានឹងបង្កើតនាពេលខាងមុខ។
កាលពីថ្ងៃទី ១១ ធ្នូ តំណាងមកពីស្ថាប័នរដ្ឋ សាកលវិទ្យាល័យជាតិ និងអន្តរជាតិ អ្នកច្បាប់ និងអង្គការនានា បានជួបពិភាក្សាគ្នា នៅក្នុងសិក្ខាសាលាលើកទី២០ ស្តីពី ការការពារទិន្នន័យ និងភាពឯកជនដែលផ្តោតលើការអនុវត្តល្អជាអន្តរជាតិនិងវិធីឆ្ពោះទៅមុខ សម្រាប់ប្រទេសកម្ពុជា ក្នុងវិស័យការពារទិន្នន័យនិងភាពឯកជន នៅសណ្ឋាគារ Sofitel Angkor ខេត្តសៀមរាប ដែលរៀបចំឡើងដោយអង្គការ Konrad-Adenauer-Stiftung-Cambodia (KAS) នៃប្រទេសអាល្លឺម៉ង់។
ទំព័រហ្វេសប៊ុករបស់អគ្គនាយកដ្ឋាន ក.ប.ប ឱ្យដឹងថា សិក្ខាសាលាលើកទី ២០ នេះ ជាវេទិកាមួយដែលផ្តល់ឱកាសជូនអ្នកចូលរួមទាំងអស់ អាចពិភាក្សា ផ្លាស់ប្តូរយោបល់ និងបង្កើនការយល់ដឹង អំពីធុរកិច្ច ក្នុងសម័យឌីជីថល ដោយផ្តោតសំខាន់លើការលើកកម្ពស់ការការពារទិន្នន័យ និងការរក្សាព័ត៌មានសម្ងាត់ របស់អ្នកប្រើប្រាស់ជាចម្បង។
លោកផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប ប្រាប់ភ្នំពេញប៉ុស្តិ៍នៅថ្ងៃទី ១២ ធ្នូថា ដោយសារតែរដ្ឋាភិបាល មានគោលនយោបាយ ក្នុងការបង្កើតច្បាប់ស្តីពីការការពារទិន្នន័យ និងការរក្សាព័ត៌មានសម្ងាត់ សម្រាប់អ្នកប្រើប្រាស់ឱ្យបាននៅក្នុងឆ្នាំ ២០២១ ដល់ឆ្នាំ ២០២៥ ខាងមុខ តាមរយៈគម្រោងបង្កើតច្បាប់នេះ អគ្គនាយដ្ឋាន និងស្ថាប័នពាក់ព័ន្ធ ត្រូវការការសិក្សា ពីគោលនយោបាយច្បាប់ដែលមាននៅក្នុងប្រទេសជាច្រើន និងប្រមូលធាតុចូល ពីស្ថាប័នពាក់ព័ន្ធ ដើម្បីធ្វើយ៉ាងណា ឱ្យច្បាប់នេះ បង្កើតឡើងហើយ មានប្រសិទ្ធភាព និងអាចប្រើប្រាស់បាន។
លោកបញ្ជាក់ថា៖«យើងកំពុងវិភាគទៅលើការចំណាយ និងផលចំណេញ អំពីការកសាងច្បាប់នេះ។ ពិតមែនតែច្បាប់នេះ រដ្ឋាភិបាល បានចង្អុលបង្ហាញមកហើយថា យើងត្រូវតែធ្វើ គ្រាន់តែថា ក្នុងទំហំវិសាលភាពប៉ុនណា យើងសិក្សាបន្តទៀត។ បែបនេះ ហើយទើបមានសិក្ខាសាលាជជែកលើច្បាប់នេះ»។
លោក បន្តថា៖«តាមការធ្វើបទបង្ហាញ និងការអង្កេត ឃើញថា ច្បាប់នេះ គឺមានសារៈសំខាន់ណាស់ ព្រោះការការពារបានទៅលើទិន្នន័យ និងការរក្សាការសម្ងាត់ ក្នុងបច្ចេកវិទ្យា ដែលខ្មែរយើងមិនទាន់មានការគ្របដណ្តប់ និងគ្រប់គ្រងបានទាំងអស់ ដែលជួយឱ្យអ្នកវិនិយោគទាំងអស់ មានការទុកចិត្ត។ មានន័យថា នៅពេលមានការបញ្ចូនទិន្នន័យណាមួយទៅ គឺនឹងមិនត្រូវបានអ្នកដទៃយកទៅចែកចាយបន្ត ឬប្រើប្រាស់ក្នុងផ្លូវខុស»។
តាមលោក ផាន អូន បានឱ្យដឹងដែរថា រដ្ឋាភិបាល ត្រូវចំណាយពេលយ៉ាងហោចណាស់ ៥ ឆ្នាំ ដើម្បីធ្វើការសិក្សា និងតាក់តែងច្បាប់នេះ ឱ្យលេចជារូបរាងឡើង និងដើម្បីស្របតាមគោលនយោបាយរបស់រដ្ឋាភិបាល ដែលបានដាក់ចេញ ដើម្បីធានាដល់សិទ្ធិ និងផ្តល់ទំនុកចិត្ត ដល់អ្នកប្រើប្រាស់ ជាពិសេសអ្នកវិនិយោគនៅកម្ពុជា។
លោក លឹម ហេង អនុប្រធានសភាពាណិជ្ជកម្មកម្ពុជា បានគាំទ្រ និងជំរុញឱ្យមានការពន្លឿន ការតាក់តែងសេចក្តីព្រាងច្បាប់នេះ ដើម្បីធានាដល់សុវត្ថិភាព និងការរក្សាការសម្ងាត់របស់អ្នកវិនិយោគ ដែលបានមកបណ្តាក់ទុនរកស៊ីនៅក្នុងប្រទេសកម្ពុជា។
ការជំរុញនេះ ក៏ព្រោះតែលោក មើលឃើញថា ការរក្សាការសម្ងាត់ និងទិន្នន័យជាច្រើនរបស់អ្នកប្រើប្រាស់ ឬអ្នកវិនិយោគ គឺត្រូវបានបែកធ្លាយ និងយកមកប្រើប្រាស់ដោយគ្មានការអនុញ្ញាត ដោយសារតែការប្រកបអាជីវកម្មមិនសុច្ចរិត។
លោក បានបន្តថា៖«ច្បាប់ស្តីពីការការពារទិន្នន័យនេះ គឺមិនខុសពីការការពារទិន្នន័យរបស់អ្នកវិនិយោគទាំងអស់នេះ ដែលសំខាន់ណាស់ ព្រោះព័ត៌មានរបស់ក្រុមហ៊ុន ឬផែនការរបស់យើង សម្រាប់ធ្វើអាជីវកម្មឆ្នាំក្រោយៗទៀត បែកធ្លាយឱ្យគេចាប់យកបាន។ ហ្នឹងគឺជាការមួយដែលប្រកួតប្រជែងមិនស្មើភាព។ ហេតុនេះ នឹងធ្វើឱ្យប៉ះពាល់គម្រោងដែលគេខំសិក្សាយូរឆ្នាំមកហើយ ដើម្បីយកមកអនុវត្ត ដល់ពេលមានអ្នកលួចយកអ៊ីចឹង ធ្វើឱ្យបាត់បង់ប្រយោជន៍»។
ក្នុងនាមតំណាងឱ្យសភាពាណិជ្ជកម្ម លោក លឹម ហេង រំពឹងថា ច្បាប់នេះ នឹងត្រូវបានប្រមូលធាតុចូលពីគ្រប់ភាគីពាក់ព័ន្ធយ៉ាងទូលំទូលាយ ដើម្បីចូលរួមការពារ បម្រើផលប្រយោជន៍ដល់ក្រុមហ៊ុនឯកជន ជាពិសេសអ្នកវិនិយោគនៅក្នុងប្រទេស និងធ្វើយ៉ាងណាឱ្យពួកគេ មានទំនុកចិត្តកាន់តែខ្លាំងក្នុងការមកបោះទុន និងបន្តវិនិយោគនៅក្នុងប្រទេសកម្ពុជា៕